Sehluko 37
Bongcwengcwe belitfusi naleminye imibhalo lengcwele kuyagcinwa kute kuletse bantfu ensindzisweni—EmaJaredi abhujiswa ngenca yebubi bawo—Tifungo kanye netivumelwano tawo letiyimfihlo kufanele kungavetwa ebantfwini—Tfolani seluleko eNkhosini ekwenteni kwenu konkhe—Njengobe iLiyahona yacondzisa emaNefi, kanjalo nelivi laKhristu liholela bantfu ekuphileni lokuphakadze. Cishe ngemnyaka wema-74 ngaphambi kwekutalwa kwaKhristu.
1 Manje, ndvodzana yami Helamani, ngiyakuyaleta kutsi utsatse lemibhalo lebengiphatsiswe yona ngekwetsenjwa;
2 Ngetulu kwaloko ngiyakuyaleta kutsi ugcine lombhalo walabantfu, njengobe nami ngentile, kulabongcwengcwe baNefi, futsi utigcine tonkhe letintfo lengitigcinile tingcwele, njengobe nami ngitigcinile; ngoba kungenhloso yekuhlakanipha kutsi tigcinwe.
3 Futsi laba bongcwengcwe belitfusi, labacuketse lemibhalo lecoshiwe, labanemibhalo lengcwele kubo, labanemlandvo wetitukulwane tabokhokho betfu, kusukela ekucaleni—
4 Buka, kwaphrofethwa bokhokho betfu, kutsi kumele bagcinwe futsi bendluliswe behle kusukela esitukulwaneni kuya kulesinye, bagcinwe balondvolotwe ngesandla seNkhosi baze bahambe baye kuto tonkhe tive, tihlobo, tilimi, kanye nakubantfu, kute bati ngetimfihlakalo leticuketfwe kubo.
5 Manje buka, uma bagciniwe kufanele bahlale bakhatimula; yebo, batawuhlala bakhatimula; yebo, kanjalo nabo bonkhe bongcwengcwe labacuketse leyo mibhalo lengcwele.
6 Manje ungacabanga kutsi loku lengikwentako kubulima; kodvwa buka ngitsi kuwe, ngetintfo letincane naletisobala kufezeka tintfo letinkhulu; futsi emasu lamancane etikhatsini letinyenti ayatitfobisa tihlakaniphi.
7 Futsi iNkhosi Nkulunkulu isebenta ngemasu kute ifeze tinhloso tayo letinkhulu netaphakadze; futsi ngemasu lamancane kakhulu iNkhosi itfobisa tihlakaniphi iphindze isindzise imiphefumulo leminyenti.
8 Manje, kute kube ngumanje bekusolo kukuhlakanipha kwaNkulunkulu kutsi leti tintfo tilondvolotwe; ngoba buka, tiyivulile imicondvo yalabantfu, yebo, takholwisa labanyenti ngemaphutsa etindlela tabo, futsi baletfwa ekumatini Nkulunkulu wabo kute kusindziswe imiphefumulo yabo.
9 Yebo, ngitsi kuwe, kube bekungasiko ngenca yaleti tintfo leticuketfwe ngulemibhalo, lekulabongcwengcwe, Amoni kanye nabomnakabo bebangeke bakhone kukholwisa tinkhulungwane letinyenti kangaka temaLamani ngemasiko langakalungi abokhokho babo; yebo, lemibhalo kanye nemavi abo abaletsa ekuphendvukeni; lokusho kutsi, yabaletsa ekuyatini iNkhosi Nkulunkulu wabo, kanye nasekutseni bajabule ngaJesu Khristu uMhlengi wabo.
10 Futsi ngubani lowatiko mhlawumbe ingaba yindlela yekuletsa letinyenti tinkhulungwane tabo, yebo, futsi kanjalo letinyenti tinkhulungwane tabomnaketfu labanenkhani, emaNefi, lokungumanje atente lukhuni tinhlitiyo tawo esonweni kanye nasebubini, ekumatini uMhlengi wawo na?
