1 Manje, ndvodzana yami, ngiyabona kutsi kukhona lokunye lokutsite lokusakhatsata ingcodvo yakho, longakucondzi—lokumayelana nekulunga kwaNkulunkulu ekujeziseni soni; ngoba utama kucabanga kutsi akusiko kulunga kutsi soni siyiswe esimeni selusizi.

2 Manje buka, ndvodzana yami, ngitawuchaza lentfo kuwe. Ngoba buka, emvakwekutsi iNkhosi Nkulunkulu seyikhiphe batali betfu bekucala ensimini yase-Edeni, bayolima umhlaba, lapho bebatsetfwe khona—yebo, yamkhipha umuntfu, yabeka emphumalanga yensimi yase-Edeni likherubhi, kanye nenkemba levutsako leyayigucukela etindzaweni tonkhe, kugadza lesihlahla sekuphila—

3 Manje, siyabona kutsi umuntfu besekafanana naNkulunkulu, sekati lokuhle nalokubi; futsi funa elule sandla sakhe, aphindze atsatse esihlahleni sekuphila, adle bese uphila ingunaphakadze, iNkosi Nkulunkulu yabeka likherubhi kanye nenkemba levutsako, kute angasidli leso sitselo—

4 Ngaleyo ndlela siyabona, kutsi kwabakhona sikhatsi lesabekelwa umuntfu kutsi aphendvuke, yebo, sikhatsi sekuvivinywa, sikhatsi sekuphendvuka kanye nesekusebentela Nkulunkulu.

5 Ngoba buka, kube Adamu welula sandla sakhe ngekushesha, wadla esihlahleni sekuphila, bekatawuphila ingunaphakadze, ngekwelivi laNkulunkulu, angenasikhatsi sekuphendvuka; yebo, ngetulu kwaloko nelivi laNkulunkulu lalitawuba yintfo lengenamsebenti, futsi lisu lelikhulu lensindziso laluyawuvimbeleka.

6 Kodvwa buka, bekumisiwe kutsi umuntfu afe—ngako-ke, njengobe bavinjelwa esihlahleni sekuphila, kumele basuswe emhlabeni—futsi umuntfu wabese uba ngulolahlekile ingunaphakadze, yebo, base baba bantfu labawile.

7 Manje, ngaloku uyabona kutsi batali betfu bekucala bavinjelwa ngekwenyama kanye nangekwakamoya kutsi bete eNkhosini, ngaleyo ndlela siyabona kutsi baba ngulabalandzela intsandvo yabo.

8 Manje buka, bekungakadzingeki kutsi umuntfu asindziswe kulokufa kwenyama, ngoba loko bekuyawumisa lisu lelikhulu lenjabulo.

9 Ngako-ke, njengobe umphefumulo wawungeke ufe nanini, futsi nekuwa bekuletse kuwo wonkhe umuntfu kufa ngekwakamoya kanjalo nekwemtimba, lokungukutsi, babese bayehlukaniswa neNkhosi, kwakudzingekile kutsi wonkhe umuntfu abuyiswe kulokufa ngekwakamoya.

10 Ngako-ke njengobe base bangulabanaka kwemhlaba, kwemvelo, nekwebudeveli, ngekwendalo, lesi simo sekuvivinywa kwaba simo sabo sekulungiselela; kwaba simo sekutilungiselela.

11 Manje khumbula, ndvodzana yami, kube bekungasiko kutsi bekungenca yelisu lekuhlengwa, (uma silibeka eceleni) masinyane nje ngesikhatsi bafa imiphefumulo yabo yayiyawuba selusizini, seyihlukanisiwe neNkhosi.

12 Manje, bekute indlela yekusindzisa bantfu kulesimo sekuwa, umuntfu lebekasiletse etikwakhe ngenca yekungalaleli kwakhe lucobo;

13 Ngako-ke, ngekulunga, lisu lekuhlengwa lalingenakwenteka, ngaphandle kwemibandzela yekuphendvuka kwebantfu kulesimo sekuvivinywa, yebo, lesimo sekutilungiselela; ngoba ngaphandle kwekutsi kube ngenca yalemibandzela, bubele bebungeke bukwati kusebenta ngaphandle kwekutsi bumise umsebenti wekulunga. Manje umsebenti wekulunga wawungenakumiswa; uma kunjalo, Nkulunkulu bekatawuyekela kuba nguNkulunkulu.

14 Ngaleyo ndlela siyabona kutsi wonkhe umuntfu wawa, futsi bese babanjwe kulunga; yebo, kulunga kwaNkulunkulu, lokwabayisa ekutseni behlukaniswe ingunaphakadze naye.

15 Manje, lisu lemusa lalingeke lenteke ngaphandle kwekutsi kwentiwe inhlawulo, ngako-ke Nkulunkulu lucobo lwakhe wahlawulela tono temhlaba; kute aletse lisu lemusa, kwenelisa tidzingo tekulunga, kute Nkulunkulu abe ngulophelele, Nkulunkulu lolungile, futsi ngalokunjalo naNkulunkulu lonemusa.

