Emavi a-Alma, futsi ngalokunjalo nemavi a-Amuleki, lamenyetelwa kubantfu labebaseveni lase-Amoniha. Ngetulu kwaloko baphonswa ejele, futsi bakhishwa ngemandla lamangalisako aNkulunkulu labekakubo, ngekwembhalo wa-Alma.
Itfolakala etehlukweni 9 kuya ku 14.
Sehluko 9
Alma uyaleta bantfu baka-Amoniha kutsi baphendvuke—INkhosi itawuba nemusa kumaLamani ngemalanga ekugcina—Uma emaNefi akulahla kukhanya, atawubhujiswa ngemaLamani—INdvodzana yaNkulunkulu itawubuya masinyane—Itawuhlenga labo labaphendvukako, babhajatiswe, futsi babe nelukholo egameni Layo. Cishe ngemnyaka wema-82 ngaphambi kwekutalwa kwaKhristu.
1 Futsi ngetulu kwaloko, mine, Alma, ngiyaletwe nguNkulunkulu kutsi ngitsatse Amuleki sihambe siphindze sishumayele kulaba bantfu, noma kubantfu labebasedolobheni lase-Amoniha, kwenteka kutsi ngesikhatsi ngicala kushumayela kubo, bacala kuphikisana nami, batsi:
2 Ungubani wena? Ucabanga kutsi tsine sitawukholwa bufakazi bemuntfu munye, noma angasishumayela kutsi umhlaba kumele wendlule na?
3 Manje bebangawacondzi lamavi labebawakhuluma; ngoba bebangati kutsi umhlaba kumele wendlule.
4 Futsi baphindze batsi: Angeke siwakholwe lamavi akho uma ungaphrofetha kutsi lelidolobha lelikhulu lingabhujiswa ngelilanga linye.
5 Manje bebangati kutsi Nkulunkulu bekangayenta imisebenti lemangalisako lenjalo, ngoba bebabantfu labanetinhlitiyo letilukhuni nalabanenkhani.
6 Futsi batsi, Ngubani Nkulunkulu, longasatfumeli ligunya ngaphandle kwemuntfu munye nje emkhatsini walaba bantfu, kutsi amemetele kubo liciniso letintfo letinkhulu kangaka futsi letimangalisako na?
7 Futsi beta ngaphambili kute bangibambe; kodvwa buka, abatange. Ngema ngesibindzi kute ngimemetele kubo, yebo, ngafakaza ngesibindzi kubo, ngatsi:
8 Bukani, O nine situkulwane lesibi nalesiphambene, seniwakhohlwe kanjani emasiko abokhokho benu; yebo, seniyikhohlwe masinyane kanjani imiyaleto yaNkulunkulu na?
9 Anikhumbuli yini kutsi babe, Lehi, wakhishwa eJerusalema ngesandla saNkulunkulu na? Anikhumbuli yini kutsi bonkhe bebaholwa nguye ehlane na?
10 Futsi ngabe senikhohlwe masinyane kangaka kutsi kukangaki abakhulula bokhokho betfu etandleni tetitsa tabo, futsi wabavikela ekubulaweni, nangetandla tabomnakabo lucobo na?
11 Yebo, futsi kube kwakungasiko ngenca yemandla akhe langalinganiswa, kanye nebubele bakhe, kanye nekumela bulukhuni kwakhe kitsi, ngabe sesasuswa ngalokungenakuvimbeleka ebusweni bemhlaba kudzala ngaphambi kwalesi sikhatsi, futsi mhlawumbe ngabe sesayiswa esimeni sekuhlupheka kanye nelusizi lolungapheli.
12 Bukani, manje ngitsi kini uyaniyaleta kutsi niphendvuke; futsi ngaphandle kwekutsi niphendvuke, kute ngisho nalencane indlela yekutsi nidle lifa lembuso waNkulunkulu. Kodvwa bukani, akusiko loku kuphela—uniyalete kutsi niphendvuke, nakungenjalo utawunibhubhisa nya ebusweni bemhlaba; yebo, utawunijezisa ngentfukutselo yakhe, futsi intfukutselo yakhe leyesabekako akanawuyibuyisela emuva.
