Mwakoro 52
Kaotioti ae kaotaki rinanon Iotebwa Timiti te Burabeti nakoia unimwaanen te Ekaretia, i Kirtland, Ohio, n Tuun 6, 1831. E karaoaki te maungatabu i Kirtland, ni moanaki n 3 ao n toki n 6 Tuun. N te maungatabu aei e karaoaki te moan katabu nakon te nakoa are te ibonga ae rietata, ao a nooraki tabeua kaotioti mai irouia tamnei aika a buakaka ao a mwaamwana te aba ao n takuaki taian tamnei akanne.
1–2, Te maungatabu are i mwina e kaotaki bwa e na karaoaki i Missouri; 3–8, E karaoaki rineakiia tabeman unimwaane bwa a na mwananga ni kabane; 9–11, A riai unimwaane n reirei ni bwaai ake a tia ni koreia abotoro ao burabeti; 12–21, Naake a kaotaaki iroun te Tamnei a na kaoti uaa aika te neboaki ao te wanawana; 22–44, A rineaki unimwaane nako bwa a na waaki n tataekina te euangkerio i nanon mwanangaia nako Missouri ibukin te maungatabu.
1 Nooria, e taku te Uea nakoia unimwaane ake e a tia ni weteia ao n rineaia i nanon boong aika kaitira aikai, ni bwanaan Tamneina—
2 Ni kangai: Ngai, te Uea, N na kaota nakoimi bwa tera ae I tangiria bwa kam na karaoia man te tai aei ni karokoa te maungatabu ae e na roko, are e na karaoaki i Missouri, i aon te aba are N na katabua nakoia au aomata, ake nikiran kanoan Iakobwa, ao nakoia naake a bwaibwai ni kaineti ma te berita ae tabu.
3 Ngaia are, e koaua ae I tuangkami, e riai au tia mwakuri ae Iotebwa Timiti te Ataei, ao Sidney Rigdon ni mwananga n te tai are e kona ni karaoaki te katauraoi ni kiitana mwengaia, ao ni mwananga nakon te aba ae Missouri.
4 Ao ngkana a teimatoa ni kakaonimaki nakoiu, e na kaotaki nakoia bwa tera ae a na riai ni karaoia;
5 Ao e na bon kaotaki naba nakoia, ngkana a teimatoa ni kakaonimaki, abaia ni bwaibwai.
6 Ao ngkana a aki teimatoa ni kakaonimaki, a na bon kamaunaaki, ni kaineti nakon au kantaninga, ao n aron nooran raoiroina irou.
7 Ao e koaua ae I a manga tuangkami, a riai au tia mwakuri ae Lyman Wight ao au tia mwakuri ae John Corrill ni katawea mwanangaia;
8 Ao au tia mwakuri naba ae John Murdock, ao au tia mwakuri ae Hyrum Smith, a namwananga nakon te tabo naba anne n rinanon Detroit.
9 Ao a riai ni mwananga man te tabo anne n tataekina te taeka i nanon kawaia, akea riki ae a na taekinna i rarikin are e a tia ni koreaki irouia burabeti ao abotoro, ao bwaai ake a reiakinaki iroun te Tia Karaunano rinanon te tataro n onimaki.
10 A riai n nako ni kakauoman, ao a riai n tataekin i aon kawaia n aia botaki aomata nako, ni bwabetito n te ran, ao ni katoka bai i rarikin te ran.
11 Bwa e taku te Uea, N na kauarerekea au tai ni mwakuri n te raoiroi, bwa a nang roko boong are N na karaoa te motikitaeka nakon te tokanikai.
12 Ao e riai au tia mwakuri ae Lyman Wight n tarataraia, bwa e tangiria Tatan n ioioia n ai aron kunin te wiita.
13 Ao nooria, ane e kakaonimaki e na riki bwa te mataniwi i aon bwaai aika a mwaiti.
14 Ao teuana riki, N na anganiko te banna ni katooto ibukin bwaai ni kabane, bwa ko aonga n aki mwamwanaaki; bwa e mena Tatan n taabo nako i aon te aonaba, ao e waaki nako ni mwamwanaia kaain te aonaba—
15 Mangaia are ane e tataro, ae raraoma tamneina, te aomata anne e bon butimwaeaki irou ngkana e ongeaba nakon au otenanti nako.
16 Ane e taetae, ae raraoma tamneina, ae ana taetae e nimamannei ao e karikirakeko, te aomata anne boni ngaia mai iroun te Atua ngkana e ongeaba nakon au otenanti nako.
17 Ao teuana riki, ane e ruru i aan mwaakau e na bon kakorakoraaki, ao e na kaotinakoi uaa aika te neboaki ao te wanawana, ni kaineti ma taian kaotioti ao koaua ake I a tia n anganingkami.
