Faaipoipoga
I le lalolagi i aso nei, ua toatele tagata ua latou lē faatauaina ma ua ulagia le faaipoipoga ma le aiga. I le lotolotoi o lenei lē malamalama ma nei faaupuga matautia, ua tuuina mai ai pea e le aunoa e le Au Peresitene Sili ma le Korama a le Toasefululua le leo o le upumoni. Ua latou “tautino atu ma le faamaoni, o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o fuafuaga a Lē Foafoa mo le taunuuga e faavavau o Lana fanau” (tagai “O Le Aiga: O se Folafolaga i le Lalolagi,” itulau 10–12 o le tusi lenei).
O fiafiaga silisili o le olaga e maua i totonu o le aiga. O sootaga malolosi faaleaiga e manaomia ai ni taumafaiga, ma o na taumafaiga e aumaia ai le olioli sili i lenei olaga ma oo atu ai lava i le faavavau. E tusa lava pe e te lei maua se olaga o se aiga fiafia i le taimi ua tuanai, ae e mafai lava ona e saili e te maua se faaipoipoga fiafia e faavavau, ma se sootaga alofa ma tagata o lou aiga.
O Le Feagaiga Fou ma le Faavavau o le Faaipoipoga
I le fuafuaga mo le fiafia a lo tatou Tama Faalelagi, e mafai ona faamauina se alii ma se tamaitai mo le olaga nei ma le faavavau. O i latou ua maea ona faamauina i totonu o le malumalu, ua latou mautinoa o la latou sootaga o le a faaauau pea e faavavau, pe afai latou te faamaoni i a latou feagaiga. Ua latou iloa e leai se mea, e oo lava i le oti, e mafai ona tuueseeseina i latou.
O le feagaiga o le faaipoipoga e faavavau e manaomia mo le faaeaga. Na faaali mai e le Alii e ala mai ia Iosefa Samita: “I le Mamalu Selesitila e i ai lagi po o tikeri e tolu; e ao foi i se tagata ina ulu i lenei faatulagaga o le perisituta (o lona uiga o le feagaiga fou faavavau o le faaipoipoga) ina ia na maua le tulaga aupito i luga; afai foi na te le faia faapea na te le mafai ona maua” (MFF 131:1–4).
Pe a maea ona mauaina sauniga o le faamauga ma osia feagaiga paia i totonu o le malumalu, e tatau i le ulugalii ona faaauau pea i le faatuatua ina ia mafai ai ona maua faamanuiaga o le faaipoipoga e faavavau ma le faaeaga. Na fetalai mai le Alii:
“Afai e faaipoipo le tane i lana ava i la’u upu, o la’u tulafono lea, ma i le feagaiga fou faavavau, ma faamaufaailogaina ai ia i laua e le Agaga Paia o le folafolaga, e lē ua faauuina, ua ou tofia i lenei mana ma ki o lenei perisitua; … ma afai [la] te tumau i la’u feagaiga, … o le a faia ia te i laua mea uma ua tuuina atu e la’u auauna i o laua luga, i lenei olaga, e oo lava i le faavavau; o le a faatumauina atoatoa foi pe a o ese atu i laua mai le lalolagi” (MFF 132:19; mo se faamatalaga o le Agaga Paia o le Folafolaga, tagai itulau 7–9).
Sauniuni mo le Faaipoipoga
Afai o e nofo toatasi, ia e sauniuni ma le faaeteete mo se faaipoipoga. Manatua e leai se mea e mafai ona suitulaga i le faaipoipoga i totonu o le malumalu. Saunia e faaipoipo i le tagata sa’o i totonu o le nofoaga sa’o i le taimi sa’o. Ia ola agavaa nei mo le ituaiga tagata o loo e faamoemoe e te faaipoipo atu i ai.
Tafafao faamasani ma na o i latou e maualuluga o latou tulaga faatonuina, ma i latou e mafai ai ona e faatumauina ou tulaga faatonuina a o outou mafuta. Ia fuafuaina gaoioiga lelei ma aoga ina ia le mafai ai ona tuua na o oulua e leai ni mea e faia. Ia i ai i nofoaga o le saogalemu e faigofie ai ona e puipuia oe lava. Ia aua nei auai i ni talanoaga ma ni gaoioiga e faaosofia ai lagona feusuai.
Ia saili mo se soa e tutusa o oulua talitonuga. Ia saili atu i se tasi e mafai ona e faamamaluina pea ma faaaloalo i ai, se tasi o le a fesoasoani malosi i lou olaga. Ae e te lei faaipoipo, ia mautinoa ua e mauaina se tasi e mafai ona e avatu atoa i ai lou loto, lou alofa atoa, lou faatuatuaga atoa, ma lau faaaloaloga atoa.
