1 Futsi kwenteka kutsi babeka bogadzi etikwetiboshwa temaLamani, batiphoca kutsi tihambe tiyongcwaba labafile bato, yebo, ngalokunjalo nalabafile bemaNefi labebabulewe; futsi Moroni wabeka emadvodza etikwato kutsi atigadze ngesikhatsi tenta umsebenti wato.

2 Moroni wahamba waya edolobheni laMuleki anaLehi, watsatsa sikhundla sekuphatfwa kwelidolobha wasinika Lehi. Manje buka, lo Lehi bekayindvodza lebeyinaMoroni esikhatsini lesinyenti setimphi takhe tonkhe; futsi bekayindvodza lebeyifana naMoroni, batfokota ngekuphepha kwalomunye nalomunye; yebo, bebatsandzana, futsi batsandvwa bantfu bonkhe baNefi.

3 Futsi kwenteka kutsi emvakwekutsi emaLamani sekacedzile kungcwaba labafile babo ngalokunjalo nalabafile bemaNefi, ahanjiswa abuyiselwa emuva eveni iNala; futsi Theyankhumi, ngemiyaleto yaMoroni, wenta kutsi acale kusebenta agubhe umsele atungelete live, noma lidolobha, iNala.

4 Wenta kutsi akhe ludvonga lwemapulango elusentseni ngekhatsi kwemsele; akhiphe umhlabatsi emseleni awujike ngale kweludvonga lwemapulango; futsi benta kutsi emaLamani asebente ngalendlela ate alitungelete lidolobha iNala atungelete ngelubondza lolucinile lwemapulango kanye nemhlabatsi, lobekufika etulu kakhulu.

5 Lelidolobha laba yincaba lecine kakhulu emvakwaloko; futsi kulelidolobha batigadza tiboshwa temaLamani; yebo, ngisho nangekhatsi kweludvonga labebatente kutsi tilwakhe ngetandla tato lucobo. Manje Moroni bekaphocelelekile kutsi ente emaLamani kutsi asebente, ngoba bekulula kutsi agadvwe ngesikhatsi asemsebentini wawo; futsi bekafisa kuba nemabutfo akhe onkhe uma ahlasela emaLamani.

6 Futsi kwenteka kutsi Moroni ngaleyo ndlela besekatfole kuncoba ngetulu kwalelinye lemabutfo lamakhulu lemaLamani, sekalitsetse lidolobha laMuleki, lebelingulelinye letincaba temaLamani lebeticinile eveni laNefi; futsi ngaleyo ndlela besekakhe incaba lecinile kutsi agcine tiboshwa takhe.

7 Futsi kwenteka kutsi akatange asenta imetamo nanini yekulwa nemaLamani kulowo mnyaka, kodvwa wasebentisa bantfu bakhe kulungiselela imphi, yebo, kanye nekwenta tincaba leticinile tekuvimbela emaLamani, yebo, futsi kanjalo nekukhulula bafati babo kanye nebantfwana babo endlaleni kanye nasenhluphekweni, kanye nekuniketa kudla emabutfo akhe.

8 Manje kwenteka kutsi emabutfo emaLamani, elwandle lolusenshonalanga, eningizimu, ngesikhatsi Moroni angekho ngenca yesento sangasense sekuhlubuka emkhatsini wemaNefi, lokwadala kungevani emkhatsini wabo, kwenta kutsi awazuze ngendlela letsite emaNefi, yebo, kangangekutsi besekatsetse emadolobha awo lamanyenti kuleyo ncenye yelive.

9 Ngako-ke ngenca yebubi emkhatsini wabo, yebo, ngenca yekuphikisana kanye nesento sangasense sekuhlubuka emkhatsini wabo batitfola sebasetimeni letiyingoti kakhulu.

