1 Manje sitawubuyela endzabeni yetfu ya-Amalikhiya kanye nalabo labebabaleke naye baya ehlane; ngoba, buka, bekatsetse labo labebahambe naye, wakhuphukela eveni laNefi emkhatsini wemaLamani, futsi wawaphehla emaLamani kutsi atfukutselele bantfu baNefi, kangangoba inkhosi yemaLamani yatfumela simemetelo kulo lonkhe live layo, emkhatsini wabo bonkhe bantfu bayo, kutsi bahlangane ndzawonye bahambe bayawukulwa nemaNefi.

2 Futsi kwenteka kutsi ngesikhatsi simemetelo sesendluliselwe phambili emkhatsini wabo besaba kakhulu; yebo, besaba kungayitfokotisi inkhosi, futsi baphindze besaba kutsi bayawukulwa nemaNefi funa balahlekelwe timphilo tabo. Futsi kwenteka kutsi bebangafuni, noma incenye lenkhulu yabo yayingafuni, kulalela imiyaleto yenkhosi.

3 Manje kwenteka kutsi inkhosi yatfukutsela ngenca yekungalaleli kwabo; ngako-ke yanika Amalikhiya ligunya lekulawula kuleyo ncenye yelibutfo lakhe lelaliyilalela imiyaleto yayo, futsi yamyaleta kutsi ahambe ayobaphocelela kutsi bahlome.

4 Manje buka, loku bekusifiso sa-Amalikhiya; ngoba bekayindvodza lenebucili lobukhulu ekwenteni bubi ngako-ke walenta lelisu enhlitiyweni yakhe lekuyisusa esihlalweni sebukhosi inkhosi yemaLamani.

5 Manje besekalitfolile ligunya lekulawula kuleto ticenye temaLamani lebetisekela inkhosi, wetama kutfola kwemukelwa ngulabo bebangalaleli; ngako-ke wahamba waya endzaweni leyayibitwa ngekutsi yi-Onida, ngoba ngulapho bekubalekele khona onkhe emaLamani; ngoba abona imphi ita, futsi acabanga kutsi yayitowabulala, ngako-ke abalekela e-Onida, endzaweni yetikhali.

6 Futsi bekabeke umuntfu kutsi abe yinkhosi kanye nemholi wawo, agcilile etingcondvweni tawo ngesincumo lesingagucuki sekutsi abengeke aphocelelwe kutsi alwe nemaNefi.

7 Futsi kwenteka kutsi bekabutsene ndzawonye esicongweni sentsaba leyayibitwa ngekutsi yi-Antipasi, kulungiselela imphi.

8 Manje bekungasiyo inhloso ya-Amalikhiya kutsi alwe nawo ngekwemiyaleto yenkhosi; kodvwa buka, kwakuyinhloso yakhe kutsi atfole kwemukelwa ngemabutfo emaLamani, kute atibeke enhloko yawo asuse inkhosi esihlalweni sebukhosi bese utsatsa umbuso ube ngewakhe.

9 Buka, kwenteka kutsi wenta emabutfo akhe kutsi amise emathende awo esigodzini lesasisedvute nentsaba i-Antipasi.

10 Futsi kwenteka kutsi ngesikhatsi sekuhlwile watfumela sitfunywa ngasense kutsi siye entsabeni i-Antipasi, anesifiso sekutsi umholi walabo labebasentsabeni, libito lakhe lobekunguLehonti, ehlele entansi phansi entsabeni, ngoba abenesifiso sekukhuluma naye.

11 Futsi kwenteka kutsi ngesikhatsi Lehonti atfola umlayeto akatange alokotse ehlele entansi phansi kwentsaba. Futsi kwenteka kutsi Amalikhiya waphindze watfumela kwesibili, anesifiso sekutsi ehle ete entansi. Futsi kwenteka kutsi Lehonti akatange avume; waphindze watfumela kwesitsatfu.

