1 Futsi kwenteka kutsi inkhosi Lamoni yenta kutsi tinceku takhe time ngembili tifakaze ngato tonkhe tintfo lebetitibonile mayelana naloludzaba.

2 Emvakwekutsi setifakazile tonkhe ngetintfo lebetitibonile, futsi seyitfole lwati ngekwetsembeka kwa-Amoni ekugcineni imihlambi yakhe, nangemandla akhe lamakhulu ekulweni nalabo labebafuna kumbulala, yamangala kakhulu, yatsi: Ngempela, lona ungetulu kwemuntfu. Bukani, ngabe lona akasuye yini Moya loMkhulu lotfumela tijeziso letinkhulu kangaka etikwalaba bantfu, ngenca yekubulala kwabo na?

3 Futsi tayiphendvula inkhosi, tatsi: Noma ngabe unguMoya loMkhulu noma ungumuntfu, asati; kodvwa nguloku lesikwatiko, kutsi angeke abulawe titsa tenkhosi; futsi angeke tihlakate imihlambi yenkhosi uma anatsi, ngenca yebungcweti bakhe kanye nemandla lamakhulu; ngako-ke, siyati kutsi ungumngani enkhosini. Manje, O nkhosi, asikholwa kutsi indvodza ingaba nemandla lamakhulu kangaka, ngoba siyati kutsi angeke abulawe.

4 Manje, ngesikhatsi inkhosi iva lamavi, yatsi kuto: Manje sengiyati kutsi unguMoya loMkhulu; futsi ute lana ngalesi sikhatsi kute avikele timphilo tenu, kute nginganibulali njengobe ngenta kubomnakenu. Manje lona nguMoya loMkhulu bobabe betfu labakhuluma ngaye.

5 Manje loku bekulisiko laLamoni, lebekalitfole kuyise, kutsi bekukhona Moya loMkhulu. Nanome bebakholelwa kuye Moya loMkhulu, bebacabanga kutsi noma ngabe yini labebayenta beyilungile; Noko Lamoni wacala kwesaba kakhulu, esaba kutsi funa bekente lokungakalungi ngekubulala tinceku takhe;

6 Ngoba besekabulele letinyenti tato ngenca yekutsi bomnakabo bebahlakate imihlambi yabo endzaweni yemanti; futsi, ngenca yekutsi imihlambi yabo yahlakatwa babulawa.

7 Manje bekungumkhuba wemaLamani kutsi eme ngasemantini aseSebusi kute ahlakate imihlambi yebantfu, kute ngaloko achube leminyenti lebeyihlakatekele eveni labo, loku bekungumkhuba wekuphanga emkhatsini wabo.

8 Futsi kwenteka kutsi inkhosi Lamoni yabuta etincekwini tayo, yatsi: Iphi yona lendvodza lenemandla lamakhulu kangaka na?

9 Tatsi kuyo: Buka, ipha emahhashi akho. Manje inkhosi beyikadze iyalete tinceku tayo, ngaphambi kwesikhatsi sekuyonatsisa imihlambi yato, kutsi kufanele tilungise emahhashi kanye netincola tayo, kute tiyimikise eveni laNefi; ngoba bekukhona lidzili lelikhulu lebelentiwe eveni laNefi, nguyise waLamoni, lobekayinkhosi ngetulu kwalo lonkhe lelo live.

10 Manje ngesikhatsi inkhosi Lamoni iva kutsi Amoni bekalungisa emahhashi kanye netincola tayo yamangala kakhulu, ngenca yekwetsembeka kwa-Amoni, yatsi: Ngempela akukate kube khona nayinye inceku emkhatsini wetinceku tami tonkhe leyake yetsembeka kangaka njengalendvodza; ngoba ikhumbula yonkhe imiyaleto yami kutsi iyente.

11 Manje ngempela sengiyati kutsi lona nguMoya loMkhulu, futsi ngiyafisa kutsi ete kimi, kodvwa ngeke ngilinge.

12 Futsi kwenteka kutsi Amoni sekawalungisile emahhashi kanye netincola tenkhosi kanye netinceku tayo, wahamba waya enkhosini, wabona kutsi buso benkhosi besebushintjile; ngako-ke besekatawubuyela emuva aphume aphele phambi kwayo.

