1 Manje kwenteka kutsi ngesikhatsi Alma ahamba esuka eveni laGideyoni aya ngaseningizimu, aya eveni laseManti, buka, wamangala, asahlangana nemadvodzana aMosiya ahamba aya ngaseveni laseZarahemla

2 Manje lamadvodzana aMosiya bekana-Alma ngesikhatsi ingilosi ifika kuye kwekucala; ngako-ke Alma watfokota kakhulu kubona bomnakabo; futsi lokwangeta kakhulu ekujabuleni kwakhe, bebasengibo bomnakabo eNkhosini; yebo, futsi bekasakhule acina ekwatini liciniso; ngoba bekangemadvodza lanekucondza lokuphelele phindze besekayiphenyisisile imibhalo lengcwele ngekukhutsala, kute alati livi laNkulunkulu.

3 Kodvwa akusiko loku kuphela; besekatinikele ekuthandazeni lokukhulu, kanye nasekuzileni kudla; ngako-ke besekanamoya wekuphrofetha, kanye namoya wekwembulelwa, futsi kwakutsi uma afundzisa, abefundzisa ngemandla kanye nangeligunya laNkulunkulu.

4 Futsi besekafundzise livi laNkulunkulu sikhatsi lesiyiminyaka lelishumi nakune emkhatsini wemaLamani, bekasabe nemphumelelo lenkhulu ekuletseni labanyenti ekwatini liciniso; yebo, ngemandla emavi awo labanyenti baletfwa phambi kwelilati laNkulunkulu, kutsi babite libito lakhe futsi bavume tono tabo phambi kwakhe.

5 Manje leti timo lahlangabetana nato ekuhambeni kwabo, ngoba aba netinhlupheko letinyenti; ahlupheka kakhulu, emtimbeni kanye nasengcondvweni, njengendlala, koma kanye nekukhatsala, kanjalo nekuvivinywa kakhulu emoyeni.

6 Manje loku kuhamba kwawo: Sebamvalelisile uyise, Mosiya, emnyakeni wekucala wekubusa kwebehluleli; awalile umbuso uyise bekanesifiso sekuwuniketa wona, ngetulu kwaloko loku kwakusifiso sebantfu;

7 Noko ahamba aphuma eveni laseZarahemla, atsatsa tinkemba tawo, netikhali tawo, butjoki bawo, nemicibisholo yawo, kanye netilingi tawo; loko akwenta kute atitfolele kudla ngesikhatsi asesehlane.

8 Ahamba kanjalo-ke aya ehlane kanye nesibalo lebekasikhetsile, kutsi bahambe bakhuphukele eveni laNefi, kute bayawushumayela livi laNkulunkulu kumaLamani.

9 Futsi kwenteka kutsi bahamba emalanga lamanyenti ehlane, bazila kudla kakhulu bathandaza kakhulu kutsi iNkhosi ibaphe incenye yaMoya wayo kutsi ahambe nabo, futsi ahlale nabo, kute babe sikhali etandleni taNkulunkulu kutsi baletse, kube bekungenteka, bomnakabo, emaLamani, ekwatini liciniso, ekwatini bubi bemasiko abokhokho babo, labekangakalungi.

10 Futsi kwenteka kutsi iNkhosi yabavakashela ngaMoya wayo, yatsi kubo: Dvudvutekani. Badvudvuteka.

11 INkhosi yaphindze yatsi kubo: Hambani niye emkhatsini wemaLamani, bomnakenu, nicinisekise livi lami; kodvwa nibe nekubeketela ekumeleni bulukhuni kanye netinhlupheko, kute nibonakalise tibonelo letinhle kubo ngami, futsi ngitawunenta sikhali etandleni tami kute kusindziswe bantfu labanyenti.

12 Futsi kwenteka kutsi tinhlitiyo temadvodzana aMosiya, kanjalo nalabo labebanawo, tema sibindzi kutsi bachubekele phambili kuwo emaLamani kute bamemetele kuwo livi laNkulunkulu.

13 Futsi kwenteka kutsi ngesikhatsi sebafike eminceleni yelive lemaLamani, batehlukanisa bahamba ngamunye ngamunye, betsembele eNkhosini kutsi bebatophindze bahlangane futsi ekupheleni kwesivuno sabo; ngoba bebacabanga kutsi wawumkhulu lomsebenti labebatetfwese wona.

