1 Futsi kwenteka kutsi ekucaleni kwemnyaka wemashumi lamatsatfu nesitfupha wekubusa kwebehluleli kubantfu baNefi, Shibloni watsatsa leto tintfo letingcwele letatiletfwe kuHelamani ngu-Alma.

2 Bekayindvodza lelungile, wahamba ngebucotfo phambi kwaNkulunkulu; wetama kutsi ente lokuhle njalonjalo, ngekutsi ayigcine imiyaleto yeNkhosi Nkulunkulu wakhe; futsi wenta kanjalo nemnakabo.

3 Futsi kwenteka kutsi Moroni naye wafa. Waphela kanjalo-ke umnyaka wemashumi lamatsatfu nesitfupha wekubusa kwebehluleli.

4 Futsi kwenteka kutsi ngemnyaka wemashumi lamatsatfu nesikhombisa wekubusa kwebehluleli, kwaba khona licembu lelikhulu lemadvodza, lelingabalelwa etinkhulungwaneni letisihlanu nemakhulu lamane, nebafati bawo kanye nebantfwana bawo, esuka aphuma eveni laseZarahemla aya eveni lelingasenyakatfo.

5 Futsi kwenteka kutsi Hagothi, ayindvodza letsandza kwati lokufihlakele, ngako-ke wahamba watakhela umkhumbi lomkhulu kakhulu, eminceleni yelive iNala, ngaseveni iNcitsakalo, wawungenisa elwandle lolusenshonalanga, ngasesihlengeni lesincane lesiholela eveni lelingasenyakatfo.

6 Buka, bekukhona labanyenti bemaNefi labangena kuwo bahamba nemiphako leminyenti kakhulu, nebesifazane labanyenti kanye nebantfwana; batsatsa indlela yabo leya ngasenyakatfo. Waphela kanjalo-ke umnyaka wemashumi lamatsatfu nesikhombisa

7 Ngemnyaka wemashumi lamatsatfu nesiphohlongo, lendvodza yakha leminye imikhumbi. Futsi umkhumbi wekucala waphindze wabuya, bantfu labanye labanyenti bangena kuwo; nabo ngalokunjalo batsatsa umphako lomnyenti, baphindze bahamba baya eveni lelingasenyakatfo.

8 Futsi kwenteka kutsi akuphindzanga kwevakala lutfo ngabo. Sicabanga kutsi bamita ekujuleni kwelwandle. Futsi kwenteka kutsi lomunye umkhumbi nawo wahamba; kutsi lowo waya kuphi asati.

9 Futsi kwenteka kutsi ngalowo mnyaka baba banyenti bantfu labahamba baya eveni lelingasenyakatfo. Waphela kanjalo-ke umnyaka wemashumi lamatsatfu nesiphohlongo.

10 Futsi kwenteka ngemnyaka wemashumi lamatsatfu nemfica wekubusa kwebehluleli, Shibloni naye wafa, Khoriyantoni besekahambe waya eveni lelingasenyakatfo ngemkhumbi, kuyawumikisa umphako kubantfu labebahambe baya kulelo live.

11 Ngako-ke kwadzingeka kutsi Shibloni endlulise leto tintfo letingcwele, ngaphambi kwekufa kwakhe, kundvodzana yaHelamani, lebeyibitwa ngekutsi nguHelamani, lebeyicanjwe ngelibito leyise.

12 Manje buka, yonkhe leyo mibhalo lecoshiwe leyayiphetfwe nguHelamani yabhalwa futsi yatfunyelwa emkhatsini webantfwana bebantfu kulo lonkhe live, ngaphandle kwaleto tincenye Alma labebayalete ngato kutsi tingembulwa.

13 Noko, leti tintfo bekufanele tigcinwe tingcwele, futsi tendluliselwe tehle tisuke esitukulwaneni sinye kuya kulesinye; ngako-ke ngalowo mnyaka, tatinikwe Helamani, ngaphambi kwekufa kwaShibloni.

14 Futsi kwaphindze kwenteka ngawo lowo mnyaka kutsi kwaba khona lamanye emahlubuka labekahambe aya kumaLamani, aphindze aphehlwa kutsi awatfukutselele emaNefi.

15 Futsi ngalowo mnyaka ehla nelibutfo lelinyenti kakhulu kutawukulwa nebantfu baMoroniha, noma nelibutfo laMoroniha, lapho ashaywa aphindze achutjwa abuyiselwa emuva futsi emaveni awo, alahlekelwe kakhulu.

16 Waphela kanjalo-ke umnyaka wemashumi lamatsatfu nemfica wekubusa kwebehluleli kubantfu baNefi.

17 Yaphela kanjalo-ke indzaba ya-Alma, kanye naHelamani indvodzana yakhe, kanjalo naShibloni, lobekayindvodzana yakhe.