18 Ao teuana riki, ane e konaaki ao e aki kaotinakoi uaa, ni kaineti ma te banna ni katooto aei, bon tiaki mai irou.
19 Mangaia are, man te banna ni katooto aei kam na ataia tamnei ni bwaai ni kabane i aan karawa ni kabuta.
20 Ao a tia n roko boong; ni kaineti ma aia onimaki aomata e na bon karaoaki nakoia.
21 Nooria, te tua aei a bon anganaki unimwaane ni kabane ake I a tia n rineia.
22 Ao e koaua ae I a manga tuangkami, a riai au tia mwakuri aika Thomas B. Marsh ao au tia mwakuri ae Ezra Thayre ni mwananga naba, n tataekina te taeka i aon kawaia nakon te aba naba arei.
23 Ao teuana riki, a riai au tia mwakuri aika Isaac Morley ao au tia mwakuri ae Ezra Booth ni mwananga, n tataekina naba te taeka i aon kawaia nakon te aba naba arei.
24 Ao teuana riki, a riai au tia mwakuri aika Edward Partridge ao Martin Harris ni mwananga ma au tia mwakuri ae Sidney Rigdon ao Iotebwa Timiti te Ataei.
25 A riai au tia mwakuri aika David Whitmer ao Harvey Whitlock ni mwananga naba, ao n tataekin i aon kawaia nakon te aba naba arei.
26 Ao a riai au tia mwakuri aika Parley P. Pratt ao Orson Pratt ni mwananga, ao n tataekin i aon kawaia, nakon naba te aba arei.
27 Ao a riai au tia mwakuri aika Solomon Hancock ao Simeon Carter ni mwananga naba nakon te aba naba arei, ao n tataekin i aon kawaia.
28 A riai au tia mwakuri aika Edson Fuller ao Jacob Scott ni mwananga naba.
29 Ao a riai au tia mwakuri aika Levi W. Hancock ao Zebedee Coltrin ni mwananga naba.
30 A riai au tia mwakuri aika Reynolds Cahoon ao Samuel H. Smith ni mwananga naba.
31 A riai naba au tia mwakuri aika Wheeler Baldwin ao William Carter ni mwananga naba.
32 Ao a riai au tia mwakuri aika Newel Knight ao Selah J. Griffin ni katabuaki, ao ni mwananga naba.
33 Eng, e koaua ae I tuangkami, a riai ni kabane ni mwananga nakon teuana te tabo, ni kawai aika kaokoro, ao temanna e na aki kateitei i aon aan temanna are e bon kateia, ke ni mwananga ni kawain temanna.
34 Ane e kakaonimaki, e na bon kawakinaki ao ni kakabwaiaki ma te uaa ae mwaiti.
35 Ao I a manga tuangkami, e riai au tia mwakuri ae Joseph Wakefield ao Solomon Humphrey ni mwananga nakon aaba ake i mainiku;
36 A riai ni mwakuri ma aia utu, n aki tataekina riki te bwai teuana ma ti burabeti ma abotoro, bwaai ake a tia n noori ao n ongo ao a kakoaua raoi, bwa e aonga ni koro bukin taian taeka ni burabeti.
37 Ibukin riaoan te tua, e riai bwa te bwai are e anganaki Heman Basset e na anaaki mai irouna, ao ni katokaaki i aon atuun Simonds Ryder.
38 Ao e koaua ae I a manga tuangkami, e riai Jared Carter ni katabuaki bwa te ibonga, ao George James ni katabuaki naba bwa te ibonga.
39 A riai nikiraia unimwaane n tararuai mwanga n te ekaretia, ao n taekina te taeka n taabo nako ake a uakaan nakoia; ao a riai ni mwakuri ma oin baia bwa a na akea taromauriaia bouananti ke karaoan ae buakaka.
40 Ao uringiia ni bwaai ni kabane naake akea aia bwai ao kainnano, aoraki ma naake a karawawataaki, bwa ane e aki karaoi bwaai aikai, bon tiaki ngaia au tia reirei.
41 Ao teuana riki, e riai au tia mwakuri ae Iotebwa Timiti te Ataei ao Sidney Rigdon ao Edward Partridge n uota te kariaia man te ekaretia. Ao e riai ni karekeaki teuana ibukin au tia mwakuri ae Oliver Cowdery naba.
42 Ao ngkanne, n aron ae I a tia n taekinna, ngkana kam kakaonimaki kam na ikoikotingkami ni kabane ni kimwareirei i aon te aba ae Missouri, are bon abami ni bwaibwai, are bon abaia ngkai ami kairiribai.
43 Ma, nooria, Ngai, te Uea, N na bareka katean te kaawa n taina, ao ni bauniia naake a kakaonimaki ma te kimwareirei ao te kukurei.
44 Nooria, Boni Ngai Iesu Kristo, Natin te Atua, ao N na uotiia rake n te kabanea ni bong. Eng. Amen.