1 Manje kwenteka kutsi emvakwekutsi bantfu ba-Amoni sebahleti eveni laseJeshoni, futsi ngalokunjalo nelibandla selisunguliwe eveni laseJeshoni, nemabutfo emaNefi sekabekiwe atungeleta lonkhe live laseJeshoni, yebo, kuyo yonkhe imincele letungelete live laseZarahemla, buka emabutfo emaLamani abebalandzele bomnakabo nabaya ehlane.

2 Ngaleyo ndlela kwabakhona imphi lenkhulu; yebo, lebeyingakate ibekhona nanini emkhatsini webantfu bonkhe eveni kusukela ngesikhatsi Lehi ashiya eJerusalema; yebo, futsi emashumi etinkhulungwane temaLamani abulawa aphindze ahlakatwa etindzaweni tonkhe.

3 Yebo, ngetulu kwaloko kwaba khona kubulawa lokukhulu emkhatsini webantfu baNefi; noko, emaLamani achutjwa aphindze ahlakatwa, futsi bantfu baNefi baphidze babuyela eveni labo.

4 Manje lesi bekusikhatsi lapho khona kwabakhona kulila lokukhulu kanye nekukhala lokwevakala kulo lonkhe live, emkhatsini webantfu bonkhe baNefi—

5 Yebo, kukhala kwebafelokati bakhalela emadvodza abo, kanjalo nekwabobabe bakhalela emadvodzana abo, kanye nendvodzakati ikhalela umnakabo, yebo, nemnakabo akhalela babe; futsi kukhala kwekulila kwevakala emkhatsini wabo bonkhe, bakhalela tihlobo tabo lebetibulewe.

6 Manje ngempela leli bekulilanga lelusizi; yebo, sikhatsi sekuzotsa, kanye nesikhatsi sekuzila kanye nekuthandaza.

7 Futsi waphela ngaleyo ndlela umnyaka welishumi nesihlanu wekubusa kwebehluleli ngetulu kwebantfu baNefi;

8 Lena yindzaba ya-Amoni kanye nabomnakabo, luhambo lwabo eveni laNefi, buhlungu babo eveni, tinsizi tabo, kanye netinhlupheko tabo, kanye nekujabula kwabo lokungeke kulinganiswe, kanye nekwemukelwa nekuphephiswa kwabomnakabo eveni laseJeshoni. Manje shangatsi iNkhosi, uMhlengi webantfu bonkhe, angayibusisa imiphefumulo yabo ingunaphakadze.

9 Futsi lena yindzaba yetimphi kanye netincabano emkhatsini wemaNefi, ngalokunjalo netimphi emkhatsini wemaNefi kanye nemaLamani; futsi umnyaka welishumi nesihlanu wekubusa kwebehluleli uphelile.

10 Kusukela ngemnyaka wekucala kuya kuwelishumi nesihlanu kwaba khona kubhujiswa kwetimphilo letinyenti letitinkhulungwane; yebo, kwaletsa simo lesesabekako sekucitseka kwengati.

11 Futsi imitimba letinkhulungwane letinyenti ilele phansi emhlabeni, ngakulokunye imitimba yetinkhulungwane letinyenti iyabola itindvundvuma etikwebuso bemhlaba; yebo, futsi tinkhulungwane letinyenti tiyakhala ngenca yekulahlekelwa tihlobo tato, ngoba tinesizatfu sekwesaba, ngekwetetsembiso teNkhosi, tekutsi tiyiswe esimeni selusizi lolungapheli.

12 Ngakulokunye tinkhulungwane letinyenti talabanye tiyakhala ngekulahlekelwa tihlobo tato, kodvwa tiyatfokota futsi tiyajabula kakhulu kulo litsemba, nekwati, ngekwetetsembiso teNkhosi, kutsi batawuphakanyiswa kutsi bahlale esandleni sangesekudla saNkulunkulu, esimeni senjabulo lengeke iphele nanini.

13 Futsi ngaleyo ndlela siyabona kutsi kukhulu kangakanani kungalingani kwebantfu ngenca yesono kanye nesiphambeko, kanye nemandla adeveli, lafika ngemacebo ebucili lawenta kutsi abambe tinhlitiyo tebantfu.

14 Futsi ngaleyo ndlela siyalubona lubito lolukhulu lwekukhutsala kwebantfu kutsi basebente esivinini seNkhosi; futsi ngaleyo ndlela siyasibona sizatfu lesikhulu selusizi, futsi ngalokunjalo nesekutfokota—lusizi ngenca yekufa kanye nekubhujiswa emkhatsini webantfu, kanye nenjabulo ngenca yekukhanya kwaKhristu lokuholela ekuphileni.