14 Futsi ecinisweni wawumkhulu, ngoba bebatetfwese kushumayela livi laNkulunkulu kubantfu labebayimidlwembe balukhuni futsi banesihluku; bantfu labebatfokotiswa kubulala emaNefi, kuwagebenga kanye nekuwaphanga; futsi tinhlitiyo tabo bebatibeke emcebeni, noma kulo ligolide, nesiliva, kanye nakumatje laligugu; kodvwa bebafuna kutitfola leti tintfo ngekubulala kanye nangekuphanga, kute bangatisebenteli ngetandla tabo lucobo.

15 Ngaleyo ndlela bebabantfu labavilaphako kakhulu, labanyenti babo bebakhonta tithico, futsi sicalekiso saNkulunkulu sasiwele etikwabo ngenca yemasiko abokhokho babo, noko tetsembiso teNkhosi tatelulelwe kubo uma baphendvuka.

16 Ngako-ke, loku kwakusizatfu lesenta kutsi emadvodzana aMosiya atetfwese lomsebenti, kute mhlawumbe abaletse ekuphendvukeni; kute mhlawumbe abaletse kutsi bati ngelisu lekuhlengwa.

17 Ngako-ke batehlukanisa lomunye kulomunye, bahamba baya emkhatsini wabo, wonkhe umuntfu ngamunye, ngekwelivi kanye nemandla aNkulunkulu lebekaniketwe kuye.

18 Manje Amoni bekangumholi emkhatsini wabo, noma-ke lokukanye wabasita, futsi wase uyesuka kubo, emvakwekutsi sekababusisile ngekwetikhundla tabo letehlukene, asabelene nabo ngelivi laNkulunkulu, asabasitile ngaphambi kwekuhamba kwakhe; futsi ngaleyo ndlela batsatsa tindlela tabo letehlukene kulo lonkhe live.

19 Futsi Amoni wahamba waya eveni la-Ishmayeli, lelive licanjwe ngelibito lemadvodzana a-Ishmayeli, nawo laba ngemaLamani.

20 Futsi ngesikhatsi Amoni angena eveni la-Ishmayeli, emaLamani amtsatsa ambopha, njengobe bekulisiko labo kutsi babophe onkhe emaNefi labekawele etandleni tawo, bese bayawatfwala bawayisa phambi kwenkhosi; futsi ngalokunjalo kwakuba yintsandvo yenkhosi kutsi ibabulale, noma ibagcine ekutfunjweni, noma ibaphonse ejele, noma ibacoshe baphume eveni layo, ngekwesifiso nangekwentsandvo yayo

21 Ngalokunjalo Amoni wetfwalwa wayiswa phambi kwenkhosi leyayibusa eveni la-Ishmayeli; libito layo bekunguLamoni; futsi beyiyesitukulwane sa-Ishmayeli.

22 Inkhosi yabuta Amoni kutsi ngabe bekusifiso sakhe yini kutsi ahlale eveni emkhatsini wemaLamani, noma emkhatsini webantfu bakhe.

23 Amoni watsi kuyo: Yebo, ngifisa kutsi ngihlale emkhatsini walaba bantfu kwesikhashana; yebo, mhlawumbe kute kube lilanga lekufa kwami.

24 Futsi kwenteka kutsi inkhosi Lamoni yatfokota kakhulu nga-Amoni, yenta kutsi tibopho takhe ticekiswe; futsi yayifuna nekutsi Amoni atsatse yinye yemadvodzakati ayo abe ngumkakhe.

25 Kodvwa Amoni watsi kuyo: Cha, kodvwa ngitawuba yinceku yakho. Ngako-ke Amoni waba yinceku yenkhosi Lamoni. Futsi kwenteka kutsi wabekwa emkhatsini waletinye tinceku kutsi agadze imfuyo yaLamoni, ngekwelisiko lemaLamani.

26 Emvakwekutsi sekasebentele inkhosi emalanga lamatsatfu, ngesikhatsi anetinceku letingemaLamani basahamba nemihlambi yabo baya endzaweni yemanti, leyayibitwa ngekutsi ngemanti aseSebusi, futsi onkhe emaLamani bekachuba imihlambi yawo lapho, kute itfole emanti—

27 Ngako-ke, ngesikhatsi Amoni kanye netinceku tenkhosi basachuba imihlambi yabo baya kuleyo ndzawo yemanti, buka, sibalo lesitsite semaLamani, labekanemihlambi yawo emantini, ema aphindze ahlakata imihlambi ya-Amoni netinceku tenkhosi, ayihlakata kangangekutsi yabaleka ngetindlela letinyenti.