16 Manje, kuphendvuka bekungeke kute kubantfu ngaphandle kwekutsi kube khona sijeziso, naso futsi lesasisaphakadze njengobe imphilo yemphefumulo kumele ibe njalo, lesasibekiwe saphikisana nelisu lenjabulo, nalo lelalilaphakadze njengemphilo yemphefumulo.

17 Manje, umuntfu bekangaphendvuka kanjani ngaphandle kwekutsi one na? Bekangona kanjani uma umtsetfo wawungekho? Bewungaba khona kanjani umtsetfo ngaphandle kwekutsi kube khona sijeziso na?

18 Manje, kwakukhona sijeziso lesasibekiwe, kanye nemtsetfo lolungile lowawumisiwe, lowawuletsa kutisola kwanembeza kumuntfu.

19 Manje, uma ngabe bekute umtsetfo lomisiwe—kutsi uma umuntfu abulala naye kumele afe—ngabe bekatawusaba yini kutsi utawufa uma angabulala na?

20 Futsi ngalokunjalo, uma bekute umtsetfo lobekiwe ngalokumelene nesono bantfu bebangeke bakwesabe kufa.

21 Futsi uma bekute umtsetfo lobekiwe, uma bantfu bona kulunga bekungentani, noma nebubele ngalokunjalo, ngoba bekungeke kufune lutfo esidalweni?

22 Kodvwa kukhona umtsetfo lobekiwe, nesijeziso lesibekiwe, kanye nekuphendvuka lokuniketiwe; kuphendvuka loko, lokufunwa ngumusa; ngaphandle kwaloko, kulunga kuyasifuna sidalwa bese kusebentisa umtsetfo, bese umtsetfo wehlisa sijeziso; uma kungenjalo, imisebenti yekulunga ingaphela, futsi Nkulunkulu angayekela kuba nguNkulunkulu.

23 Kodvwa Nkulunkulu akayekeli kuba nguNkulunkulu, futsi bubele buyamemukela lophendvukako, futsi bubele buta ngenca yenhlawulo; inhlawulo yenta kwenteke kuvuswa kwalabafile; kuvuswa kwalabafile kubuyisela bantfu emuva kuNkulunkulu; ngaleyo ndlela babuyiselwa ebukhoneni bakhe, kute behlulelwe ngekwemisebenti yabo, ngekwemtsetfo kanye nangekulunga.

24 Ngoba buka, kulunga kusebentisa tonkhe tidzingo tako, ngalokunjalo nebubele bufuna konkhe lokungekwabo; ngaleyo ndlela kute namunye kodvwa labo labaphendvuka ngekweliciniso labasindziswako.

25 Ngabe ucabanga kutsi bubele bungakwemuka kulunga na? Ngitsi kuwe, Cha; nakancane nje. Uma kunjalo, Nkulunkulu angayekela kuba nguNkulunkulu.

26 Ngaleyo ndlela Nkulunkulu wenta tinhloso takhe letinkhulu netaphakadze, letatilungiswe kusukela ekusekelweni kwemhlaba. Futsi ngaleyo ndlela kweta kusindziswa kanye nekuhlengwa kwebantfu, ngalokunjalo nekubhujiswa kwabo kanye nelusizi.

27 Ngako-ke, O ndvodzana yami, loyo loyawuta angeta futsi anatse emantini ekuphila ngekukhululeka; futsi loyo longeyukuta akanakuphocelelwa kutsi ete; kodvwa ngelilanga lekugcina kuyawubuyiselwa kuye ngekwetento takhe.

28 Uma bekanesifiso sekwenta lokubi, futsi angaphendvukanga emalangeni akhe, buka, bubi buyawukwentiwa kuye, njengekubuyiselwa kwaNkulunkulu.

29 Manje, ndvodzana yami, ngifisa kutsi ungativumeli letintfo kutsi tikukhatsate nanini, vumela kukhatsatwa tono takho kuphela, kukhatsatwa loko lokuyawukwehlisela phansi ekuphendvukeni.

30 O ndvodzana yami, ngifisa kutsi ungaphindzi ukuphike kulunga kwaNkulunkulu nanini. Ungatami kutikhulula nakancane nje ngenca yetono takho, ngekuphika kulunga kwaNkulunkulu; kodvwa vumela kulunga kwaNkulunkulu, nebubele bakhe, kanye nekumela bulukhuni kwakhe kube nemtselela logcwele enhlitiyweni yakho; futsi kuvumele kukuletse phansi elutfulini ngekutfobeka.

31 Manje, O ndvodzana yami, ubitwe nguNkulunkulu kutsi ushumayele livi kulaba bantfu. Manje, ndvodzana yami, hamba ngendlela yakho, umemetele livi ngeliciniso kanye nangebucotfo, kute uletse imiphefumulo ekuphendvukeni, kute lisu lelikhulu lemusa libazuze. Futsi shangatsi Nkulunkulu angakupha njengekwemavi ami. Amen.