1 Futsi kwenteka kutsi ngemnyaka welishumi nakunye wekubusa kwebehluleli kubantfu baNefi, ngelilanga lesihlanu lenyanga yesibili, bekukhona kuthula lokukhulu eveni laseZarahemla, bekute timphi netincabano sikhatsi lesiyiminyaka letsite, kute kube lilanga lesihlanu lenyanga yesibili emnyakeni welishumi nakunye, kwaba khona inhlokomo yemphi leyevakala kulo lonkhe live.

2 Ngoba buka, emabutfo emaLamani besekatfumbelete eceleni kwelihlane, angena eminceleni yelive, nasedolobheni lase-Amoniha, acala kubulala bantfu abhubhisa nelidolobha.

3 Manje kwenteka kutsi, ngaphambi kwekutsi emaNefi ahlanganise libutfo lelanele libacoshe libakhiphe eveni, bese bababulele labantfu labebasedolobheni lase-Amoniha, futsi ngalokunjalo nalabanye labebatungelete imincele yakaNowa, batsatsa labanye babatfumbela ehlane.

4 Manje kwenteka kutsi emaNefi bekanesifiso sekulandza labo labebatsetfwe bayotfunjelwa ehlane.

5 Ngako-ke, loyo lobekabekwe kutsi abe yindvuna lenkhulu emabutfweni emaNefi, (libito lakhe bekunguZoramu, bekanemadvodzana lamabili, Lehi kanye na-Aha)—manje Zoramu kanye nemadvodzana akhe lamabili, bati kutsi Alma bekangumphristi lomkhulu ebandleni, futsi sebevile kutsi bekanemoya wekuphrofetha, ngako-ke baya kuye banesifiso sekwati kuye kutsi iNkhosi beyifuna kutsi baye ngakuphi ehlane kuyawufuna bomnakabo, labebatsetfwe batfunjwa ngemaLamani.

6 Futsi kwenteka kutsi Alma wabuta eNkhosini mayelana naloludzaba. emvakwaloko Alma wabuya watsi kubo: Bukani, emaLamani atawuncamula umfula iSidoni eningizimu nelihlane, khashane etulu ngaphandle kwemincele yelive iManti. Bukani lapho niyawuhlangana nabo, emphumalanga yemfula iSidoni, Futsi lapho iNkhosi iyawubaletsa kini bomnakenu labatsetfwe batfunjwa ngemaLamani.

7 Futsi kwenteka kutsi Zoramu kanye nemadvodzana akhe bawelela ngesheya kwemfula iSidoni, nemabutfo abo, bahamba ngaphandle kwemincele yaseManti baya eningizimu yelihlane, lelalisemphumalanga yemfula iSidoni.

8 Batseleka etikwemabutfo emaLamani, emaLamani ahlakatwa acoshwa ayiswa ehlane; batsatsa bomnakabo labebatsetfwe batfunjwa ngemaLamani, futsi bekute namunye wabo lobekalahlekile kulabo labebatfunjiwe. Futsi babuyiswa bomnakabo kute batsatse emave abo.

9 Waphela kanjalo-ke umnyaka welishumi nakunye webehluleli, emaLamani acoshiwe akhishwa eveni, nebantfu base-Amoniha babulawa; yebo, bonkhe bantfu labebaphila bema-Amoniha, ngalokunjalo nelidolobha lawo lelikhulu, lebekatsite Nkulunkulu angeke akwati kulibhubhisa, ngenca yebukhulu balo.

10 Kodvwa buka, ngelilanga linye lashiywa lingenamuntfu; futsi tidvumbu tadzaphunwa tinja netilwane tesiganga tasehlane.

11 Noko, emvakwemalanga lamanyenti tidvumbu talabafile babo tacwabelana phansi, futsi betimbonywe ngemhlabatsi lomncane. Manje belilikhulu liphunga lato kangangekutsi bantfu abayanga kuyawutsatsa lelive lase-Amoniha iminyaka leminyenti. Labitwa ngeNcitsakalo yemaNehori; ngoba labo bebabenkholo yaNehori, lababulawa; futsi emave abo asala ete muntfu.

12 Futsi emaLamani awatange asabuya futsi kutawukulwa nemaNefi kwate kwaba ngumnyaka welishumi nakune wekubusa kwebehluleli ngetulu kwaNefi. Ngaleyo ndlela iminyaka lemitsatfu bantfu baNefi baba nekuthula njalo eveni lonkhe.

13 Alma na-Amuleki bahamba bashumayela kuphendvuka ebantfwini emathempelini abo, kanye nasetindzaweni tabo letingcwele, kanjalo nasemasinagogeni abo, lebekakhiwe ngendlela yemaJuda.

14 Futsi bonkhe labo labebatsandza kuva emavi abo, babahlephulela ngelivi laNkulunkulu, bangakhetsi bala lemuntfu, njalonjalo.

15 Ngaleyo ndlela Alma na-Amuleki bachubekela phambili, kanjalo nalabanye labanyenti labebakhetselwe lomsebenti, kutsi bashumayele livi kulo lonkhe live. Kusungulwa kwelibandla kwaba yintfo levamile kulo lonkhe live, kuto tonkhe tifundza letitungeletile, emkhatsini wabo bonkhe bantfu baNefi.

16 Futsi bekute kungalingani emkhatsini wabo; iNkhosi ngempela yatfululela Moya wayo kulo lonkhe live kulungiselela tingcondvo tebantfwana bebantfu, noma kulungiselela tinhlitiyo tabo kutsi temukele livi lokwakuyofanele lifundziswe emkhatsini wabo ngesikhatsi sekuta kwayo—

17 Kute bangabi lukhuni ngalokumelene nelivi, kute bangabi ngulabangakholwa, bese baya ekubhujisweni kodvwa balemukele livi ngenjabulo, futsi njengeligala bachunyelelwe emvinini lokunguwonawona, kute bangene ekuphumuleni kweNkhosi Nkulunkulu wabo.

18 Manje labo baphristi labahamba emkhatsini webantfu bashumayela ngalokumelene nako konkhe kucala emanga, nekukhohlisana, nemona, nencabano, nenzondo, nekutfukana, kanye nekweba, kugebenga, kuphanga, kubulala, kuphinga, kanye nato tonkhe tinhlobo tenkhanuko, bamemetela kutsi leti tintfo akukafaneli tibe khona—

19 Bashumayela tintfo lekufanele kutsi tenteke masinyane; yebo, baphakamisa kuta kweNdvodzana yaNkulunkulu, kuhlupheka kanye nekufa kwayo, kanjalo nekuvuswa kwalabafile.

20 Linyenti lebantfu lababuta mayelana nendzawo lapho iNdvodzana yaNkulunkulu beyiyawufikela khona; bafundziswa kutsi iyawuvela kubo emvakwekuvuka kwayo; futsi loku bantfu bakwemukela ngenjabulo lenkhulu kanye nentfokoto.

21 Manje emvakwekutsi libandla selisunguliwe kulo lonkhe live—selitfole kuncoba ngetulu kwadeveli, livi laNkulunkulu selishunyayelwe ngebumsulwa balo eveni lonkhe, iNkhosi seyitfululele tibusiso tayo etikwebantfu—kwabese kuba kuphela kwemnyaka welishumi nakune wekubusa kwebehluleli kubantfu baNefi.