12 Futsi kwenteka kutsi ngesikhatsi Amalikhiya atfola kutsi abengakhoni kwenta Lehonti kutsi ehle entsabeni, wakhuphukela entsabeni, waya edvute nenkambu yaLehonti; waphindze watfumela kwesine umlayeto wakhe kuLehonti, anesifiso sekutsi ehlele entansi, ete nabogadzi bakhe.

13 Futsi kwenteka kutsi ngesikhatsi Lehonti asehlele entansi kanye nabogadzi bakhe kuya ku-Amalikhiya, Amalikhiya wafisa kutsi ehle nemabutfo akhe ebusuku, bese batungeleta lawo madvodza etinkanjini tawo inkhosi leyayimnike ligunya lekuwalawula, nekutsi yena uyowanikela etandleni taLehonti, uma angamenta yena (Amalikhiya) abe ngumholi wesibili ngetulu kwemabutfo onkhe.

14 Futsi kwenteka kutsi Lehonti wehlela entansi nemadvodza akhe batungeleta emadvodza a-Amalikhiya, kute ngaphambi kwekube avuke entsatsakusa yelilanga abe sekatungeletwe ngemabutfo aLehonti.

15 Futsi kwenteka kutsi ngesikhatsi babona kutsi besebatungeletiwe, bancenga Amalikhiya kutsi abavumele kutsi bahlangane nabomnakabo, kute bangabulawa. Manje loku bekungiyo kanye intfo Amalikhiya bekayifisa.

16 Futsi kwenteka kutsi wawanikela emadvodza akhe, ngalokuphambene nemyalo wenkhosi. Manje loku kwakungiyo intfo Amalikhiya bekayifisa, kute afeze emacebo akhe ekususa inkhosi esihlalweni.

17 Manje bekungumhambo emkhatsini wemaLamani, kutsi uma umholi wabo lomkhulu abulewe, kubekwe umholi wesibili abe ngumholi lomkhulu.

18 Futsi kwenteka kutsi Amalikhiya wenta kutsi yinye yetinceku takhe inike butsi kancane kancane kuLehonti, ate afe.

19 Manje, ngesikhatsi Lehonti asafile, emaLamani abeka Amalikhiya kutsi abe ngumholi wawo kanye nemekhuti wawo lomkhulu.

20 Futsi kwenteka kutsi Amalikhiya wahamba nemabutfo akhe (ngoba abesatifezile tifiso takhe) waya eveni laNefi, edolobheni laNefi, lokwakulidolobha lelikhulu.

21 Futsi inkhosi yaphumela ngephandle kuyomhlangabeta kanye nabogadzi bayo, ngoba yayicabanga kutsi Amalikhiya abesayifezile imiyaleto yayo, nekutsi Amalikhiya abesalibutsele ndzawonye libutfo lelikhulu kutsi liyawukulwa nemaNefi.

22 Kodvwa buka, ngesikhatsi inkhosi iphumela ngaphandle iyomhlangabeta Amalikhiya wenta kutsi tinceku takhe tihambe phambili kuyawuhlangabeta inkhosi. Tahamba takhotsama phambi kwenkhosi, shangatsi tiyayihlonipha ngenca yebukhulu bayo.

23 Futsi kwenteka kutsi inkhosi yelula sandla sayo kutsi itiphakamise, njengobe kwakungumhambo wemaLamani, njengeluphawu lwekuthula, lowo mhambo labebawutsetse kumaNefi.

24 Futsi kwenteka kutsi ngesikhatsi seyiphakamise yekucala, bukani yayigwaza inkhosi enhlitiyweni; yawela phansi.

25 Manje tinceku tenkhosi tabaleka; kwatsi tinceku ta-Amalikhiya tamemeta tikhala, titsi:

26 Bukani, tinceku tenkhosi tiyigwaze enhlitiyweni, seyiwile futsi setibalekile; bukani, wotani nitawubona.

27 Futsi kwenteka kutsi Amalikhiya wayaleta emabutfo akhe kutsi ahambe aye ngaphambili kuyobona kutsi kwentekeni enkhosini; ngesikhatsi asafike kuleyo ndzawo, ayitfola inkhosi ilele emahlwilini engati yayo, Amalikhiya wenta shangatsi utfukutsele, watsi: Noma ngubani lobekatsandza inkhosi, akaphumele ngaphambili, aticoshe tinceku tayo kute tibulawe.