13 Lenye yetinceku tenkhosi yatsi kuye, Rabhana, lokusho kutsi, ngekuhunyushwa, lonemandla noma inkhosi lenkhulu, ngekubona kutsi emakhosi abo bekanemandla; futsi ngalamagama yatsi kuye: Rabhana, inkhosi inesifiso sekutsi uhlale.

14 Ngako-ke Amoni waphendvukela enkhosini, watsi kuyo: Ngabe ufuna kutsi ngikwentele ini, O nkhosi? Inkhosi ayimphendvulanga sikhatsi lesingangelihora, ngekwesikhatsi sabo, ngoba beyingati kutsi itawutsini kuye.

15 Futsi kwenteka kutsi Amoni waphindze watsi kuyo: Ngabe ufisani kimi? Kodvwa inkhosi ayimphendvulanga.

16 Futsi kwenteka kutsi Amoni, agcwaliswe ngaMoya waNkulunkulu, ngako-ke wayibona imicabango yenkhosi. Watsi kuyo: Ngabe kungenca yekutsi uve kutsi ngivikele tinceku takho kanye nemihlambi yakho, futsi ngabulala labasikhombisa babomnakabo ngesilingi kanye nangenkemba, ngancuma imikhono yalabanye, kute ngivikele imihlambi yakho kanye netinceku takho; buka, ngabe ngiko yini loku lokwenta umangale na?

17 Ngitsi kuwe, kwentiwa yini, kutsi kumangala kwakho kube kukhulu kangaka na? Buka, ngingumuntfu, futsi ngiyinceku yakho; ngako-ke, noma ngabe yini loyifisako lelungile, ngitawuyenta.

18 Manje ngesikhatsi inkhosi seyive lamavi, yamangala futsi, ngoba yabona kutsi Amoni bekayati imicabango yayo; kodvwa nanoma kunjalo, inkhosi Lamoni yawuvula umlomo wayo, yatsi kuye: Ungubani? Ngabe unguloyo Moya loMkhulu, lowati tintfo tonkhe?

19 Amoni waphendvula watsi kuyo: Angisuye.

20 Futsi inkhosi yatsi: Uyati kanjani imicabango yenhlitiyo yami na? Ungakhuluma ngesibindzi futsi ungitjele mayelana naleti tintfo; uphindze ungitjele kutsi ngumaphi emandla lobulele ngawo futsi wancuma imikhono yabomnakenu labahlakata imihlambi yami—

21 Manje, uma ungangitjela mayelana naleti tintfo, noma ngabe yini loyifisako ngitawukunika; futsi uma kunesidzingo, ngiyawukugadza nemabutfo ami; kodvwa ngiyati kutsi wena unemandla ngetulu kwabo bonkhe; nanoma kunjalo, noma ngabe yini loyifuna kimi ngitawukunika yona.

22 Manje Amoni ahlakaniphile, noko ete bungoti, watsi kuLamoni: Utawuwalalela yini lamavi ami, uma ngikutjela kutsi letintfo ngitenta ngamaphi emandla na? Nguloku lengikufuna kuwe.

23 Inkhosi yamphendvula, yatsi: Yebo, ngitawuwakholwa onkhe lamavi akho. Futsi ngalendlela wayibamba ngebucili.

24 Amoni wacala kukhuluma kuyo ngesibindzi, watsi kuyo: Uyakholelwa yini kutsi ukhona Nkulunkulu na?

25 Yaphendvula, yatsi kuye: Angati kutsi loko kusho kutsini.

26 Emvakwaloko Amoni watsi: Uyakholelwa yini kutsi ukhona Moya loMkhulu na?

27 Yatsi, Yebo.

28 Futsi Amoni watsi: Lona nguNkulunkulu. Amoni waphindze watsi kuyo: Uyakholelwa yini kutsi loMoya loMkhulu, longuNkulunkulu, wadala tonkhe tintfo letisezulwini kanye naletisemhlabeni na?

