1 Manje bekusemtsetfweni waMosiya kutsi wonkhe umuntfu lobekangumehluleli wemtsetfo, noma labo labebabekwe kutsi babe behluleli, batfole inkhokhelo ngekwesikhatsi leso labebasisebentile kwehlulela labo labebaletfwe phambi kwabo kutsi behlulelwe.

2 Manje uma umuntfu akweleta lomunye, futsi ala kubhadala loko lakukweletako, bekamangalelwa kumehluleli; bese umehluleli usebentisa ligunya, atfumele tindvuna kutsi loyo muntfu aletfwe phambi kwakhe; bese yena wehlulela lomuntfu ngekwemtsetfo kanye nangebufakazi lobo lobabuletfwa ngekumelana naye, futsi ngaleyo ndlela umuntfu bekaphoceleleka kutsi abhadale loko lakukweletako, noma emukwe loko lanako, noma alahlwe ngaphandle aphume emkhatsini webantfu njengelisela nesigebengu.

3 Bese umehluleli utfola inkhokhelo yakhe ngekwesikhatsi sakhe—isenine yeligolide ngelilanga, noma isenumu yesiliva, lelingana nesenine yeligolide; futsi loku bekwentiwa ngekwemtsetfo lobekiwe.

4 Manje lawa ngemagama etinhlobo letehlukene tetincetu teligolide labo, kanye nesiliva yabo, ngekwelinani lato. Futsi emagama anikwa ngemaNefi, ngoba wona awatange abale ngendlela yemaJuda labekaseJerusalema; noma alinganise ngendlela yemaJuda; kodvwa wona akugucula kubala kanye nekulinganisa kwawo, ngekwemicondvo kanye netimo tebantfu, kuto tonkhe titukulwane, kwate kwaba kubusa kwebehluleli, bona bamiswe yinkhosi Mosiya.

5 Manje kubala kukanje—isenine yeligolide, iseyoni yeligolide, ishumi yeligolide, kanye nelimna yeligolide.

6 Isenumu yesiliva, i-amnori yesiliva, i-ezromu yesiliva, kanye ne-onti yesiliva.

7 Isenumu yesiliva yayilingana nesenine yeligolide, futsi kona ngakunye kwakungangesilinganiso sebhali, ngetulu kwaloko kwakungangesilinganiso sayo yonkhe inhlobo yalokuyinhlavu.

8 Manje linani leseyoni yeligolide laliphindvwa kabili kulo linani lesenine.

9 Ishumi yeligolide yayiphindvwa kabili kulo linani leseyoni.

10 Ilimna yeligolide yayilinani lako konkhe.

11 I-amnori yesiliva yayiyinkhulu ngangemasenumu lamabili.

12 I-ezromu yesiliva yayiyinkhulu ngangemasenumu lamane.

13 Futsi i-onti yayiyinkhulu ngetulu kwato tonkhe.

14 Manje loku linani lesibalo lesincane sekubala kwabo—

15 Ishibloni yincenye yesenumu; ngako-ke, ishibloni ingangencenye yesilinganiso sebhali.

16 Ishiblumu iyincenye yeshibloni.

17 Ileya iyincenye yeshiblumu.

18 Manje sibalo sabo lesi, ngekwekubala kwabo.

19 Manje i-antiyoni yeligolide ilingana nemashibloni lamatsatfu,

20 Manje, loku kwakungenhloso yekutsi bazuze nje kuphela, ngenca yekutsi bebatfola inkhokhelo yabo ngekusebenta kwabo, ngako-ke, babaphehla bantfu kutsi kube khona lutfutfuva, kanye nayo yonkhe inhlobo yekuphatamiseka kanye nenkhohlakalo, kute babe nemsebenti lomnyenti, batfole imali ngekwemacala labekaletfwa kubo; ngako-ke babaphehla bantfu ngekumelana na-Alma kanye na-Amuleki.

21 Futsi lo Zezromu wacala kubuta Amuleki, watsi: Ungangiphendvula yini imibuto lemibalwa lengitawuyibuta kuwe na? Manje Zezromu bekayindvodza lenguchwephesha emachingeni adeveli, kute abhubhise loko lokwakukuhle; ngako-ke, watsi ku-Amuleki: Ungayiphendvula yini imibuto lengitawuyibhekisa kuwe na?

22 Amuleki watsi kuye: Yebo, uma kungekwaMoya weNkhosi, lokimi; ngoba angeke ngisho lutfo loluphambene naMoya weNkhosi. Futsi Zezromu watsi kuye: Buka, nankha ema-onti lasitfupha esiliva, futsi onkhe lawa ngitawukunika wona uma nje ungaphika bukhona baloNgetulu Kwako konkhe.

23 Manje Amuleki watsi: O mntfwana wesihogo, ungilingelani na? Awati yini kutsi labalungile abatinikeli etilingweni letinjengaleti na?

24 Uyakholwa yini kutsi Nkulunkulu kute na? Ngitsi kuwe, Cha, uyati kutsi Nkulunkulu ukhona, kodvwa utsandza leyo mali kakhulu kunaye.

25 Manje ucale emanga kimi phambi kwaNkulunkulu. Utsite kimi—Buka lama-onti lasitfupha, langelinani lelikhulu, ngitawukunika wona—ube wati kahle enhlitiyweni yakho kutsi utawuwagodla unganginiki; futsi bekusifiso sakho nje kuphela kutsi mine ngiphike Nkulunkulu weliciniso nalophilako, kute ube nesizatfu sekungibulala. Manje buka, ngenca yalobubi lobukhulu utawutfola umvuzo wakho.

