1 O kube bengiyingilosi, ngitfole sifiso senhlitiyo yami, sekutsi ngihambe ngikhulume ngelicilongo laNkulunkulu, ngelivi lekunyakatisa umhlaba, futsi ngimemetele kuphendvuka kubo bonkhe bantfu.

2 Yebo, bengitawumemetela kuwo wonkhe umphefumulo, njengelivi lekudvuma, kuphendvuka kanye nelisu lekuhlengwa, kutsi abaphendvuke futsi bete kuNkulunkulu wetfu, kute kungasabikhona lusizi lolukhulu etikwebuso bonkhe bemhlaba.

3 Kodvwa bukani, ngingumuntfu, futsi ngiyona ngekufisa kwami; ngoba kumele ngeneliseke ngetintfo iNkhosi lengabele tona.

4 Akukafaneli kutsi etifisweni tami ngigucule simemetelo lesicinile saNkulunkulu lolungile, ngoba ngiyati kutsi unika bantfu ngekufisa kwabo, noma ngabe kuholela ekufeni noma ngabe kuholela ekuphileni; yebo, ngiyati kutsi uyababela bantfu, yebo, umemetela kubo timemetelo lengeke tiguculwe, ngekwetifiso tabo, noma ngabe tekusindziswa noma tekubhujiswa.

5 Yebo, ngiyati kutsi lokuhle nalokubi kute embikwabo bonkhe bantfu; loyo longakwati kwehlukanisa lokuhle kulokubi akanacala; kodvwa loyo lokwatiko lokuhle nalokubi, kuye kunikwa ngekwetifiso takhe, noma ngabe ufisa lokuhle noma ufisa lokubi, kuphila noma kufa, injabulo noma kudliwa ngunembeza.

6 Manje, ngekubona kutsi ngiyatati leti tintfo, kungani ngifisa lokungetulu kunekutsi ngente umsebenti lengibitelwe kuwo na?

7 Kungani ngifisa kutsi ngibe yingilosi, kute ngikhulume kuyo yonkhe imikhawulo yemhlaba na?

8 Ngoba bukani, iNkhosi inika tonkhe tive, ngekwebuve bato kanye nangelulwimi lwato, kutsi tilifundzise livi lakhe, yebo, ngekuhlakanipha, konkhe loko lakubona kufanele kutsi tibe nako; ngako-ke siyabona kutsi iNkhosi iyaleta ngekuhlakanipha, ngaloko lokulungile futsi lokuliciniso.

9 Ngiyakwati loko iNkhosi lengiyalete ngako, futsi ngiyatfokota ngako, Angitikhukhumeti ngekwami, kodvwa ngitfokota kuloko iNkhosi lengiyalete ngako; yebo, loku yinjabulo yami, kute mhlawumbe ngibe sikhali etandleni taNkulunkulu kutsi ngiletse umphefumulo lotsite ekuphendvukeni, futsi loku kuyinjabulo yami.

10 Futsi bukani, uma ngibona labanyenti babomnaketfu baphendvuka ngekweliciniso, futsi beta eNkhosini Nkulunkulu wabo, nakunjalo umoya wami ugcwala injabulo; bese ngikhumbula loko iNkhosi lengentele kona, yebo, nekutsi iwuvile umthandazo wami; yebo, bese ngikhumbula umkhona wayo wemusa lengelulele wona.

11 Yebo, futsi ngetulu kwaloko ngikhumbula kutfunjwa kwabokhokho bami, ngoba ngempela ngiyati kutsi iNkhosi yabakhulula yabakhipha ebugcilini, futsi ngaloku yalisungula libandla layo; yebo, iNkhosi Nkulunkulu, wa-Abrahama, Nkulunkulu wa-Isaka, kanye naNkulunkulu waJakobe, yabakhulula baphuma ebugcilini

12 Yebo, seloku ngakukhumbula njalo kutfunjwa kwabokhokho bami; futsi naloyo Nkulunkulu lowabakhulula baphuma etandleni temaGibhithe wabakhulula baphuma ebugcilini.

13 Yebo, loyo Nkulunkulu wasungula libandla lakhe emkhatsini wabo; yebo, futsi loyo Nkulunkulu ungibite ngelubito lolungcwele, kutsi ngishumayele livi kulabantfu, futsi unginike imphumelelo lenkhulu, kuyo injabulo yami igcwele.

14 Kodvwa angijatjuliswa yimphumelelo yami kuphela, kodvwa injabulo yami igcwele kakhulu ngenca yemphumelelo yabomnaketfu, labebangenhla eveni laNefi.

15 Bukani, basebente kakhulu, baletsa titselo letinyenti; futsi uyawuba mkhulu kanganani umvuzo wabo!

16 Manje, uma ngicabanga ngemphumelelo yalaba bomnaketfu umphefumulo wami uyatsatseka, kube shangatsi uhlukaniswa nemtimba wawo, njengobe kwakunjalo, injabulo yami yinkhulu kakhulu.

17 Futsi kwangatsi Nkulunkulu angavuma laba, bomnaketfu, kutsi bahlale phansi embusweni waNkulunkulu; yebo, futsi ngalokunjalo nabo bonkhe labo labatitselo temisebenti yabo kute bangabe basaphumela ngaphandle nanini, kodvwa kutsi bamdvumise ingunaphakadze. Futsi shangatsi Nkulunkulu angavuma kutsi kwenteke ngekwemavi ami, nanjengobe ngikhulumile. Amen.