Anapogi ma Taulaga Anapogi
O le anapogi o le ofo atu lea e lē ’ai ma lē inu mo se taimi. O le tuufaatasi o le anapogi ma le tatalo faamaoni e mafai ai ona fesoasoani e saunia oe ma isi mo le mauaina o faamanuiaga a le Atua.
Faamoemoega o le Anapogi
I se tasi mea na tupu, na tulia ai e le Faaola se agaga leaga i fafo mai se tamaitiiti ma sa faaaoga ai lenei mea na tupu e aoao ai Lona au soo e uiga i le mana o le tatalo ma le anapogi. Na fesili atu i ai Ona soo, “Se a le mea na le mafai ai ona matou tulia o ia?” Na tali atu Iesu: “Ona o lo outou le faatuatua: aua e moni ou te fai atu ia te outou, afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i le la mea, ona alu atu ai lea; e leai foi se mea tou te le mafaia. A ua na o le tatalo ma le anapogi e o ese ai mea faapena“ (Tagai Mataio 17:14–21.)
Ua aoao mai i lenei tala, o le tatalo ma le anapogi e mafai ona faaopoopo atu ai le malosi i e tuuina atu ma mauaina faamanuiaga o le perisitua. E mafai foi ona faatatau lenei tala i au taumafaiga faaletagata e ola i le talalelei. Afai e i ai ni ou vaivaiga po o agasala o loo faafaigata ona faatoilaloina, e mafai ona e anapogi ma tatalo ina ia maua le fesoasoani po o le faamagaloga o loo e manaomia. E faapei o le temoni lea na tulia e Iesu, o lou faafitauli atonu e pei o lena ituaiga ua na o le tatalo lava ma le anapogi e alu ai i fafo.
E mafai ona e anapogi mo le tele o faamoemoega. O le anapogi o se tasi lea o ala e tapuai ai i le Atua ma faaali atu le agaga faafetai ia te Ia (tagai Luka 2:37; Alema 45:1). E mafai ona e anapogi ao e fesili atu i le Tama Faalelagi e faamanuia e mamai ma mafatia (tagai Mataio 17:14–21). O le anapogi e mafai ona fesoasoani ia te oe ma i latou e te alofa i ai ia maua faaaliga patino ma liua i le upu moni (tagai Alema 5:46; 6:6). O le anapogi e mafai ai ona e maua le malosi e tetee ai faaosoosoga (tagai Isaia 58:6). E mafai ona e anapogi ao e taumafai e faamaualaloina oe lava i luma o le Atua ma faaaoga le faatuatua ia Iesu Keriso (tagai Ominae 1:26; Helamana 3:35). E mafai ona e anapogi ia maua taitaiga i le talaiina atu o le talalelei ma faalauteleina valaauga i le Ekalesia (tagai Galuega 13:2–3; Alema 17:3, 9; 3 Nifae 27:1–2). O le anapogi e mafai ona o faatasi ma le faanoanoa po o le loto nutimomoia (tagai Alema 28:4–6; 30:1–2).
Aso Sa Anapogi
Ua atofaina e le Ekalesia le Aso Sa e tasi i masina taitasi, e masani lava o le Aso Sa muamua, o se aso o le Anapogi. O le faamamaluina o lenei Aso Sa anapogi e aofia ai le lē ’ai ma le lē inu mo ni taumafataga sosoo se lua, auai i le sauniga anapogi ma molimau, ma le tuuina atu o se taulaga anapogi e fesoasoani ai i le tausiga o ē o loo manaomia le fesoasoani.
O lau taulaga anapogi e tatau ona lē itiiti ifo ma le tau o aiga e lua e te le’i taumafaina. Afai e mafai, ia e limafoai ma tuuina atu ia sili atu nai lo le tau.
E le gata i le faamamaluina o aso anapogi ua faatulagaina e taitai o le Ekalesia, ae e mafai foi ona e anapogi i soo se aso lava, e tusa ma ou manaoga ma manaoga o isi. Ae peitai, e le tatau ona e anapogi faalausosoo pe [anapogi] foi mo ni vaitaimi uumi.
O Le Anapogi Moni
I le Lauga i luga o le Mauga, na aoao atu ai e Iesu le foliga o le anapogi moni. Sa ia talanoa tetee i tagata pepelo o ē, a anapopogi, “ua latou faaleaga o latou mata, ina ia iloa e tagata ua latou anapopogi.“ Nai lo le faaalia o se vaaiga mai fafo o le amiotonu, e tatau ona e anapogi i “lou Tama o i le mea lilo: o lou Tama foi o loo silasila i le mea lilo, na te avatu faaaliali se taui ia te oe” (Mataio 6:16–18).
Na aoao mai foi le perofeta o Isaia e uiga i le agaga moni o le anapogi: “E le o lenei ea le anapogi ou te loto i ai? Ma ia tatalaina fusi na faia i le amio leaga, e tatala fusi o le amo, e tuuina atu ia saoloto e ua faasauaina, ma ia outou gausia amo uma lava. E le o lenei ea? Ona ia tofitofi au mea e ai i lē ua fia ai, ia aumai i lou fale ē ua matitiva ma faasauaina; a e iloa lē ua le lavalava e te faaofuina o ia, aua foi e te lafi ia i latou o lou lava aiga?“ (Isaia 58:6–7).
Na molimau mai foi Isaia i faamanuiaga e oo mai pe a tatou usitai i le tulafono o le anapogi. “Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo; e alu atu foi lau amiotonu i ou luma, e muliau mai le pupula o Ieova ia te oe. Ona e valaau lea, ae tali mai ai Ieova; e te alaga atu ae fetalai mai o ia, O au lenei… . Afai foi e te alofa atu i lē ua fiaai, ma e fafaga ia maona lē ua tiga, ona alu ae lea o lou malamalama i le pouliuli, ma lou pogisa e pei o le aoauli ia: E taitaiina foi oe e le aunoa e Ieova; e faamalie foi o ia ia te oe pe a oge vai, ma faamalosi ou ivi; e avea foi oe e pei se fanua ua faasusuina, e pei o le puna vai foi e le mate ona suavai“ (Isaia 58:8–11).