13 Bukani, aniwakhumbuli yini emavi lawakhuluma kuLehi, latsi: Nangabe niyawuyigcina imiyaleto yami, niyawuphumelela eveni? Kantsi futsi kuyashiwo kutsi: Nangabe ningeke niyigcine imiyaleto yami niyawuhlukaniswa ebukhoneni beNkhosi.
14 Manje ngifuna kutsi nikhumbule, kutsi nangabe emaLamani angayigcinanga imiyaleto yaNkulunkulu, ahlukaniswa phambi kweNkhosi. Manje siyabona kutsi livi leNkhosi licinisekisiwe kulentfo, futsi emaLamani ehlukanisiwe phambi kwakhe, kusukela ekucaleni kwetiphambeko tawo kulelive.
15 Noko ngitsi kini, kuyawubeketeleleka kakhulu kwawo ngelilanga lekwehlulela kunaloku kwenu, uma nihlala etonweni tenu, yebo, futsi kuyawubeketeleleka kakhulu kwawo kulemphilo kunaloku kwenu, ngaphandle kwekutsi niphendvuke.
16 Ngoba kukhona tetsembiso letinyenti letentelwe emaLamani; ngoba kungenca yemasiko abokhokho babo lenta kutsi ahlale kuleso simo sawo sekungati; ngako-ke iNkhosi itawuba nemusa kuwo futsi yelule kuphila kwawo eveni.
17 Futsi ngalesinye sikhatsi lesitsite atawuholelwa ekutseni akholelwe evini layo, futsi ati ngekungalungi kwemasiko abokhokho babo; futsi labanyenti bawo batawusindziswa, ngoba iNkhosi itawuba nemusa kubo bonkhe labo lababita libito layo.
18 Kodvwa bukani, ngitsi kini uma niphikelela ebubini benu emalanga enu angeke aselulwa eveni, ngoba emaLamani ayawutfunyelwa kini; futsi uma ningaphendvuki ayawufika ngesikhatsi leningasati, futsi niyawuvakashelwa ngekubhujiswa lokuphelele; kuyawuba ngekwentfukutselo leyesabekako yeNkhosi.
19 Ngoba angeke inivumele kutsi nihlale ebubini benu, kutsi nibhubhise bantfu bayo. Ngitsi kini, Cha; lokungenani iyawuvumela emaLamani kutsi abhubhise bonkhe bantfu bayo lababitwa ngebantfu baNefi, uma kungenteka kutsi bawele etonweni kanye nasetiphambekweni, emvakwekutsi sebabe nekukhanya kangaka kanye nelwati lolukhulu kangaka lolunikwe bona yiNkhosi Nkulunkulu;
20 Yebo, emvakwekuba bantfu labatsandvwa kakhulu kangaka beNkhosi; yebo, emvakwekutsandvwa ngetulu kwato tonkhe letinye tive, tihlobo, tilimi, noma bantfu; emvakwekutsi sebatiswe tonkhe tintfo, ngekwetifiso tabo, nelukholo lwabo, kanye nemithandazo, loko lokwakukhona, naloko lokukhona, kanye naloko lokusatawukuta;
21 Bavakashelwe nguMoya waNkulunkulu; bakhulumile netingilosi, futsi kukhulunyiwe nabo ngelivi leNkhosi; futsi banemoya wekuphrofetha, kanye nemoya wekwembulelwa, kanjalo netipho letinyenti, sipho sekukhuluma ngetilimi, kanye nesipho sekushumayela, nesipho saMoya loNgcwele, nesipho sekuhumusha;
22 Yebo, futsi emvakwekutsi bakhululwe nguNkulunkulu baphuma eveni laseJerusalema, ngesandla seNkhosi, basindziswe endlaleni, nasekuguleni, kanye nakuto tonkhe tinhlobo tetifo letitinhlobonhlobo; futsi bakhulile bacina ekulweni, kute bangabhujiswa; bakhishwe ebugcilini tikhatsi ngetikhatsi, futsi bagciniwe balondvolotwa kute kube manje; baphumelelisiwe bate banotsa ngato tonkhe tinhlobo tetintfo—
23 Manje bukani ngitsi kini, uma laba bantfu, lesebatfole tibusiso letinyenti kangaka esandleni seNkhosi, bebangaphambuka baphambane nekukhanya kanye nelwati labanalo, ngitsi kini uma loku kungaba njalo, uma bangawela esiphambekweni, kuyawubeketeleleka kakhulu kwemaLamani kunekwabo.
