Mwakoro 30
Kaotioti nakon David Whitmer aika kaotaki rinanon Iotebwa Timiti te Burabeti, Peter Whitmer te Ataei, ao John Whitmer, i Fayette, New York, n Tebetembwa 1830, i mwin te maungatabu are tenibong i Fayette, ma i mwaain are a maenako unimwaanen te Ekaretia. N te moan tai e bon boretiaki bwa teniua kaotioti; e ikotaki nakon teuana te mwakoro iroun te Burabeti ibukin te boki ae Reirei ao Berita aika Tabu ae boretiaki n te 1835.
1–4, E boaaki David Whitmer ibukina bwa e aki beku korakora; 5–8, Peter Whitmer te Ataei e na raona Oliver Cowdery n aia mition nakoia Reimwanaite; 9–11, E weteaki John Whitmer bwa e na tataekina te euangkerio.
1 Noria, I tuangko, David, bwa ko a tia ni maakuia aomata ao n tia n aki onimakinai ibukin te marurung n aron ae ko bon riai.
2 Ma am iango e mena riki i aon bwain te aonaba nakon bwaai ake mai irou, te Tia Karikiko, ao te mwakuri ni ibuobuoki are ko a tia ni weteaki nako iai; ao ko a tia n aki ongo nakon Tamneiu, ao nakoia naake a mena i aom, ma ko a tia ni kakoauaia naake I aki tuangiia.
3 Mangaia are, ko katukaki bwa ko na bubuti nakoiu i bon ibukim, ao ni iangoi bwaai ake ko a tia ni karekei.
4 Ao mwengam bon ana auti tamam, ni karokoa I anganiko tua riki tabeua. Ao ko riai ni karaoi mwakuri n ibuobuoki n te ekaretia, ao i matan te aonaba ao tabo nako ake a uakaan. Amen.
5 Noria, I tuangko, Peter, bwa ko riai ni mwananga ma tarim ae Oliver; bwa e a roko te tai ae e riai irou bwa ko na kaurea wiim n taekina au euangkerio; ngaia are, tai maaku, ma ongo nakon ana taeka ao ana taeka n reirei tarim, are e na anganiko.
6 Ao ni korakai n rawawatana nako, tabekarake nanom nakoiu n te tataro ma te onimaki, ibukin kamaiuakim ma ngaia; bwa I a tia n anganna te mwaaka ni katea au ekaretia i buakoia Reimwanaite;
7 Ao akea ae I a tia n rineia bwa ana tia ibuobuoki i aona n te ekaretia, ni kaineti ma bwain te ekaretia ma tii tarina are Iotebwa Timiti te Ataei.
8 Mangaia are, ongo nakon bwaai aikai ao botumwaaka ni kawakini au tua, ao ko na kakabwaiaaki n te maiu ae akea tokina. Amen.
9 Nooria, I tuangko, au tia mwakuri ae John, bwa ko na moanna man te tai aei ni katanoataa au euangkerio, n ai aron bwanaan te buu.
10 Ao ko na mwakuri iroun tarim ae Philip Burroughs, ao taabo nako ake a uaakan, eng, n taabo ake a na kona n ongo iroum, ni karokoa I tuangko bwa ko na kitana te tabo aei.
11 Ao am mwakuri ni kabane a na mena i Tion, ma tamneim ni kabanea, man te tai aei nakon taai aika a na roko; eng, ko na kaurea wiim ibukin au waaki, n aki maaka te bwai ae kona ni karaoia te aomata, bwa I bon mena iroum. Amen.