11 Manje leti timfihlakalo atikembulwa ngalokugcwele kimi; ngako-ke ngitawugcina lapha.
12 Futsi ngabe kwenele uma ngingatsi kuphela nje balondvolotelwe ngenhloso yekuhlakanipha, leyo nhloso leyatiwa nguNkulunkulu; ngoba yena weluleka ngekuhlakanipha kuyo yonkhe imisebenti yakhe, tindlela takhe ticondzile, futsi indlela yakhe yinye naphakadze.
13 O khumbula, khumbula, ndvodzana yami Helamani, kutsi icine kanjani imiyaleto yaNkulunkulu. Futsi watsi: Uma utawuyigcina imiyaleto yami uyawuphumelela eveni—kodvwa uma ungayigcini imiyaleto yakhe uyawususwa phambi kwakhe.
14 Manje khumbula, ndvodzana yami, kutsi Nkulunkulu utiphatsise wena ngekwetsenjwa letintfo, letingcwele, latigcine tingcwele, futsi latawutigcina aphindze atilondvolotele ngenhloso yakhe yekuhlakanipha, kute akhombise emandla akhe etitukulwaneni letitako.
15 Manje buka, ngikutjela ngemoya wekuphrofetha, kutsi uma uphambuka emiyaletweni yaNkulunkulu, buka, leti tintfo letingcwele tiyawutsatfwa kuwe ngemandla aNkulunkulu, futsi uyawunikelwa kuSathane, kutsi akuhlunge njengemakhoba emoyeni.
16 Kodvwa uma ugcina imiyaleto yaNkulunkulu, futsi wente ngaletintfo letingcwele njengobe iNkhosi ikuyaletile, (ngoba kufanele uncuse eNkhosini ngato tonkhe tintfo lekufanele utente ngato) buka, kute emandla asemhlabeni noma esihogo langatitsatsa kuwe, ngoba Nkulunkulu unemandla ekugcwalisa onkhe emavi akhe.
17 Ngoba utawutigcwalisa tonkhe tetsembiso takhe layawutenta kuwe, ngoba utigcwalisile tetsembiso takhe latenta kubokhokho betfu.
18 Ngoba wetsembisa kubo kutsi uyawutilondvolota letintfo atilondvolotele inhloso yakhe yekuhlakanipha, kute akhombise emandla akhe etitukulwaneni letitako.
19 Futsi manje buka, inhloso yinye sewuyigcwalisile, nasekubuyiselweni kwetinkhulungwane letinyenti temaLamani ekwatini liciniso; uwakhombisile emandla akhe kubo, futsi kanjalo usetawuwakhombisa emandla akhe kubo etitukulwaneni letitako; ngako-ke tiyawulondvolotwa.
20 Ngako-ke ngiyakuyaleta, ndvodzana yami Helamani, kutsi ukhutsale ekuwagcwaliseni onkhe emavi ami, nekutsi ukhutsale ekugcineni imiyaleto yaNkulunkulu njengobe ibhaliwe.
21 Manje, sengitawukhuluma kuwe mayelana nalabongcwengcwe labangemashumi lamabili nakune, kutsi ubagcine, kute timfihlakalo kanye nemisebenti yebumnyama, kanye nemisebenti yabo yangasense, noma imisebenti yangasense yalabo bantfu lababhujisiwe, yembulwe kulabantfu; yebo, konkhe kubulala kwabo, nebugebengu, nekuphanga, nabo bonkhe bubi kanye netinengiso tabo, kungembulwa kulabantfu; yebo, futsi nekutsi utilondvolote leti tihumushi.
22 Ngoba buka, iNkhosi yabona kutsi bantfu bayo bacala kusebenta ebumnyameni, yebo, basebenta kubulala ngasense kanye netinengiso; ngako-ke iNkhosi yatsi, uma bangakaphendvuki bayawubhujiswa baphele ebusweni bemhlaba.
23 Futsi iNkhosi yatsi: Ngitawulungiselela inceku yami Gazelema, litje, leliyawukhanya ebumnyameni libe kukhanya, kute ngikhombise bantfu bami labangisebentelako, kute ngibakhombise imisebenti yabomnakabo, yebo, imisebenti yabo lefihlakele, imisebenti yabo yebumnyama, nebubi babo kanye netinengiso.