24 Ngoba bukani, tetsembiso teNkhosi tentelwe emaLamani, kodvwa atikentelwa nine uma niphambuka; ngoba iNkhosi ayitsembisanga yini ngalokusobala futsi yamemetela ngalokucinile, kutsi uma nitawuyihlamuka niyawubhujiswa ngalokuphelele emhlabeni na?
25 Manje ngalesi sizatfu, kute ningabhujiswa, iNkhosi itfumele ingilosi yayo kutsi ivakashele bantfu bayo labanyenti, imemetele kubo kutsi kufanele bahambe futsi bakhale kakhulu kulaba bantfu, batsi: Phendvukani, ngoba umbuso welizulu sewusondzele.
26 Futsi akusemalanga lamanyenti kusukela manje kutsi iNdvodzana yaNkulunkulu ifike ngenkhatimulo yayo; futsi inkhatimulo yayo iyawuba yinkhatimulo yaloTelwe Yedvwa kuBabe, logcwele umusa, kulunga, kanye neliciniso, logcwele kubeketela, bubele kanye nekumela bulukhuni, losheshako kuva kukhala kwebantfu bakhe futsi aphendvule imithandazo yabo.
27 Futsi bukani, uta kutawuhlenga labo labatawubhajatiselwa ekuphendvukeni, ngekukholwa egameni lakhe.
28 Ngako-ke, lungisani indlela yeNkhosi, ngoba sikhatsi sesisondzele kutsi bonkhe bantfu bavune umvuzo wemisebenti yabo, ngaloko labebangiko—uma bebalungile bayawuvuna kusindziswa kwemiphefumulo yabo, ngekwemandla kanye nenkhululeko yaJesu Khristu; futsi uma beyimibi bayawuvuna kulahlwa kwemiphefumulo yabo, ngekwemandla kanye nekutfunjwa ngudeveli.
29 Manje bukani, leli livi lengilosi, likhala ebantfwini.
30 Manje, bomnaketfu labatsandzekako, ngoba nibomnaketfu, futsi nimele kutsi nitsandzeke, futsi nimele kutsi niletse imisebenti ledzingekako yekuphendvuka, ngekubona kutsi tinhlitiyo tenu tentiwe taba lukhuni kakhulu ngalokumelene nelivi laNkulunkulu, futsi ngekubona kutsi nibantfu labalahlekile nalabawile.
31 Manje kwenteka kutsi ngesikhatsi mine, Alma, sengiwakhulumile lamavi, buka bantfu bangitfukutselela ngenca yekutsi ngatsi kubo bebabantfu labanetinhlitiyo letilukhuni nalabanenkhani.
32 Futsi ngetulu kwaloko ngenca yekutsi ngatsi kubo bebabantfu labalahlekile futsi labawile bangitfukutselela, bafuna kungibamba, kute bangiphonse ejele.
33 Kodvwa kwenteka kutsi iNkhosi ayibavumelanga kutsi bangitsatse ngaleso sikhatsi bangiphonse ejele.
34 Futsi kwenteka kutsi Amuleki wahamba wema ngaphambili, wacala kushumayela kubo futsi. Manje emavi a-Amuleki akabhalwa onkhe, noko incenye yemavi akhe abhaliwe kulencwadzi.