26 Zezromu watsi kuye: Utsi ukhona Nkulunkulu weliciniso nalophilako na?

27 Amuleki watsi: Yebo, ukhona Nkulunkulu weliciniso nalophilako.

28 Manje Zezromu watsi: Ngabe bakhona yini labanye ngaphandle kwaNkulunkulu munye na?

29 Waphendvula watsi, Cha.

30 Manje Zezromu waphindze watsi kuye: Utati kanjani leti tintfo na?

31 Watsi: Ingilosi ingatise tona.

32 Zezromu waphindze watsi: Ngubani yena lona loyawuta na? Ngabe yiNdvodzana yaNkulunkulu?

33 Watsi kuye, Yebo.

34 Zezromu waphindze watsi: Ngabe uyawubasindzisa yini bantfu bakhe etonweni tabo na? Amuleki waphendvula futsi watsi kuye: Ngitsi kuwe angeke, ngoba akakwati kutsi aphikise livi lakhe.

35 Manje Zezromu watsi kubantfu: Bonani kutsi niyatikhumbula leti tintfo; ngoba utse munye kuphela Nkulunkulu; kodvwa futsi utsite iNdvodzana yaNkulunkulu iyawuta, kodvwa angeke ibasindzise bantfu bayo—usho shangatsi uneligunya lekuyaleta Nkulunkulu.

36 Manje Amuleki waphindze watsi kuye: Buka ucala emanga, ngoba utsi ngikhulume shangatsi ngineligunya lekuyaleta Nkulunkulu ngoba ngitsite angeke abasindzise bantfu bakhe etonweni tabo.

37 Futsi ngiyaphindza ngitsi kuwe angeke abasindzise etonweni tabo; ngoba angeke ngiliphikise livi lakhe, futsi utsite kute intfo lengcolile lengadla lifa lembuso welizulu; ngako-ke, ningasindziswa kanjani, ngaphandle kwekutsi nidle lifa lembuso welizulu na? Ngako-ke angeke nisindziswe nisetonweni tenu.

38 Manje Zezromu waphindze watsi kuye: Ngabe iNdvodzana yaNkulunkulu ngiyo cobolwayo yini Babe waPhakadze?

39 Futsi Amuleki watsi kuye: Yebo, inguye kanye Babe waPhakadze welizulu nemhlaba, kanye nato tonkhe tintfo letikuwo; isicalo kanye nesiphetfo, yekucala neyekugcina.

40 Futsi iyawuta emhlabeni kutawuhlenga bantfu bayo; iyawutfwala tiphambeko talabo labakholwa egameni layo; futsi ngibo labo labayawuba nekuphila lokuphakadze, futsi insindziso ayiti kulomunye.

41 Ngako-ke lababi bahlala shangatsi akutange kube khona kuhlengwa lokwentiwe, ngaphandle kwekutsi kube kucekiswa kwetibopho tekufa; ngoba bukani, lilanga liyeta lapho bonkhe bayawuvuka ekufeni baphindze beme phambi kwaNkulunkulu, behlulelwe ngekwemisebenti yabo.

42 Manje, kukhona kufa lokubitwa ngekutsi kufa kwesikhashana; kufa kwaKhristu kuyawucekisa tibopho taloku kufa kwesikhashana, kute bonkhe bavuswe ekufeni kwesikhashana.

43 Umoya kanye nemtimba kuyawuhlanganiswa futsi kube sesimeni sako lesiphelele; titfo kanye nemalunga kuyawubuyiselwa esicwini sako lesiphelele, njengobe sinje manje kulesi sikhatsi; futsi siyawuletfwa sime phambi kwaNkulunkulu, sati njengaloku sati manje, futsi siyawuwakhumbula ngalokucacile onkhe emacala etfu.

44 Manje, loku kubuyiselwa kuyawuta kubo bonkhe bantfu, lomdzala kanye nalomncane, loboshiwe nalokhululekile, wesilisa newesifazane, lababi nalabalungile; futsi kute nalunye lunwele lwetinhloko tabo loluyawulahleka; kodvwa tonkhe tintfo tiyawubuyiselwa esicwini sato lesiphelele, njengobe kunjalo manje, noma emtimbeni, futsi tiyawuletfwa tibekwe licala phambi kwesihlalo saKhristu iNdvodzana, kanye naNkulunkulu Babe, kanye naMoya loNgcwele, longuNkulunkulu munye waPhakadze, kute tehlulelwe ngekwemisebenti yato, noma ngabe mihle noma ngabe mibi.

45 Manje, bukani, sengikhulumile kini mayelana nekufa kwemtimba lobhubhako, nangekuvuswa kwemtimba lobhubhako. Ngitsi kini lomtimba lobhubhako uvuselwa emtimbeni longabhubhi, lokungukutsi usuka ekufeni kusukela ekufeni kwekucala kuya ekuphileni, kute ingabe isafa futsi; imimoya yabo ihlangana nemitimba yabo, ingaphindzi yehlukaniswe futsi; ngaleyo ndlela konkhe kube ngumtimba wemoya kanye nalongabhubhi, kute ingabe isakubona futsi kubola.

46 Manje, ngesikhatsi Amuleki asacedzile kusho lamavi bantfu bacala futsi kumangala, ngalokunjalo naZezromu wacala kuchachatela. Aphela kanjalo-ke emavi a-Amuleki, noma nguloku kuphela lengikubhalile.