1 Manje, ndvodzana yami, nginalokutsite lokunye lengitawukusho kuwe kunaloko lengikushito kumnakenu; ngoba buka, awukubonanga yini kucina kwemnakenu, kwetsembeka kwakhe, kanye nekukhutsala kwakhe ekugcineni imiyaleto yaNkulunkulu na? Buka akatange yini abe sibonelo lesihle kuwe na?

2 Ngoba wena awutange uwanake kangako emavi ami njengobe umnakenu enta, emkhatsini webantfu bemaZoramu. Manje nguloku lenginako lokumelene nawe; wena bewuhamba utigabatisa ngemandla akho kanye nangekuhlakanipha kwakho.

3 Futsi akusiko loku kuphela, ndvodzana yami. Wena wente loko lokubuhlungu kakhulu kimi; ngoba uwulahlile umsebenti wahamba waya eveni laseSironi emkhatsini wemincele yemaLamani, ulandzelana nalengwadla Isabheli.

4 Yebo, watitfola tinhlitiyo talabanyenti; kodvwa loku kwakungasilo licembe lekubhacisa kuwe, ndvodzana yami. Wena kwakufanele utinikele emsebentini lobewuphatsiswe wona ngekwetsenjwa.

5 Awati yini ndvodzana yami, kutsi leti tintfo tisinengiso emehlweni eNkhosi; yebo, tinengeke kakhulu ngetulu kwato tonkhe tono ngaphandle kwekucitsa ingati lengenacala noma kuphika Moya loNgcwele na?

6 Ngoba buka, uma umphika Moya loNgcwele uma ngabe wake waba nendzawo kuwe, futsi wati kutsi uyamphika, buka, loku kusono lesingacoleleki; yebo, loyo lobulalako ngalokuphambene nekukhanya kanye nekumati Nkulunkulu, akulula kuye kutsi atfole kutsetselelwa; yebo, ngitsi kuwe, ndvodzana yami, akulula kuye kutsi atfole kutsetselelwa.

7 Manje, ndvodzana yami, ngifisa shangatsi ngabe awubanga nacala lesono lesikhulu kangaka kuNkulunkulu. Bengingeke ngigcile kumacala akho, kutsi ngikhatsate umphefumulo wakho, kube bengingakahlosi kutsi uzuze.

8 Kodvwa buka, angeke ukwati kufihla emacala akho kuNkulunkulu, futsi ngaphandle kwekutsi uphendvuke ayawukuma njengebufakazi lubumelane nawe ngelilanga lekugcina.

9 Manje ndvodzana yami, ngifisa kutsi uphendvuke uphindze utishiye tono takho, ungabe usatilandzela nanini tinkhanuko temehlo akho, kodvwa tincishe tonkhe leti tintfo; ngoba ngaphandle kwekutsi wente loku awunawukwati nanini kutsi udle lifa lembuso waNkulunkulu. O, Khumbula, futsi ukwemukele, utincishe leti tintfo.

10 Futsi ngiyakuyaleta kutsi ukwemukele kutsi utfole teluleko kubomnakenu labadzala etintfweni lotentako; ngoba buka, wena usesebusheni bakho, futsi usadzinga kondliwa bomnakenu. Tinake teluleko tabo.

11 Ungativumeli kutsi udukiswe ngunoma yini lelite noma lebulima; ungamvumeli develi kutsi aphindze adukise inhlitiyo yakho futsi kutsi ulandzele leto tingwadla letikhohlakele. Buka, O ndvodzana yami, bukhulu kanganani bubi lowubuletse etikwemaZoramu; ngoba ngesikhatsi abona kutiphatsa kwakho awatange asawakholwa emavi ami.

12 Manje Moya weNkhosi utsi kimi: Yaleta bantfwana bakho kutsi bente lokuhle, funa badukise tinhlitiyo tebantfu labanyenti ekubhujisweni; ngako-ke ngiyakuyaleta, ndvodzana yami, ngekwesaba Nkulunkulu, kutsi buyekele lobubi bakho.

13 Kutsi ugucukele eNkhosini ngayo yonkhe ingcondvo yakho, nemandla, kanye nekucina; kute ungabe usatidukisa tinhlitiyo tabo nanini kutsi bente bubi, kodvwa esikhundleni saloko buyela kubo, uwavume emaphutsa akho kanye naloko lokubi lowukwentile.

14 Ungawufuni umcebo noma tintfo letilite talomhlaba; ngoba buka, angeke utetfwale uhambe nato.

15 Manje, ndvodzana yami, ngitawusho lokutsite kuwe mayelana nekuta kwaKhristu. Buka, ngitsi kuwe, nguye nakanjani loyawuta kutawususa tono temhlaba; yebo, uyeta kutawumemetela tindzaba letimnandzi tensindziso kubantfu bakhe.

16 Manje, ndvodzana yami, ngiwo lona umsebenti lowawubitelwe kuwo, kutsi umemetele letindzaba letimnandzi kulabantfu, kutsi ulungise tingcondvo tabo; noma ngalenye indlela kute insindziso ite kubo, kute balungise tingcondvo tebantfwana babo kutsi balive livi ngesikhatsi sekubuya kwakhe.

17 Manje sengitawuphumuta ingcondvo yakho ngandlela tsite ngalesihloko. Buka, uyamangala kutsi kungani letintfo kumele tatiwe khashane kangaka ngaphambilini. Buka, ngitsi kuwe, ngabe umphefumulo ngalesi sikhatsi awusilo yini ligugu kuNkulunkulu njengobe kuyawuba njalo ngesikhatsi sekubuya kwakhe na?

18 Ingabe akudzingeki yini kutsi lisu lekuhlengwa latiswe labantfu kanjalo nakubantfwana babo na?

19 Ingabe akusiko yini lula ngalesi sikhatsi kutsi iNkhosi itfumele tingilosi tayo kutsi timemetele leti tindzaba letimnandzi kitsi kanjalo nakubantfwana betfu, noma emvakwesikhatsi sekuta kwakhe na?