Gagana Masoā
O le palauvale o le le faaaloalo lea po o le tetee atu lea i mea paia. E aofia ai le ta’u fua po o le lē migao i le faaaogaina o suafa o se tasi o le Aiga Atua. E aofia ai foi soo se ituaiga lava o talanoaga po o amioga lē mama ma lē talafeagai.
Ia faaaogaina ma le migao ma le faaaloalo i taimi uma suafa o le Tama Faalelagi, Iesu Keriso, ma le Agaga Paia. O le faaaoga ma le lē tatau o o latou suafa o se agasala lea. O le palauvale, upu masoa, po o gagana ma taga e le tusa ai ma le vafealoai, faapea foi ma tala tausua i mea valea po o mea leaga, e faatiga ai i le finagalo o le Alii faapea foi ma isi.
O upusa e faatamaia ai lou agaga ma tauvalea ai oe. Aua nei faatosinaina oe e isi e te faaaogaina upusa. Ae ia faaaoga gagana mama e siitia ma faaleleia ai isi. Filifili uo e faaaogaina gagana lelei. Faia se faataitaiga e faamalosia ai i latou o loo siomia oe ina ia faaaogaina gagana mama. Pe a faaaogaina e uo ma i latou tou te faatasi ia gagana eleelea, ia fautuaina lelei ma le alofa i latou e filifili nisi upu e faaaoga. Afai e faaauau pea ona latou faia, ia e savali ese ma le faaaloalo pe sui foi le mataupu e talanoaina.
Afai ua e amatalia le amio masani o le fai upusa, e mafai ona e taofia. Ia amata i le faia lea o se faaiuga o le a suia. Tatalo mo se fesoasoani. Afai e faaosoosoina oe e faaaoga upu masoa, aua e te tautala, po o le fai atu foi o le mea lena e te fia fai atu ai i se isi faaupuga ese.