28 Futsi kwenteka kutsi bonkhe labo labebayitsandza inkhosi, ngesikhatsi beva lamavi, beta ngaphambili baticosha tinceku tenkhosi.

29 Manje ngesikhatsi tinceku tenkhosi tibona libutfo liticosha, taba nekwesaba futsi, tabalekela ehlane, tawelela eveni laseZarahemla tayohlangana nebantfu ba-Amoni.

30 Futsi libutfo lelalibacosha labuyela emuva, ekubeni libacoshe lehluleka; ngaleyo ndlela Amalikhiya, ngenkhohliso yakhe, watizuza tinhlitiyo tebantfu.

31 Futsi kwenteka kutsi ngakusasa wangena edolobheni laNefi nemabutfo akhe, walitsatsa lidolobha laba ngelakhe.

32 Manje kwenteka kutsi indlovukazi, ngesikhatsi seyivile kutsi inkhosi ibulewe—ngoba Amalikhiya bekatfumele sitfunywa kuyo indlovukazi kuyatisa kutsi inkhosi ibulewe tinceku tayo, nekutsi uticoshile ngelibutfo lakhe, kodvwa wehluleka, tibalekile—

33 Ngako-ke ngesikhatsi indlovukazi seyiwutfolile lomlayeto yatfumela Amalikhiya, ifisa kutsi asindzise bantfu balelidolobha; ngetulu kwaloko yayifisa kutsi ete kuyo; ngetulu kwaloko yayifisa kutsi afike nabofakazi batofakaza mayelana nekufa kwenkhosi.

34 Futsi kwenteka kutsi Amalikhiya watsatsa yona kanye leyo nceku leyayibulele inkhosi, kanye nalabo bebanayo, bahamba baya kuyo indlovukazi, endzaweni leyayihleti kuyo; futsi bonkhe bafakaza kuyo kutsi inkhosi yayibulewe tinceku tayo lucobo; basho nekutsi: Tibalekile; ngabe loku akufakazeli yini ngalokumelene nato na? Ngaloko bayenelisa indlovukazi mayelana nekufa kwenkhosi.

35 Futsi kwenteka kutsi Amalikhiya wafuna lutsandvo lwendlovukazi, wayitsatsa wayenta umkakhe; ngaleyo ndlela ngenkhohliso yakhe, nangekusitwa tinceku takhe letinebucili, wawutfola umbuso; yebo, wemukelwa njengenkhosi kulo lonkhe live, emkhatsini wabo bonkhe bantfu bemaLamani, labebafaka ekhatsi emaLamani, nemaLemuweli nema-Ishmayeli, kanye nawo onkhe emahlubuka emaNefi, kusukela ekubuseni kwaNefi kwehle kute kube ngulesi sikhatsi samanje.

36 Manje lawa mahlubuka, anemfundziso lefanako futsi banelwati lolufanako nelwemaNefi, yebo, bafundzisiwe ngelwati lolufanako lweNkhosi, nanoma kunjalo, kuyamangalisa kusho, kutsi kungekudzala emvakwekuhlubuka kwabo baba lukhuni kakhulu futsi baba nenkhani yekungaphendvuki, baba ngulabangekhuteki kakhulu, bakhohlakala futsi baba nebudlova kwengca emaLamani—banatsa ngekufana nelisiko lemaLamani; bavumela buvila; kanye nalo lonkhe luhlobo lwenkhanuko; yebo, bakhohlwa ngalokuphelele ngeNkhosi Nkulunkulu wabo.