24 Manje, ndvodzana yami, leti tihumushi talungiselelwa kutsi livi laNkulunkulu ligcwaliseke, lalikhuluma, atsi:
25 Ngiyawukwembula ebumnyameni ngivete ekukhanyeni yonkhe imisebenti yabo lefihlakele kanye netinengiso tabo; ngaphandle kwekutsi baphendvuke ngiyawubabhubhisa baphele nya ebusweni bemhlaba; futsi ngiyawutiveta ekukhanyeni tonkhe timfihlakalo kanye netinengiso tabo, kuto tonkhe tive letiyawuba banikati balelive emvakwaloku.
26 Manje, ndvodzana yami, siyabona kutsi abatange baphendvuke; ngako-ke babhujisiwe, futsi kute kube ngumanje livi laNkulunkulu ligcwalisekile; yebo, tinengiso tabo letifihlakele tikhishiwe ebumnyameni tembulelwa tsine.
27 Manje, ndvodzana yami, ngiyakuyaleta kutsi utigodle tonkhe tifungo tabo, netivumelwano tabo, kanye nekuvumelana kwabo ngalokuphatselene netinengiso tabo letifihlakele; yebo, kanye nato tonkhe timphawu tabo netimangaliso tabo uyawubafihlela labantfu, kute bangatati, funa mhlawumbe bawele ebumnyameni nabo bese bayabhujiswa.
28 Ngoba buka, kukhona sicalekiso etikwalo lonkhe lelive, sekutsi kubhujiswa kuyawuta etikwato tonkhe leto tisebenti tebumnyama, ngekwemandla aNkulunkulu, uma setivutfwe ngalokuphelele; ngako-ke ngifisa kutsi labantfu bangabhujiswa.
29 Ngako-ke uyawuwafihla lamasu layimfihlo etifungo tabo kanye netivumelwano tabo kulabantfu, futsi bubi babo kuphela nekubulala kwabo kanye netinengiso tabo loyawukwembula kubo; uyawubafundzisa kutsi babenyanye bubi lobunjalo netinengiso kanye nekubulala; ngetulu kwaloko uyawubafundzisa kutsi labantfu babhujiswa ngenca yebubi babo netinengiso kanye nekubulala kwabo.
30 Ngoba buka, bababulala bonkhe baphrofethi beNkhosi labefika emkhatsini wabo kutawushumayela kubo mayelana nebubi babo; futsi ingati yalabo labababulala yakhala eNkhosini Nkulunkulu wabo kutiphindziselela kulabo lebebababulali babo; ngaleyo ndlela tehlulelo taNkulunkulu teta etikwaleti tisebenti tebumnyama kanye nemacembu layimfihlo.
31 Yebo, futsi licalekisiwe lelive ingunaphakadze kuleto tisebenti tebumnyama kanye nemacembu layimfihlo, bate babhujiswe, ngaphandle kwekutsi baphendvuke ngaphambi kwekutsi bavutfwe ngalokuphelele.
32 Manje, ndvodzana yami, khumbula emavi lengiwakhulume kuwe; ungabaniki lawo masu layimfihlo labantfu, kodvwa bafundzise kutsi basitondze njalo sono kanye nebubi.
33 Shumayela kubo kuphendvuka, kanye nelukholo eNkhosini Jesu Khristu; bafundzise kutsi batitfobe baphindze babe mnene nekutsi batfobeke ngenhlitiyo; bafundzise kutsi bamelane nato tonkhe tilingo tadeveli, ngekukholwa kwabo eNkhosini Jesu Khristu.
34 Bafundzise kutsi bangalokotsi bakhatsale kwenta imisebenti lemihle, kodvwa kutsi babe mnene futsi batfobeke ngenhlitiyo; ngoba ngulabanjalo labayawutfola kuphumula emiphefumulweni yabo.
35 O, khumbula, ndvodzana yami, futsi ufundze kuhlakanipha ebusheni bakho; yebo, fundza ebusheni bakho kugcina imiyaleto yaNkulunkulu.
