Migao

O le migao o se uiga loloto o le faaaloalo ma le alofa. Pe a i ai ia te oe uiga migao i le Atua, ua e faamamaluina o Ia, faailoa atu lou agaga faafetai ia te Ia, ma tausia Ana poloaiga.

E tatau ona e migao i lau amio faapea foi ma ou uiga vaaia. O amio migao e aofia ai le tatalo, suesueina o tusitusiga paia, anapogi, ma le totogiina o sefuluai ma taulaga. E aofia ai le ofuina o ofu talafeagai e te tauagafau ma tausaafia ai, ma le faaaogaina o gagana mama ma lelei. O le loloto o lou migao e faailoa lea i au filifiliga o musika ma isi mea faafiafia, o le ala e te talanoa ai i mataupu paia, ma le faiga o ou laei pe a e alu i le lotu ma le malumalu. E te faaali atu lou migao mo le Alii pe a e auauna atu i isi tagata ma tausia i latou ma le alofa ma le faaaloalo.

A o faateleina lou migao, o le a e matauina se suiga malie i lou olaga. O le a faateleina ona sasaa mai e le Alii Lona Agaga i ou luga. O le a faaitiitia ou popolega ma lou le mautonu. O le a mafai ona e mauaina faaaliga e fesoasoani ia te oe e foia ai faafitauli tau ia te oe lava ia faapea le aiga.

E faapei ona e latalata atu i le Atua pe a e migao, o le a faapena foi e le lē migao ona faataunuuina ai faamoemoega o le fili. O le a faaosoosoina oe e Satani e te mulimuli i tulaga o le lalolagi e faateleina ai le pisapisao, o faafiafiaga, ma finauga seia oo ina faaitiitia le amio pulea ma le tauagafau. E faapei o se taitai ua fuafuaina se osofaiga o le taua, o le a taumafai malosi o ia [Satani] e punitia le alāleo o fesootaiga i le va o oe ma le Alii. Ia faaeteete i na taumafaiga ma ia taumafai malosi ina ia migao i mea uma e te faia.