Afiafi Faaleaiga
O le aiga o le nofoaga sili ona taua mo le aoaoina o le talalelei. E leai se isi faalapotopotoga e mafai ona suia le tulaga o le aiga. O loo saga valaau mai pea lava pea Perofeta o Aso e Gata Ai i matua, ina ia faafaileleina a latou fanau ma le alofa ma le aoaoina o le talalelei.
O le 1915 na amata ai e Peresitene Iosefa F. Samita ma ona fesoasoani i le Au Peresitene Sili se taumafaiga i le Ekalesia aoao e faamalosi ai le aiga. Sa latou valaau atu i matua i totonu o le Ekalesia e faapotopoto ma a latou fanau taitasi i le vaiaso mo se “Afiafi Faaleaiga.” E tatau i aiga ona faaavanoa se taimi e tatalo ma pepese faatasi ai, faitau tusitusiga paia, aoao le talalelei i isi, ma auai i gaoioiga e mafai ona fausia ai le lotogatasi o le aiga.
O le 1970 na tonu ai ia Peresitene Iosefa Filitia Samita ma ona fesoasoani i le Au Peresitene Sili e filifilia le po o le Aso Gafua e avea ma taimi mo afiafi faaleaiga. Talu mai lena faasilasilaga, ua faaavanoa pea lava e le Ekalesia le afiafi o le Aso Gafua mai gaoioiga faale-Ekalesia ina ia mafai ai e aiga ona mafuta faatasi.
O loo faaauau pea ona augani mai Perofeta o Aso e Gata Ai i tagata o le Ekalesia ina ia tuu atu le faamuamua sili i afiafi faaleaiga. Ua latou folafola mai o lo tatou faamaoni i lenei polokalama, o le a fesoasoani e puipuia ai o tatou aiga mai mealeaga i ona po nei, ma o le a aumaia ai ia i tatou le olioli tele i le taimi nei ma le faavavau atoa.
O tagata uma o le Ekalesia e ao ona avea afiafi o Aso Gafua ma se taimi paia, ia faaavanoa mo afiafi faaleaiga. Afai ua e faaipoipo, ia faia a oulua afiafi faaleaiga faatasi ma lou toalua i vaiaso taitasi. A maua se fanau, ia faaauai i latou i le afiafi faaleaiga. Ia faafetaui le polokalama i o latou manaoga ma mea e fiafia i ai, ma ia tuu atu le avanoa ia i latou e auai ai i le faatinoina. A oo ina matutua lau fanau ma tuua le aiga, ia faaauau pea ona faia afiafi faaleaiga ma lou toalua.
Afai e na o oe pe le’i faia foi sou aiga, mafaufau e fesili atu i le epikopo po o le peresitene o le paranesi e faatulaga se afiafi faaleaiga mo oe ma isi tagata nofotoatasi o le uarota po o le paranesi. E mafai ona ia tofia se taitai o le afiafi faaleaiga, o ia lea e nafa ma le faatulagaina o le polokalama ma mautinoa o lo o faia pea afiafi faaleaiga.
O se auivi fautuaina mo le afiafi faaleaiga e i ai se:
-
Pese amata
-
Tatalo amata
-
Mau faitau
-
Lesona
-
Gaoioiga
-
Pese faaiu
-
Tatalo faaiu
-
Taumafa mama
Ao e saunia lesona mo le afiafi faaleaiga, ia manatua e faaaoga tusitusiga paia, aoaoga a Perofeta o aso e gata ai, ma poto masani faaletagata ma molimau. O lenei tusi e mafai ona fesoasoani i le filifilia o autu e aoaoina. Ma le isi, e mafai ona e tagai i isi lomiga a le Ekalesia, e pei o le Tusi Faavae o Afiafi Faaleaiga (aitema numera 31106), Aoaoga Faavae o le Talalelei (31110), o le Tusitaiala mo le Aiga (31180), ma mekasini a le Ekalesia.