Toetu
Ona o le Pau o Atamu ma Eva, ua tatou oti faaletino ai, o le tuuesea lea o le agaga mai le tino. O le Togiola a Iesu Keriso, o le a toetutu ai tagata uma lava—laveai mai le oti faaletino (tagai 1 Korinito 15:22). O le Toetu o le toe tuufaatasia lea o le agaga ma le tino i se tulaga atoatoa, e ola pea, e le toe oo i ai ni faama’i ma le oti (tagai Alema 11:42–45).
O le Faaola o le tagata muamua lea i luga o lenei fogaeleele na toetu mai. O loo i le Feagaiga Fou le tele o tusitusiga e molimau mai ai na toetu mai o Ia mai le tuugamau (tagai Mataio 28:1–8; Mareko 16:1–14; Luka 24:1–48; Ioane 20:1–29; 1 Korinito 15:1–8; 2 Peteru 1:16–17).
Ina ua faaali atu le Alii toetu i Ona Aposetolo, Sa fesoasoani atu o Ia ia i latou ina ia latou malamalama na ia te Ia se tino o aano ma ivi. Na Ia fetalai atu, “Ia outou vaavaai mai i o’u lima ma o’u vae, aua o a’u lava lenei; ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o a’u nei ua outou vaavaai i ai” (Luka 24:39). Sa faaali atu foi o Ia i Sa Nifae ina ua mavae Lona Toetu mai (tagai 3 Nifae 11:10–17).
I le taimi o le toetu, o le a “faamasinoina [ai i tatou] e tusa ma a [tatou] galuega… . E aumaia foi i tatou e laulaututu i luma o le Atua, o loo iloa e pei ona tatou iloa nei, e i ai foi le manatu pupula i la tatou agasala uma” (Alema 11:41, 43). O le mamalu e faavavau tatou te maua, o le a faalagolago lea i lo tatou faamaoni. E ui lava o tagata uma o le a toetutu, e na o i latou o e ua o mai ia Keriso ma taumamafa i le atoatoa o Lana talalelei o le a ulu atu i le faaeaga i le malo selesitila.
O se malamalama ma se molimau i le toetu, e mafai ai ona aumaia ia te oe le faamoemoe ma se vaaiga mamao ao e feagai ma luitau, tofotofoga, ma mea ua ausia o le olaga. E mafai ona e maua le faamafanafanaga i le folafolaga, o loo soifua le Faaola ma e ala mai i Lana Togiola, “ua motusia foi e ia noanoataga o le oti ina ia leai se manumalo o le tuugamau, ina ia faaumatia foi le tui o le oti i le faamoemoe i le mamalu” (Alema 22:14).