Tusi ma Ata Mataga
O tusi ma ata mataga, o soo se tusitusiga lava e faaalia ai pe faamatalaina ai le tino o le tagata ma uiga faafeusuai i se auala e faaosofia ai lagona feusuai. E faasalalauina i le tele o ala tau faasalalauga, e aofia ai mekasini, tusi, televise, ata tifaga, musika, ma le Initoneti. E leaga tele mo le agaga e pei lava o le leaga o le tapaa, ava malosi, ma fualaau oona mo le tino. O le faaaogaina o tusi ma ata mataga i soo se auala lava, o le solia lena o le poloaiga a le Atua: “Aua e te… pe mulilua… pe faia foi soo se mea faapena” (MFF 59:6). E mafai ona taunuu atu ai i isi agasala matuia. E tatau i tagata o le Ekalesia ona aloese mai soo se ituaiga o tusi ma ata mataga, ma e tatau foi ona tetee atu i lona gaosiga, faasalalauina, ma lona faaaogaina.
Ua matua matuia lava faatosinaga a tusi ma ata mataga. E pei foi o isi faatosinaga, e ta’a’ina atu ai tagata e faataitai ma sailia nisi lagona malolosi faaosofia. Afai e te faata’ita’ia ma e faatagaina oe lava e utia ai i lana mailei, o le a faatama’ia oe, e faaseseina ai lou mafaufau, loto, ma le agaga. O le a aveesea ai lou mamalu ma lou iloa o le matagofie o le olaga. O le a saeia oe ma toso atu ai oe i mafaufauga leaga ma ono oo atu ai i faatinoga faatiapolo. O le a matua’ia ai se faatama’iga matautia i fegalegaleaiga a lou aiga.
Ona o le natura faatosina o tusi ma ata mataga ma le afāina e mafai ona oo i le tino ma le agaga, ua lapataiina ai pea e le aunoa i tatou e auauna a le Atua ina ia aloese mai ai. Afai ua utia oe i mailei a tusi ma ata mataga, ia tuu nei loa ae saili se fesoasoani. O le salamo, e mafai ona e maua ai le faamagaloga ma maua le faamoemoe i totonu o le talalelei. Alu i lou epikopo po o lou peresitene o le paranesi mo se fautuaga i auala e mafai ai ona e manumalo ai mai lou faafitauli, ma saili atu mo se faamalologa e ala i le Togiola a Iesu Keriso. Ole atu i le Alii e avatu ia te oe le malosi e te faatoilaloina ai lenei faatosinaga matautia.