Fautuaga mo i Latou e Lē Faaipoipo
O nisi tagata o le Ekalesia o le a nofo toatasi pea e aunoa ma se mea e sese ai i latou, e ui lava latou te mananao e faaipoipo. Afai o i ai oe i lea tulaga, ia mautinoa e “galulue faatasi mea uma e lelei ai i latou o e ua alofa atu i le Atua” (Roma 8:28). A tumau pea ona e agavaa, o le a i ai se aso, i lenei olaga po o le olaga a sau, o le a tuuina atu ai ia te oe faamanuiaga uma o se sootaga o se aiga e faavavau. Ua tuuina mai e le aunoa e le Alii lenei folafolaga e ala mai i Ana perofeta o aso e gata ai.
Afai o loo e nofo toatasi ma i ai le manao e faaipoipo, aua nei aveesea lou faamoemoe. I le taimi foi lea, aua e te faatagaina ia oe e popole e uiga i au sini. Nai lo le lena, ia matuai auai ma le filiga i gaoioiga aoga. Ia saili ni auala e te auauna atu ai i lou aiga lautele ma lou nuu. Talia ma faalauteleina valaauga i le Ekalesia. Ia tausia oe lava ia mama, i le faaletino ma le faaleagaga. Ia faaauau pea ona aoao ma atiina ae ma agai pea i luma i lou olaga.
Ausiaina o se Faaipoipoga Fiafia
Afai ua e faaipoipo, manatua o le uiga faauo ma le alofa i le va o oe ma lou toalua e tatau ona avea ma sootaga faalelalolagi e sili ona pele. Ua na o lou toalua lava le tagata e ese mai le Alii ua poloaiina oe e te alofa atu i ai ma lou loto atoa (tagai MFF 42:22).
Manatua o le faaipoipoga, i lona uiga moni, o se paaga e tutusa, e aunoa ma le puleaina o le tasi e le isi, ae peitai e taufai faamalosiau, faamafanafana, ma fesoasoani le tasi i le isi.
E talu ai o le faaipoipoga o se mafutaga e sili ona taua i le olaga, o lea ua tatau i ai ma manaomia le taimi. Aua nei avea le faamuamua i tautinoga e itiiti lo latou taua. Ia faaaluina se taimi e talanoa faatasi ai ma faalogo le tasi i le isi. Ia manatunatu lelei ma faaaloalo. Ia faaali atu e lē aunoa lagona filemu ma le alofa.
Vaai ia aua nei i ai se mea e oo mai i lo oulua va ma lou toalua e faalavelave ai i la oulua ulugalii. Ia fai nei se faaiuga ina ia faamanuiaina la oulua faaipoipoga, e tusa lava pe o a luitau e ono tulai mai.
Ia faamaoni le tasi i le isi. Ia faamaoni i au feagaiga o le faaipoipoga i mafaufauga, upu, ma galuega. Ia manatua na fetalai mai le Alii, “Ia e alofa atu i lau ava ma lou loto atoa, ma pipi’i atu ia te ia ae le o se isi” (MFF 42:22). O le fuaitau “le o se isi” o loo aoao mai ai e leai se tagata, gaoioiga, po o se isi lava meatotino e tatau ona ave i ai le faamuamua nai lo o le lua mafutaga ma lou toalua.
Ia aloese mai soo se mea lava e te ono lē faamaoni ai i soo se itu. O tusi ma ata mataga, o tuinanauga lē lelei, ma uiga faatautala o le a faaleagaina ai lou tagata lelei ma osofaia ai le faavae o la oulua faaipoipoga.
Ia galulue faatasi e taulimaina a oulua tupe. Galulue faatasi i le faatulagaina o se paketi. Ia pulea lelei lou faaaluina o tupe, ma aloese mai le nofopologa i aitalafu. O le pulea ma le atamai o tupe ma le saoloto mai le nofo aitalafu, e fesoasoani atu e maua ai le filemu i le aiga.
Ia taulai atu o oulua olaga i le talalelei a Iesu Keriso. Ia fesoasoani le tasi i le isi e tausia feagaiga ua oulua osia. Ia auai atu faatasi i sauniga ma le malumalu. Suesue faatasi tusitusiga paia. Ia tootutuli faatasi i le tatalo i le amataga ma le faaiuga o aso taitasi e faafetai atu i lo oulua Tama Faalelagi mo le tasi ma ia aufaatasi e ole atu mo Ana faamanuiaga i o oulua olaga, lo oulua aiga, ma e pele ia te oulua, ma o oulua manaoga amiotonu. O le a faapea ona taitaiina oulua e le Atua, ma o a oulua talanoaga ma Ia i aso uma o le a aumaia ai le filemu ma le fiafia e le mafai ona maua mai i se isi lava ala. O le a faaleleia la oulua mafutaga i le gasologa o tausaga; o le a faamalosia lo oulua fealofani. O le a faateleina le agaga faafetai o le tasi mo le isi.