Liliuese
Pe a fulitua ni tagata po o se vaega o tagata mai mataupu faavae o le talalelei, ua latou i ai i se tulaga o le liliuese.
O vaitau o le liliuese lautele na tutupu i le gasologa o le talafaasolopito o le lalolagi. A mavae taimi o le amiotonu, e masani ona liliu atu tagata i le amioleaga. O se tasi o faataitaiga o le Liliuese Tele, lea na tupu ina ua mavae ona faatuina e le Faaola Lana Ekalesia. Ina ua mavae le maliu o le Faaola ma Lona Au Aposetolo, sa faasese e tagata ia mataupu faavae o le talalelei ma faia ni fesuiaiga e aunoa ma le faatagaina i le faatulagaga o le Ekalesia ma sauniga o le perisitua. Talu ai ona ua salalau lenei amioleaga, o lea na aveesea ai e le Alii le pule o le perisitua mai le lalolagi.
I le taimi o le Liliuese Tele, sa leai ni taitaiga faalelagi mai perofeta soifua mo tagata. E tele ekalesia na faatutuina, ae sa lē ia i latou le mana o le perisitua e taitai ai tagata i le malamalama moni o le Atua le Tama ma Iesu Keriso. Sa i ai vaega o tusitusiga paia na faaseseina pe leiloloa, ma sa leai se tasi na i ai le pule e faaee ai le meaalofa o le Agaga Paia pe faatino ai isi sauniga o le perisitua. Sa i ai pea lenei liliuese seia oo ina faaali le Tama Faalelagi ma Lona Alo Pele ia Iosefa Samita i le 1820 ma amataina ai le toefuataiga mai o le atoatoaga o le talalelei.
Ua tatou ola nei i se taimi ua toefuatai mai ai le talalelei a Iesu Keriso. Ae peitai e le faapei o le Ekalesia i taimi ua tuanai, O Le Ekalesia a Iesu Keriso o le Au Paia o Aso e Gata Ai o le a le toe faatoilaloina i se liliuese lautele. Ua aoao mai tusitusiga paia o le a le mafai lava ona toe faatoilaloina le Ekalesia (tagai MFF 138:44; tagai foi Tanielu 2:44).
E ui lava o le a leai se isi liliuese āoāo mai le upu moni, ae e tatau lava ia i tatou taitoatasi ona puipuia mai i le liliuese faaletagata. E mafai ona e puipuia oe mai le liliuese faaletagata e ala i le tausia o au feagaiga, usiusitai i poloaiga, mulimuli i taitai o le Ekalesia, taumafa i le faamanatuga, ma faaauau pea ona faamalosia lau molimau e ala i le suesueina o tusitusiga paia i aso taitasi, tatalo, ma auauna atu.