36 Yebo, khala kuNkulunkulu kute utfole indlela yakho yekutiphilisa; yebo, konkhe kwenta kwakho akube seNkhosini, futsi noma ngabe uyakuphi akube seNkhosini; yebo, yonkhe imicabango yakho yicondzise eNkhosini; yebo, lutsandvo lwenhlitiyo yakho alube seNkhosini ingunaphakadze.
37 Tfola seluleko eNkhosini kuko konkhe kwenta kwakho, futsi itawukucondzisa kute uzuze; yebo, uma ulala phansi ebusuku lala eNkhosini, kute ikuvikele ekulaleni kwakho; futsi uma uvuka ekuseni inhlitiyo yakho ayigcwale kubonga kuNkulunkulu; futsi uma utenta letintfo, uyawuphakanyiswa ngelilanga lekugcina.
38 Manje, ndvodzana yami, nginalokutsite lengifuna kukusho mayelana naleyontfo bokhokho betfu labayibita ngebhola, noma umcondzisi—noma bokhokho betfu lebebakubita ngekutsi yiLiyahona, ngekuhunyushwa lokutsiwa, yinkhombandlela; futsi iNkhosi yayilungisa.
39 Futsi buka, kute namunye umuntfu longenta loku ngendlela yebuciko lobungaka. Buka, yayilungiselelwe kutsi ikhombise bokhokho betfu indlela lebekufanele bahambe ngayo ehlane.
40 Futsi yabasebentela ngekwelukholo lwabo kuNkulunkulu; ngako-ke, uma bebanekukholwa kwekukholelwa kutsi Nkulunkulu bekangakhona kwenta leto tintsi tikhombe indlela lokwakumele bahambe ngayo, buka, bekwenteka; ngako-ke bebanalesi simangaliso, futsi kanjalo naletinyenti letinye timangaliso letenteka ngemandla aNkulunkulu, lilanga ngelilanga.
41 Noko, ngenca yekutsi leto timangaliso betenteka ngetintfo letincane tabakhombisa imisebenti lemihle kakhulu. Bebavilapha, baphindze bakhohlwa kusebentisa lukholo lwabo kanye nekukhutsala kwase kutsi leyo misebenti lemihle kakhulu yancamuka, futsi abatange basachubeka neluhambo lwabo.
42 Ngako-ke, bahlala ehlane, noma abatange basahamba indlela lecondzile, futsi bahlushwa yindlala kanye nekoma, ngenca yetiphambeko tabo.
43 Manje, ndvodzana yami, ngifuna kutsi ucondze kutsi leti tintfo ukusiko kutsi tite kufana; ngoba njengobe bokhokho betfu bavilapha kutsi bayinake lenkhombandlela (manje leti tintfo betitesikhashana) abaphumelelanga; kunjalo-ke nangetintfo letitakamoya.
44 Ngoba buka, kulula kutsi ulinake livi laKhristu, leliyawukukhombisa indlela lecondzile leya entfokotweni yaphakadze, njengobe bekunjalo kubokhokho betfu kutsi bayinake lenkhombandlela, lebeyibakhombisa indlela lecondzile leya eveni lesetsembiso.
45 Manje ngitsi, ngabe kute yini kufana kulentfo na? Ngoba njengobe nakanjani lomcondzisi aletse bokhokho betfu, ngekulandzela indlela yakhe, eveni lesetsembiso, kanjalo ngemavi aKhristu, uma silandzela indlela yawo, ayawusetfwala asiyise ngale kwalesigodzi selusizi siye eveni lelincono kakhulu lesetsembiso.
46 O ndvodzana yami, ungasivumeli kutsi sivilaphe ngenca yekubalula kwendlela; ngoba bekunjalo nakubokhokho betfu; ngoba beyilungiselwe bona kanjalo, kutsi uma bebangabuka bebangaphila; kusenjalo nakitsi. Indlela ilungisiwe, futsi uma singabuka singaphila ingunaphakadze.
47 Manje, ndvodzana yami, buka kutsi uyatinakekela leti tintfo letingcwele, yebo, caphela kutsi ubuka kuNkulunkulu futsi uphile. Hamba uye kulaba bantfu futsi umemetele livi, ube cotfo. Ndvodzana yami, hamba kahle.