1 Manje kwenteka kutsi Alma wabuya eveni laGideyoni, emvakwekutsi sekafundzise bantfu baGideyoni tintfo letinyenti letingeke tibhalwe, sekalusungulile luhlelo lwelibandla, njengobe bekentile ngaphambilini eveni laseZarahemla, yebo, wabuyela emtini wakhe eZarahemla kute ayawutiphumuta ekusebenteni labekakwentile.

2 Futsi waphela kanjalo-ke umnyaka wemfica wekubusa kwebehluleli ngetulu kwebantfu baNefi.

3 Futsi kwenteka kutsi ekucaleni kwemnyaka welishumi wekubusa kwebehluleli ngetulu kwebantfu baNefi, Alma wesuka kuleyo ndzawo watsatsa luhambo lwakhe wawelela eveni laseMeleki, enshonalanga yemfula iSidoni, enshonalanga ngaseminceleni yelihlane.

4 Wacala kufundzisa bantfu eveni laseMeleki ngekweluhlelo lolungcwele lwaNkulunkulu, lebekabitwe ngalo; wacala kufundzisa bantfu kulo lonkhe live laseMeleki.

5 Futsi kwenteka kutsi bantfu beta kuye baphuma eminceleni yonkhe yelive lebelingasehlane. Babhajatiswa kulo lonkhe lelo live;

6 Kwatsi uma sekacedzile umsebenti wakhe eMeleki wesuka kuleyo ndzawo, wahamba luhambo lwemalanga lamatsatfu waya ngasenyakatfo yelive laseMeleki; wefika edolobheni lelalibitwa ngekutsi yi-Amoniha.

7 Manje bekulisiko lebantfu baNefi kutsi babite emave abo, nemadolobha abo, kanye netigodzi tabo, yebo, tonkhe tigodzi tabo letincane, ngelibito laloyo wekucala lobekawatsatsile; futsi kwaba kanjalo nangelive lase-Amoniha.

8 Futsi kwenteka kutsi ngesikhatsi Alma sekafikile edolobheni lase-Amoniha wacala kushumayela livi laNkulunkulu kubo.

9 Manje Sathane besekatilawule kakhulu tinhlitiyo tebantfu basedolobheni lase-Amoniha; ngako-ke abafunanga kuwalalela emavi a-Alma.

10 Noko Alma wasebenta kakhulu kumoya, azabalaza naNkulunkulu ngekuthandaza lokukhulu, kute atfululele Moya wakhe etikwebantfu labebakulelidolobha; kute amvumele kutsi ababhabhatisele ekuphendvukeni.

11 Noko batenta lukhuni tinhlitiyo tabo, batsi kuye: Buka, siyati kutsi ungu-Alma; futsi siyati kutsi ungumphristi lomkhulu ngetulu kwelibandla lowalisungula etincenyeni letinyenti telive, ngekwelisiko lakho; asisibo belibandla lakho, futsi asikholelwa emasikweni labulima njengalawa.

12 Futsi siyati kutsi ngenca yekutsi asisibo belibandla lakho siyati kutsi ute emandla ngetulu kwetfu; futsi unike sihlalo sekwehlulela kuNefiha; ngako-ke awusuye umehluleli lomkhulu ngetulu kwetfu.

13 Manje ngesikhatsi bantfu sebakushito loku, bamelana nemavi akhe onkhe, bamtfuka, bamkhafulela ngematse, benta kutsi acoshwe edolobheni labo, wesuka kuleyo ndzawo watsatsa luhambo lwakhe waya ngasedolobheni lelabitwa ngekutsi yi-Aroni.

14 Futsi kwenteka kutsi ngesikhatsi asahamba aya kuleyo ndzawo, esindvwa lusizi, ahlupheke kakhulu futsi adzabukile emphefumulweni, ngenca yebubi bebantfu labebasedolobheni lase-Amoniha, kwenteka kutsi ngesikhatsi Alma esindvwa lusizi, buka ingilosi yenkhosi yavela kuye, yatsi:

15 Ubusisiwe, Alma; ngako-ke, phakamisa inhloko yakho futsi utfokote, ngoba unesizatfu lesikhulu sekutsi utfokote; ngoba utsembekile ekugcineni imiyaleto yaNkulunkulu kusukela ngesikhatsi utfola umlayeto wakho wekucala kuye. Buka, nginguye loyo lowawuletsa kuwe.

