1 Buka, manje kwenteka kutsi masinyane emvakwekutsi Moroni sekatfumele incwadzi yakhe kumbusi lomkhulu, watfola incwadzi levala kuPhahorani, umbusi lomkhulu. Lawa ngemavi lawatfola:

2 Mine, Phahorani, lengingumbusi lomkhulu walelive, ngitfumela lamavi kuMoroni, indvuna lenkhulu yelibutfo. Buka, ngitsi kuwe, Moroni, angijabuli ngetinhlupheko tenu letinkhulu, yebo, kuyawudzabukisa umphefumulo wami.

3 Kodvwa buka, kukhona labo labajabulako ngenca yetinhlupheko tenu, yebo, kangangekutsi sebasukumile bangivukela, kanjalo nalabo bebantfu bami lababantfu benkhululeko, yebo, futsi labo labangivukele banyenti kakhulu.

4 Futsi ngulabo labebafuna kutsatsa sihlalo sekwehlulela kimi lababe yimbangela yalobubi lobukhulu kangaka; ngoba basebentise kuyenga lokukhulu, badukise tinhlitiyo tebantfu labanyenti, lokutawuba yimbangela yenhlupheko lenkhulu emkhatsini wetfu; bawubambile umphako wetfu, baphindze besabisa bantfu benkhululeko kangangekutsi abaketi kimi.

5 Futsi buka, bangicoshile bangikhipha, ngibalekele eveni laGideyoni, nemadvodza lamanyenti lebengingakhona kuwatfola.

6 Buka, ngitfumele simemetelo kuyo yonkhe lencenye yelive; buka, bayatseleka beta kitsi malanga onkhe, kutawutsatsa tikhali tabo, kutawuvikela live labo kanye nenkhululeko yabo, nekutawutiphindziselela ngekoniwa kwetfu.

7 Futsi bete kitsi, kangangekutsi labo labasukume basivukela bayesedzelela, yebo, kangangekutsi bayasesaba futsi angeke balokotse batawukulwa natsi.

8 Sebatfole live laba ngelabo, noma lidolobha, laseZarahemla; sebabeke inkhosi yabo, futsi seyibhalele inkhosi yemaLamani, leseyente sivumelwano sekuhlangana nayo kulencwandzi; kuleso sivumelwano ivumile kuligcina live laseZarahemla, ngaloko kuligcina kwayo icabanga kutsi kutawukwenta emaLamani alincobe live lelisesele, bese ibekwa iba yinkhosi etikwalabantfu uma sebancotjwe ngemaLamani.

9 Manje, encwadzini yakho ungigcekile, kodvwa akunandzaba; angikatfukutseli, kodvwa ngiyatfokota ngebuhle benhlitiyo yakho. Mine Phahorani, angifuni mandla, ngaphandle nje kuphela kwekugcina sihlalo sami sekwehlulela kute ngilondvolote emalungelo kanye nenkhululeko yebantfu bami, Umphefumulo wami ume ucinile kuleyo nkhululeko Nkulunkulu lasikhulule ngayo.

10 Manje, buka, sitawuvimbela bubi ngisho nangekucitsa ingati. Angeke siyicitse ingati yemaLamani uma atawuhlala eveni lawo.

11 Angeke siyicitse ingati yabomnaketfu uma bangeke basivukele futsi batsatse inkemba ngalokumelene natsi.

12 Sitawutinikela ejokeni lebugcili uma kudzingekile ngekulunga kwaNkulunkulu, noma uma asiyaleta kutsi sente njalo.

13 Kodvwa buka akasiyaleti kutsi sitinikele etitseni tetfu, kodvwa kutsi sibeke litsemba letfu kuye, futsi utawusikhulula.

14 Ngako-ke, mnaketfu lotsandzekako, Moroni, asingabuvumeli bubi, futsi noma ngabe ngubuphi bubi angeke sikwati kubuvimbela ngemavi etfu, yebo, njengekuvukela kanye nekuhlubuka, asikuvimbele ngetinkemba tetfu, kute sigcine inkhululeko yetfu, kute sijabule ngemusa lomkhulu welibandla letfu, kanye nasendleleni yeMhlengi kanye naNkulunkulu wetfu.

15 Ngako-ke, wota kimi ngekushesha nemadvodza akho lambalwa, bese labasalako ubashiya kuLehi kanye naTheyankhumi; ubanike emandla ekutsi bachubeke nemphi kuleyo ncenye yelive, ngekwaMoya waNkulunkulu, futsi lokungumoya wenkhululeko lokubo.

16 Buka ngitfumele umphako lomncane kubo, kute bangafi nite nikhone kufika kimi.

17 Gcogcani ndzawonye noma ngabe nguliphi libutfo leningakhona kuligcogca uma nita lapha, futsi sitawuhamba ngekushesha siyawukulwa nalawo mahlubuka, ngemandla aNkulunkulu wetfu ngelukholo lolukitsi.

18 Futsi sitawulitsatsa lidolobha laseZarahemla libe ngeletfu, kute sitfole kudla lokunyenti sikutfumele kuLehi banaTheyankhumi; yebo, sitawuhamba siyawukulwa nawo ngemandla eNkhosi, futsi sitawubucedza lobubi lobukhulu.

19 Manje, Moroni, ngiyajabula ngekutfola incwadzi yakho, ngoba bengikhatsatekile ngandlela tsite mayelana nalokufanele sikwente, kutsi bekulungile yini kutsi siyawukulwa nabomnaketfu.

20 Kodvwa utsite, ngaphandle kwekutsi baphendvuke iNkhosi ikuyaletile kutsi kumele silwe nabo.

21 Bona kutsi uyabacinisa boLehi naTheyankhumi eNkhosini; batjele kutsi bangesabi, ngoba Nkulunkulu utawubakhulula, yebo, kanye nabo bonkhe labo labeme bacina kuleyo nkhululeko Nkulunkulu labakhulule ngayo. Manje ngiyayivala incwadzi yami kumnaketfu lotsandzekako, Moroni.