1 Manje kwenteka kutsi emvakwekutsi Amuleki sekacedzile kukhuluma lamavi, basishiya sicuku babuyela eveni laseJeshoni

2 Yebo, nabo bonkhe labanye bekahamba nabo, emvakwekutsi sebalishumayele livi kumaZoramu, nabo babuyela eveni laseJeshoni.

3 Futsi kwenteka kutsi emvakwekutsi linyenti lemaZoramu lebelatiwa selike lahlangana ndzawonye mayelana nemavi lebekashunyayelwe kubo, latfukutsela ngenca yelivi, ngoba labucedza bucili babo; ngako-ke abafunanga kuwalalela emavi.

4 Batfumela baphindze bagcogcela bonkhe bantfu ndzawonye kulo lonkhe live, babonisana nabo mayelana nalawo mavi lebekakhulunyiwe.

5 Manje babusi babo kanye nebaphristi babo kanye nebafundzisi babo ababatisanga bantfu mayelana netifiso tabo; ngako-ke batitfolela ngasense imibono yebantfu.

6 Futsi kwenteka kutsi emvakwekutsi sebayitfolile imibono yabo bonkhe bantfu, labo labebawatsandza lawo mavi lebekakhulunywe ngu-Alma kanye nabomnakabo bacoshwa bakhishelwa ngaphandle kwelive; bebabanyenti; futsi ngetulu kwaloko bawelela eveni laseJeshoni.

7 Futsi kwenteka kutsi Alma kanye nabomnakabo babafundzisa.

8 Manje bantfu bemaZoramu babatfukutselela bantfu baka-Amoni labebaseJeshoni, futsi umbusi lomkhulu wemaZoramu, angumuntfu lomubi kakhulu, watfumela kubantfu baka-Amoni afuna kutsi babacoshe babakhiphele ngaphandle kwelive bonkhe labo labebabalekele eveni labo.

9 Wabasongela kanyenti. Manje bantfu baka-Amoni abawesabanga emavi abo; ngako-ke abatange babacoshe, kodvwa babemukela bonkhe labamphofu bemaZoramu labeta kubo; babondla, babembatsisa, baphindze babaniketa imihlaba kutsi ibe ngemafa abo; babasita nangekwetifiso tabo.

10 Manje loku ngempela kwawaphehla emaZoramu kutsi abatfukutselele bantfu baka-Amoni, acala kuhlangana nemaLamani futsi bawaphehla nawo kutsi abatfukutselele.

11 Ngaleyo ndlela emaZoramu kanye nemaLamani acala kwenta emalungiselelo emphi kutsi alwe nebantfu baka-Amoni, ngalokunjalo nemaNefi.

12 Waphela kanjalo-ke umnyaka welishumi nesikhombisa wekubusa kwebehluleli ngetulu kwebantfu baNefi.

13 Futsi bantfu baka-Amoni besuka baphuma eveni laseJeshoni, bawelela eveni laseMeleki, banika emabutfo emaNefi indzawo leseveni laseJeshoni, kute alwe nemabutfo emaLamani kanye nemabutfo emaZoramu; ngaleyo ndlela yacala imphi emkhatsini wemaLamani kanye nemaNefi, ngemnyaka welishumi nesiphohlongo wekubusa kwebehluleli; futsi indzaba yetimphi tabo itawunikwa emvakwaloku.

14 Alma na-Amoni, kanye nabomnakabo, ngalokunjalo nemadvodzana lamabili a-Alma babuyela eveni laseZarahemla, emvakwekutsi babe tikhali etandleni taNkulunkulu kuletsa labanyenti bemaZoramu ekuphendvukeni; bonkhe labo labaletfwa ekuphendvukeni bacoshwa baphuma eveni labo; kodvwa banemave langemafa abo eveni laseJeshoni, futsi batsatse tikhali kute bativikele, bavikele nebafati babo, nebantfwana, kanye nemave abo.

15 Manje Alma, akhatsatekile ngenca yebubi bebantfu bakhe, yebo nangetimphi, nangekucitseka kwengati, kanye nangetincabano lebetisemkhatsini wabo; sekalimemetele livi, noma sekatfumele kutsi kumenyetelwe livi, emkhatsini wabo bonkhe bantfu emadolobheni onkhe; abona kutsi tinhlitiyo tebantfu tabese ticala kutsi tibe lukhuni, nekutsi bese bacala kutsi bacansuke ngenca yekucina kwelivi, inhlitiyo yakhe yaba buhlungu kakhulu.

16 Ngako-ke, wenta kutsi emadvodzana akhe agcogcelwe ndzawonye, kute awanike onkhe ngamunye umyaleto wakhe, ngekwehlukana, mayelana netintfo letiphatselene nekulunga. Futsi sinayo indzaba ngemiyaleto yakhe, labaniketa yona ngekwembhalo wakhe.