1 Manje kwenteka kutsi ngesikhatsi Moroni sekatfole lencwadzi watfukutsela kakhulu, ngoba bekati kutsi Amoroni bekanelwati loluphelele ngenkhohliso yakhe; yebo, bekati kutsi Amoroni bekanelwati kutsi bekungasiso sizatfu lesilungile lebesimente walwa imphi ngalokumelene nebantfu baNefi.

2 Watsi: Buka, angeke ngishintjiselane ngetiboshwa na-Amoroni ngaphandle kwekutsi ahocise lenhloso yakhe, njengobe ngichazile encwadzini yami; ngoba angeke ngivume kutsi abe nalamanye emandla ngetulu kwalawa lanawo.

3 Buka, ngiyayati indzawo lapho emaLamani agadza khona bantfu bami lababatsetse babenta tiboshwa; futsi njengobe Amoroni angatungivumela ngekwencwadzi yami, buka, ngitawukwenta kuye njengekwemavi ami; yebo, ngitawufuna kufa emkhatsini wabo baze bacele kuthula.

4 Manje kwenteka kutsi ngesikhatsi Moroni sekawashito lamavi, wenta kutsi kwentiwe luphenyo emkhatsini wemadvodza akhe, kute mhlawumbe atfole indvodza lebeyisitukulwane saLamani emkhatsini wabo.

5 Futsi kwenteka kutsi bamtfola munye, libito lakhe lobekunguLamani; futsi bekangulomunye wetinceku tenkhosi lebeyibulewe ngu-Amalikhiya.

6 Manje Moroni wenta kutsi Lamani kanye nemadvodza akhe lamancane ngesibalo bahambe baye kubogadzi labebagadze emaNefi.

7 Manje emaNefi bekagadvwe edolobheni laGidi; ngako-ke Moroni wabeka Lamani futsi wenta kutsi emadvodza lamancane ngesibalo ahambe naye.

8 Ngesikhatsi sekuhlwile Lamani waya kubogadzi labebagadze emaNefi, buka, bambona eta bambingelela, kodvwa watsi kubo: Ningesabi; bukani, ngingumLamani. Bukani, secile kumaNefi, futsi alele; bukani sitsetse liwayini labo seta nalo.

9 Manje ngesikhatsi emaLamani eva lamavi amemukela ngenjabulo; atsi kuye: Sinikeni liwayini lenu, kute sinatse; siyatfokota kutsi niphatse liwayini ngoba sikhatsele.

10 Kodvwa Lamani watsi kubo: Asiligcine lelinye liwayini letfu size siyawukulwa nemaNefi. Kodvwa lenkhulumo yabenta kutsi bafise kakhulu kulinatsa liwayini.

11 Ngoba, batsi: Sikhatsele, ngako-ke asilinatse leliwayini, futsi masinyane nje bese sesitfola sabelo seliwayini letfu, leselitawusicinisa kute siyawukulwa nemaNefi.

12 Lamani watsi kubo: Ningenta njengekwetifiso tenu.

13 Futsi kwenteka kutsi balinatsa liwayini ngekukhululeka; futsi belinambitseka kamnandzi, ngako-ke balinatsa ngekukhululeka lokukhulu; futsi belidzakisa, ngoba belilungiselwe kutsi libe nemandla.

14 Futsi kwenteka kutsi balinatsa batfokota, kwatsi masinyane nje besebadzakwe bonkhe.

15 Manje ngesikhatsi Lamani kanye nebantfu bakhe babona kutsi bonkhe bese badzakiwe, futsi sebasebutfongweni lobujulile, babuyela kuMoroni bayomtjela tonkhe tintfo lebetentekile.

16 Manje loku kwenteka njengelicebo laMoroni. Futsi Moroni besekawalungiselele onkhe emadvodza akhe ngetikhali temphi; wahamba waya edolobheni iGidi, ngesikhatsi emaLamani asebutfongweni lobujulile futsi adzakiwe, wefike waphonsa tikhali temphi etiboshweni, kangangekutsi tonkhe tahloma.

17 Yebo, ngisho nebesifazane babo, kanye nabo bonkhe bantfwana babo, bonkhe labo labebangakhona kusebentisa tikhali temphi, ngesikhatsi Moroni ahlomisa tonkhe leto tiboshwa; tonkhe leto tintfo tentiwa ngekuthula lokukhulu.