29 Yatsi: Yebo, ngiyakholelwa kutsi wadala tonkhe tintfo letisemhlabeni, kodvwa angiwati emazulu.

30 Amoni watsi kuyo: Emazulu yindzawo lapho Nkulunkulu ahlala khona kanye nato tonkhe tingilosi takhe letingcwele.

31 Inkhosi Lamoni yatsi: Ngabe angetulu kwemhlaba?

32 Amoni watsi: Yebo, futsi ubuka phansi kubo bonkhe bantfwana bebantfu; futsi uyati yonkhe imicabango kanye netinjongo tenhlitiyo; ngoba ngesandla sakhe bonkhe badalwa kusukela ekucaleni.

33 Inkhosi Lamoni yatsi: Ngiyatikholelwa tonkhe leti tintfo lose utikhulumile. Ngabe wena utfunywe nguNkulunkulu na?

34 Amoni watsi kuyo: Mine ngingumuntfu; futsi umuntfu ekucaleni wadalwa ngemfanekiso waNkulunkulu, futsi ngibitwe nguMoya wakhe loNgcwele kutsi ngifundzise ngaleti tintfo kulaba bantfu, kute baletfwe ekwatini loko lokulungile nalokuliciniso;

35 Incenye yaloyo Moya ihleti kimi, lenginika lwati, futsi ngalokunjalo nemandla ngekwelukholo kanye netifiso tami letikuNkulunkulu.

36 Manje ngesikhatsi Amoni sekawashito lamavi, wacala ekudalweni kwemhlaba, kanjalo nasekudalweni kwa-Adamu, wayitjela ngato tonkhe tintfo mayelana nekuwa kwemuntfu, wayilandzisa waphindze wabeka phambi kwayo imibhalo kanye nemibhalo lengcwele yebantfu, lokwakukhulunywe ngayo baphrofethi, kwehla kuya phansi esikhatsini leso uyise, Lehi, ashiya eJerusalema.

37 Ngetulu kwaloko wabalandzisa (ngoba bekuyinkhosi kanye netinceku tayo) lonkhe luhambo lwabokhokho babo ehlane, kanye nako konkhe kuhlupheka kwabo ngendlala nekoma, kanye nekukhandleka kwabo, njalonjalo.

38 Futsi waphindze wabalandzisa mayelana nekuhlubuka kwaLamani banaLemuweli, kanye nemadvodzana a-Ishmayeli, yebo, konkhe kuhlubuka kwabo wabacocela ngako; wabachazela ngayo yonkhe imibhalo kanye nemibhalo lengcwele kusukela ngesikhatsi Lehi asuka eJerusalema kwehla kute kube sesikhatsini sanyalo.

39 Kodvwa loku akusiko konkhe; ngoba wabachazela nangelisu lekuhlengwa, lelalungiswa kusukela ekusekelweni kwemhlaba; waphindze wabatisa mayelana nekuta kwaKhristu, kanye nayo yonkhe imisebenti yeNkhosi wabatisa ngayo.

40 Futsi kwenteka kutsi emvakwekutsi sekatishito tonkhe leti tintfo, sekatichazile enkhosini, inkhosi yakholelwa kuwo onkhe lamavi akhe.

41 Yacala kukhala eNkhosini yatsi: O Nkhosi, bani nebubele; ngebunyenti bebubele bakho lobe nabo ebantfwini baNefi, bani nabo kimi, kanye nakubantfu bami.

42 Manje, ngesikhatsi seyikushito loku, yawela phansi, kwaba shangatsi ifile.

43 Futsi kwenteka kutsi tinceku tayo tayitsatsa tayitfwala tayiyisa kumkayo, tayilalisa embhedzeni wayo; yalala shangatsi ifile sikhatsi lesingangemalanga lamabili kanye nebusuku lobubili; futsi umkayo, nemadvodzana ayo, nemadvodzakati ayo bayikhalela, ngendlela yemaLamani, balila kakhulu ngenca yekulahleka kwayo.