Mwakoro 13
Te rongorongo ae anaaki man rongorongon Iotebwa Timiti are taekinaki iai katabuan te Burabeti ao Oliver Cowdery nakon te Nakoanibonga ae te Aaron i rarikin Harmony, Pennsylvania, May 15, 1829. E karaoaki te katabu ni bain te anera are e kaotia bwa ngaia Ioane, are Ioane te Tia Bwabetito n te Nu Tetemanti. E kabwarabwara te anera bwa e karaoia i aan aia kairiiri Betero, Iakobo, ao Ioane, tenaan Abotoro ngkoa, ake a taua kiingin te nakoanibonga ae rietata, are e aranaki bwa te Nakoanibonga ae te Merekitereka. E anganaki te berita Iotebwa ma Oliver bwa n te tai ae riai ao a na anganaki te Nakoanibonga ae te Merekitereka. (Taraa mwakoro 27:7–8, 12.)
A kaotaki kiingin ao mwaakan te Nakoanibonga ae te Aaron.
1 I aomi raou ni mwakuri, n aran te Mesia I anga te Nakoanibonga ae te Aaron, are taui kiingin aia mwakuri n ibuobuoki anera, ao te euangkerio n rairannano, ao te bwabetito ni kateboaki i an te ran ibukin kamaunaan bure; ao aio e na bon aki kona ni manga anaaki man te aonaba, ni karokoa ae a manga anga karea natin Rewi mwaane nakon te Uea n te raoiroi.