Perisitua Mekisateko
“E i le ekalesia, perisitua e lua, o le Mekisateko ma le Arona” (MFF 107:1). O le Perisitua Mekisateko, lea “e tusa ma le faatulagaga a le Alo o le Atua” (MFF 107:3), e sili atu i nei perisitua. O loo “i ai le aia e fai ma peresitene, e i ai foi le mana ma le pule i tofiga uma i le ekalesia” (MFF 107:8). O loo umia foi e lea perisitua “ki o faamanuiaga faaleagaga uma o le ekalesia” (MFF 107:18). Ua faaigoa i se faitaulaga sili maoae o le na soifua i le taimi o le perofeta o Aperaamo (tagai MFF 107:2–4; Tagai foi i le Alema 13:14–19).
E ala mai i le pule o le Perisitua Mekisateko, o loo taitaiina ai e taitai o le Ekalesia le Ekalesia ma taitaia ai le folafolaina atu o le talalelei i le lalolagi. I totonu o sauniga o le Perisitua Mekisateko, “ua faaalia ai le mana o le amioatua” (MFF 84:20).
O lenei perisitua sili na tuuina atu ia Atamu ma ua i ai i luga o le fogaeleele i soo se taimi lava na faailoa mai ai e le Alii Lana talalelei. Na aveesea mai le fogaeleele i le taimi o le Liliuese Tele, peitai na toefuataiina mai ia Me 1829, i le taimi na faaee atu ai e Aposetolo o Peteru, Iakopo, ma Ioane i luga o Iosefa Samita ma Oliva Kaotui.
O tofi o le Perisitua Mekisateko o Aposetolo, Fitugafulu, peteriaka, faitaulaga sili, ma toeaina. O le Peresitene o le Perisitua Maualuga o le Peresitene o le Ekalesia (tagai MFF 107:64–66).
O alii i le Ekalesia e tatau ona avea ma ni tagata agavaa e umia le Perisitua Mekisateko ina ia mafai ai ona maua faaeega paia i le malumalu ma faamauina i o latou aiga mo le faavavau. E ia i latou le pule e faamanuia ai i latou e mamai ma tuuina atu faamanuiaga faapitoa i tagata o aiga ma isi. Faatasi ai ma le faatagaga mai taitai perisitua pulefaamalumalu, e mafai ona latou faaee atu le meaalofa a le Agaga Paia ma faauuina isi alii agavaa i tofi o le Perisitua Arona ma le Perisitua Mekisateko.
Pe a maua e se alii le Perisitua Mekisateko ua ulu atu o ia i le tautoga ma le feagaiga o le perisitua. Ua osifeagaiga o ia e faamaoni, faalauteleina lona valaauga, “gauai ma le filiga i upu o le ola faavavau,” ma “ola i upu uma e oo atu mai le fofoga o le Atua.” O i latou e tausia lenei feagaiga o le a faamamaina e le Agaga ma maua “mea uma o i ai i [le] Tama.” (Tagai MFF 84:33–44.)