16 Futsi buka, ngitfunywe kutsi ngitawukuyaleta kutsi ubuyele edolobheni lase-Amoniha, uphindze ushumayele bantfu balelo dolobha; yebo, utsi kubo, ngaphandle kwekutsi baphendvuke iNkhosi Nkulunkulu itawubabhubhisa.

17 Ngoba buka, benta imetamo ngalesi sikhatsi kute bacedze inkhululeko yebantfu bakho, (ngoba naku lokushiwo yiNkhosi) loko lokuphambene nemitsetfo, kanye netehlulelo, kanye nemiyaleto leyiyinike bantfu bayo.

18 Manje kwenteka kutsi emvakwekutsi Alma sekawutfolile umlayeto wakhe lovela engilosini yeNkhosi wabuyela ngekushesha eveni lase-Amoniha. Wangena edolobheni ngalenye indlela, yebo, ngendlela lebeyingaseningizimu yelidolobha lase-Amoniha.

19 Ngesikhatsi angena edolobheni besekalambile, watsi kulenye indvodza: Ungayipha yini inceku letfobekile yaNkulunkulu lokutsite kute idle na?

20 Futsi lendvodza yatsi kuye: NgingumNefi, ngiyati kutsi ungumphrofethi longcwele waNkulunkulu, ngoba uyindvodza ingilosi lengitjele ngayo embonweni yatsi: Uyawumemukela. Ngako-ke, hamba nami siye endlini yami ngitakunika incenye yekudla kwami; futsi ngiyati kutsi utawuba sibusiso kimi kanye nasemtini wami.

21 Futsi kwenteka kutsi lendvodza yamemukela emtini wayo; lendvodza yayibitwa ngekutsi ngu-Amuleki; yaletsa sinkhwa kanye nenyama yakubeka phambi kwa-Alma.

22 Futsi kwenteka kutsi Alma wadla sinkhwa wesutsa; futsi wambusisa Amuleki kanye nemndeni wakhe, wabonga kuNkulunkulu.

23 Emvakwekutsi sekadlile futsi sekesutsi watsi ku-Amuleki: Ngingu-Alma, ngingumphristi lomkhulu ebandleni laNkulunkulu kulo lonkhe live.

24 Futsi buka, ngibitwe kutsi ngishumayele livi laNkulunkulu emkhatsini wabo bonkhe labantfu, ngekwemoya wekwembulelwa kanye nekuphrofetha; bengikulelive futsi abakangemukeli, kodvwa bangikhiphele ngaphandle futsi besengitolifulatsela lelive ingunaphakadze.

25 Buka, ngiyaletwe kutsi kufanele ngiphindze ngibuyele ngiphrofethe kulaba bantfu, yebo, futsi ngifakaze ngekumelana nabo mayelana nebubi babo.

26 Manje, Amuleki, ngenca yekutsi ungiphile kudla futsi wangingenisa, ubusisiwe; ngoba bengilambile, ngoba bengizilile emalanga lamanyenti.

27 Alma wahlala emalanga lamanyenti na-Amuleki ngaphambi kwekutsi acale kushumayela kubantfu.

28 Futsi kwenteka kutsi bantfu bakhula kakhulu ebubini babo.

29 Futsi livi lafika ku-Alma, litsi: Hamba; uphindze usho encekwini yami Amuleki, kutsi akahambe aphrofethe kulaba bantfu, atsi—Phendvukani, ngoba naku lokushiwo yiNkhosi, ngaphandle kwekutsi niphendvuke ngitawubajezisa laba bantfu ngentfukutselo yami; yebo, futsi anginawuyibuyisela emuva intfuketselo yami leyesabekako kubo.

30 Alma wahamba, na-Amuleki ngalokunjalo, emkhatsini webantfu, kuyawumemetela emavi aNkulunkulu kubo; futsi bagcwaliswa ngaMoya loNgcwele.

31 Futsi baniketwa emandla, kangangekutsi bebangakhoni kuvalelwa emgodzini lolijele; noma kube lula kutsi umuntfu ababulale; noko abatange bawasebentise emandla abo kwate kwaba kungesikhatsi baboshwa ngetibopho baphonswa ejele. Manje, loku kwentelwa kutsi iNkhosi ikhombise emandla ayo kubo.

32 Futsi kwenteka kutsi bahamba bacala kushumayela kanye nekuphrofetha kubantfu, ngekwamoya kanye nemandla iNkhosi lebeyibanike wona.