28 Manje tinceku tenkhosi tacala kuvungama, titsi: Manje inkhosi itawusibulala, njengobe yenta kubomnaketfu ngenca yekutsi imihlambi yabo yayihlakatiwe ngebubi balamadvodza. Futsi tacala takhihla sililo lesikhulu, titsi: Bukani, imihlambi yetfu vele seyihlakatiwe.

29 Manje bakhihla sililo ngenca yekwesaba kubulawa. Manje ngesikhatsi Amoni akubona loku inhlitiyo yakhe yagcwala injabulo; ngoba, watsi, ngitawubakhombisa emandla ami laba balingani bami, noma emandla lakimi, ngekubuyisela lemihlambi enkhosini, kute ngizuze tinhlitiyo talaba balingani bami, kute ngibaholele ekukholweni emavini ami.

30 Manje, loku bekuyimicabango ya-Amoni, ngesikhatsi abona tinhlupheko talabo labekababita ngekutsi bomnakabo.

31 Futsi kwenteka kutsi wabancenga ngemavi akhe, watsi: Bomnaketfu, manini sibindzi asihambeni siyawufuna imihlambi, sitawuyigcogca ndzawonye siyibuyisele endzaweni yemanti; ngaleyo ndlela sitawuyigcinela inkhosi imihlambi yayo futsi angeke isibulale.

32 Futsi kwenteka kutsi bahamba bayawuyifuna imihlambi, bamlandzela Amoni, baphutfuma baya embili ngekushesha lokukhulu bayijikisa imihlambi yenkhosi, baphindze bayigcogca ndzawonye endzaweni yemanti.

33 Futsi lawo madvodza aphindze ema kute ayihlakate imihlambi yabo; kodvwa Amoni watsi kubomnakabo: Tungeletani lemihlambi ndzawo tonkhe kute ingabaleki; mine ngitawuhamba ngiyawukulwa nalamadvodza lahlakata imihlambi yetfu.

34 Ngako-ke, benta njengobe Amoni abebayaletile, yena wahamba waya ngembili wayawukulwa nalabo labebeme ngasemantini aseSebusi; futsi ngesibalo bebangasibo labancane.

35 Ngako-ke abamesabanga Amoni, ngoba bebacabanga kutsi munye wabo bekangambulala ngekwentsandvo yabo, ngoba bebangati kutsi iNkhosi yayimtsembisile Mosiya kutsi iyawuwakhulula emadvodzana akhe etandleni tawo; futsi bebangati lutfo mayelana neNkhosi; ngako-ke bebatfokota ekubhujisweni kwabomnakabo; futsi ngalesi sizatfu bema kute bahlakate imihlambi yenkhosi.

36 Kodvwa Amoni wema ngembili wacala kubashaya ngematje ngesilingi sakhe; yebo, ngemandla akhe lamakhulu wabajikijela ngematje; ngaleyo ndlela wabulala linani lelitsite lawo kangangekutsi acala kwetfuswa ngemandla akhe; noko atfukutsela ngenca yekubulawa kwabomnakabo, futsi aphikelela afuna kutsi awe; ngako-ke, abona kutsi abengakhoni kumshaya ngematje awo, eta kuye netagila atombulala.

37 Kodvwa buka, wonkhe umuntfu lobekaphakamisa sagila sakhe kutsi ashaye Amoni, wamshaya wamsusa umkhono wakhe ngenkemba yakhe; ngoba wamelana nekushaywa ngiwo ngekuwashaya imikhono yawo ngeluhlangotsi lolukhaliphile lwenkemba yakhe, kangangekutsi acala kwetfuka, aphindze acala kumbalekela; yebo, futsi abengasiwo lamancane ngekwesibalo; futsi wenta kutsi abaleke ngemandla emkhono wakhe.

38 Manje labasitfuba babo bese bawile ngesilingi, kodvwa akabulalanga namunye ngaphandle kwemholi wabo ngenkemba yakhe; futsi wabashaya wabancuma imikhono yabo labanyenti labayiphakamisela kuye, futsi bebangasibo labambalwa.

39 Ngesikhatsi asawachubile wawayisa khashane, wabuya futsi banatsisa imihlambi yabo bayibuyisela emadlelweni enkhosi, emvakwaloko bahamba baya enkhosini, betfwele imikhono leyayincunywe ngenkemba ya-Amoni, yalabo labebafuna kumbulala; yatfwalwa yayiswa enkhosini kutsi ibe bufakazi betintfo labebatentile.