10 Manje buka, nginentfo letsite lekumele ngiyisho mayelana nebantfu ba-Amoni, labo, ekucaleni, labebangemaLamani; kodvwa nga-Amoni kanye nabomnakabo, noma-ke ngemandla kanye nangelivi laNkulunkulu, base bagucukele eNkhosini; baletfwa entansi eveni laseZarahemla, futsi kusukela ngaleso sikhatsi seloku bavikelwa ngemaNefi.

11 Futsi ngenca yesifungo sabo bavinjelwa ngiso kutsi batsatsele bomnakabo tikhali; ngoba bebente sifungo sekutsi abasayuphindze nanini bayicitsa ingati; futsi ngekwesifungo sabo bebayawufa; yebo, bebayawutivumela kutsi bawele etandleni tabomnakabo, kube kungasiko kutsi bekungenca yesihawu kanye nelutsandvo lolukhulu Amoni kanye nemnakabo labebanalo ngabo.

12 Futsi ngalesi sizatfu baletfwa eveni laseZarahemla; futsi seloku bavikelwa ngemaNefi njalo.

13 Kodvwa kwenteka kutsi ngesikhatsi babona ingoti, netinhlupheko letinyenti kanye netinsizi emaNefi labekatitfwalela bona, batsintseka ngebubele futsi babanesifiso sekutsatsa tikhali kutsi bavikele live labo.

14 Kodvwa buka, ngesikhatsi sebatawutsatsa tikhali temphi tabo, behlulwa kuhehwa nguHelamani kanye nabomnakabo, ngoba bese batawusephula sifungo lebebasentile.

15 Futsi Helamani bekesaba funa ngekwenta njalo balahlekelwe yimiphefumulo yabo; ngako-ke bonkhe labo labebangene kulesi sivumelwano baphoceleleka kutsi babuke bomnakabo bendlula kamatima etinhluphekweni tabo, etimeni tabo letiyingoti ngalesi sikhatsi.

16 Kodvwa buka, kwenteka kutsi bebanemadvodzana lamanyenti, labekangangenanga esivumelwaneni sekutsi angeke atsatse tikhali tawo temphi kute ativikele etitseni tawo; ngako-ke abutsana ndzawonye ngalesi sikhatsi, bonkhe labo labebangakhona kutitsatsa tikhali, futsi batibita ngekutsi bangemaNefi.

17 Futsi bangena esivumelwaneni sekutsi balwele inkhululeko yemaNefi, yebo, kutsi bavikele live ngekunikela ngetimphilo tabo; yebo, ngisho nabo benta sivumelwano sekutsi abayuze balahle inkhululeko yabo, kodvwa bayawukulwa tikhatsi tonkhe kuvikela emaNefi kanye nabo ebugcilini.

18 Manje bukani, bekukhona tinkhulungwane letimbili talawo majaha, lebetingene kulesi sivumelwano futsi tatsatsa tikhali tato temphi kuvikela live lato.

19 Manje buka, njengobe betingakate nanini timise kabi emaNefi, manje ngalesi sikhatsi taba lusito lolukhulu; ngoba tatsatsa tikhali tato temphi, futsi tafuna kutsi Helamani abe ngumholi wato.

20 Bonkhe bebangemajaha, bangemachawe lamakhulu ngekwesibindzi, futsi ngalokunjalo nangekwemandla kanye nangekusebenta; kodvwa buka, loku bekungasiko kuphela—bebangemadvodza labekaneliciniso ngaso sonkhe sikhatsi kuko konkhe lebebaphatsiswe kona ngekwetsenjwa.

21 Yebo, bebangemadvodza laneliciniso nalanebucotfo, ngoba bebafundziswe kutsi bayigcine imiyaleto yaNkulunkulu kanye nekuhamba ngebucotfo phambi kwakhe.

22 Manje kwenteka kutsi Helamani wawahola emajaha akhe labekatinkhulungwane letimbili temasotja, wayawusekela bantfu eminceleni yelive eningizimu ngaselwandle lolungasenshonalanga.

23 Futsi waphela kanjalo-ke umnyaka wemashumi lamabili nesiphohlongo wekubusa kwebehluleli kubantfu baNefi.