Sapati
O le Sapati o le aso o le Alii, ua faapaiaina i vaiaso taitasi mo malologa ma tapuaiga. I taimi o le Feagaiga Tuai, sa faamamaluina e tagata o le feagaiga a le Atua ia le Sapati i le aso lona fitu o le vaiaso, aua na malolo ai le Atua i le aso lona fitu i le taimi na ia foafoaina ai le lalolagi. Na toe faamanatu mai e le Alii le taua o le faamamaluina o le Sapati i totonu o Poloaiga e Sefulu:
“Ia e manatua le aso sapati e te faapaiaina.
“O aso e ono e te galue ai, ma fai ai au galuega uma lava:
“A o le aso fitu, o le sapati lea ia Ieova lou Atua; aua e te fai ai se galuega e tasi, o oe, ma lou atalii, ma lou afafine, o lau auauna tane, ma lau auauna fafine, o au manu foi, ma le tagata ese o loo mau ma oe:
“Aua na faia e Ieova i aso e ono o le lagi ma le lalolagi, atoa ma le sami, ma mea uma lava o i ai, ona malolo ai lea o ia i le aso fitu; o le mea foi lea na faamanuia ai e Ieova le aso sapati, ma na faapaiaina ai” (Esoto 20:8–11).
Ina ua mavae le Toetu mai o Iesu Keriso, lea na tupu i le aso muamua o le vaiaso, na amata ai loa e soo o le Alii ona faamamaluina le Sapati i le aso muamua o le vaiaso, Aso Sa (tagai Galuega 20:7).
I aso e gata ai, ua poloaiina ai e le Alii i tatou ina ia faaauau pea ona tatou faamamaluina le Sapati. Ua ia folafola mai pe afai tatou te usiusitai i lenei poloaiga, o le a tatou maua “le atoatoa o le lalolagi” (tagai MFF 59:16–20).
Ona o le Sapati o se aso paia, e tatau ai ona faaavanoaina mo na o gaoioiga mama ma paia. O lou lē faigaluega ma lou lē auai i ni faafiafiaga [i le aso sapati], ua lē lava lena. O le mea moni, afai o le a na ona tatou nofonofo e leai se mea e faia i le Sapati, ua tatou lē tausia lava le aso ia paia. I se faaaliga na tuuina mai i le perofeta o Iosefa Samita i le 1831, na poloai mai ai le Alii: “Ina ia e tausi atili ai ia te oe lava ia mama nai le lalolagi, ia e ulu atu i le fale tatalo ma avatu ai au faamanatuga i lou aso paia; aua e moni o le aso lenei ua atofaina e te malolo ai i au galuega, ma avatu au viiga i Le Silisili” (MFF 59:9–10). Ina ia o gatasi ma lenei faaaliga, tatou te auai atu i sauniga faamanatuga i vaiaso taitasi. O isi gaoioiga o le aso Sapati e mafai ona aofia ai talosaga, manatunatuga, suesueina o tusitusiga paia ma aoaoga a perofeta o aso e gata ai, tusiaina o tusi i tagata o aiga ma uo, faitau i tusitusiga lelei, asiasi atu i e mamai ma faanoanoa, ma auai atu i isi sauniga a le Ekalesia.