18 Kodvwa kube bebawavusile emaLamani, buka bekadzakiwe futsi emaNefi bekangawabulala.

19 Kodvwa buka, loku bekungasiso sifiso saMoroni; bekangakujabuleli kubulala noma kucitsa ingati, kodvwa bekajabulela kusindzisa bantfu bakhe ekubhujisweni; futsi ngalesi sizatfu bekangeke aletse kuye kwehlulela ngalokungalungi, bekangeke awele etikwemaLamani awabulale adzakiwe.

20 Kodvwa besekatifezile tifiso takhe; ngoba besekatihlomisile leto tiboshwa temaNefi lebetingekhatsi kwetindvonga telidolobha, futsi besekatinike emandla ekutsatsa leto tincenye lebetingekhatsi kwetindvonga.

21 Emvakwaloko wenta kutsi lawo madvodza labekanawo ahlehle libangana kusuka kubo, bese atungeleta emabutfo emaLamani.

22 Manje buka loku kwenteka ngesikhatsi sasebusuku, kangangekutsi ngesikhatsi emaLamani avuka ekuseni abona kutsi besekatungeletwe ngemaNefi ngaphandle, futsi tiboshwa tawo bese tihlomile ngekhatsi.

23 Ngaleyo ndlela abona kutsi emaNefi besekanemandla etikwawo; futsi kuletitimo atfola kutsi bekungasadzingeki kutsi alwe nemaNefi; ngako-ke tindvuna tawo letinkhulu tafuna tikhali tabo temphi, futsi tatiletsa phambili tatiphonsa phansi etinyaweni temaNefi, titicelela bubele.

24 Manje buka, loku bekusifiso saMoroni, wawatsatsa wawenta tiboshwa temphi, futsi walitsatsa lidolobha, wenta kutsi tonkhe tiboshwa tikhululwe, lebetingemaNefi; tahlangana nelibutfo laMoroni, futsi tafaka emandla lamakhulu ebutfweni lakhe.

25 Futsi kwenteka kutsi wenta kutsi emaLamani, labekawente tiboshwa, acale umsebenti wekucinisa tincaba etindzaweni tonkhe telidolobha iGidi.

26 Futsi kwenteka kutsi ngesikhatsi sekalicinisile lidolobha iGidi, njengekwetifiso takhe, wenta kutsi tiboshwa takhe titsatfwe tiyiswe edolobheni iNala; ngetulu kwaloko waligadza lelo dolobha ngelibutfo lelinemandla lamakhulu.

27 Futsi kwenteka kutsi, nanoma kungenca yemacebo onkhe angasense emaLamani, atigcina futsi ativikela tonkhe tiboshwa lebekatitsetse, ngetulu kwaloko awugcina wonkhe umhlaba kanye nekuzuza lebesebaphindze bakutsatsa.

28 Futsi kwenteka kutsi emaNefi acala kuncoba futsi, aphindze afuna emalungelo kanye netimfanelo tawo.

29 Tikhatsi letinyenti emaLamani etama kubatungeleta ebusuku, kodvwa kulemetamo alahlekelwa tiboshwa letinyenti.

30 Futsi sikhatsi lesinyenti etama kuniketa lelinye lemawayini abo kumaNefi, kute bawabulale ngebutsi noma ngekuwadzakisa.

31 Kodvwa buka, emaNefi bekangaphuti kuyikhumbula iNkhosi Nkulunkulu wawo kulesi sikhatsi sawo senhlupheko. Bebangenawutifaka elugibeni; yebo, akalinatsanga liwayini lawo, ngaphandle kwekutsi balinikete kucala letinye tetiboshwa temaLamani.

32 Futsi ngaleyo ndlela bebacaphele kutsi kubebete butsi lobebungafakelwa bona; ngoba uma liwayini labo belingaba ngushevu kumLamani belingaba ngushevu futsi nakumNefi; futsi babuhlola ngaleyo ndlela bonkhe tjwala bawo.

33 Manje kwenteka kutsi kwaba nesidzingo sekutsi Moroni ente emalungiselelo ekuhlasela lidolobha iMoriyantoni; ngoba buka, emaLamani, ngekwemisebenti yawo, besekalicinisile lidolobha iMoriyantoni late laba yincaba lecine kakhulu.

34 Futsi bekachubeka nekuletsa emabutfo lamasha kulelo dolobha, futsi kanjalo nemiphako lemisha.

35 Waphela kanjalo-ke umnyaka wemashumi lamabili nemfica wekubusa kwebehluleli kubantfu baNefi.