1 Manje kwenteka kutsi Moroni akatange ayekele kwenta emalungiselelo emphi, noma kuvikela bantfu bakhe kumaLamani; ngoba wenta kutsi emabutfo akhe acale ekucaleni kwemnyaka wemashumi lamabili wekubusa kwebehluleli, kutsi kumele bacale kugubha tindvundvuma temhlabatsi batungelete onkhe emadolobha, kulo lonkhe live lebelilemaNefi.

2 Etikwaletindvundvuma temhlabatsi wenta kutsi kube khona emapulango, yebo, imisebenti yemapulango leyakhiwe yaba midze ngangemuntfu, itungelete emadolobha.

3 Wenta kutsi kuyo leyo misebenti yemapulango kube khona luhlaka lwetikhonkhwane lobelwakhiwe etikwemapulango lwatungeleta; beticinile futsi titindze.

4 Wenta kutsi kwakhiwe imibhoshongo lebeyibekwe kuyo leyo misebenti yetikhonkhwane, futsi wenta kutsi kwakhiwe tindzawo tekutivikela kuyo leyo mibhoshongo, kute ematje kanye nemicibisholo yemaLamani ingabalimati.

5 Bekatilungiselele kutsi akwati kujikijela ematje etulu lapho, ngekutsandza kwawo kanye nangekwemandla awo, ambulale lobekatotama kusondzela edvute kwetindvonga telidolobha.

6 Ngaleyo ndlela Moroni watilungisa tincaba kulungiselela kuta kwetitsa tawo, kuwo onkhe emadolobha latungelete eveni lonkhe.

7 Futsi kwenteka kutsi Moroni wenta kutsi emabutfo akhe ahambe aye ehlane lelisemphumalanga; yebo, ahamba ayowachuba onkhe emaLamani labekasehlane lelisemphumalanga awayisa emaveni awo, labekaseningizimu yelive laseZarahemla.

8 Futsi live laNefi belihamba ngendlela lecondzile kusukela emphumalanga yelwandle kuya enshonalanga.

9 Futsi kwenteka kutsi ngesikhatsi Moroni sekawachube onkhe emaLamani wawakhipha ehlane lasemphumalanga, lebelisenyakatfo yemave labekawabo, wenta kutsi labahlala eveni laseZarahemla kanye nebaseveni lebelitungeletile bahambe baye ehlane lelisemphumalanga, ngisho naseminceleni lengaselugwini lwelwandle, balitsatse lelo live.

10 Waphindze wabeka emabutfo eningizimu, eminceleni yalobekukwabo, wabenta kutsi bamise tincaba kute bavikele emabutfo abo kanye nebantfu babo etandleni tetitsa tabo.

11 Ngaleyo ndlela watincamula tonkhe tincaba temaLamani lebetisehlane lebelisemphumalanga, yebo, kanjalo nasenshonalanga, leticinisa umncele emkhatsini wemaNefi nemaLamani, emkhatsini welive laseZarahemla nelive lemaNefi, kusukela elwandle lwasenshonalanga, kuphikelele ngasekucaleni kwemfula iSidoni—emaNefi atitsatsele lonkhe lelive lelingasenyakatfo, yebo, ngisho nalo lonkhe lelive lebelingasenyakatfo yelive iNala, njengekutsandza kwabo.

12 Ngaleyo ndlela-ke Moroni, kanye nemabutfo akhe, labekakhula malanga onkhe ngenca yesiciniseko sekuvikeleka imisebenti yakhe leyasiletsa kubo, bafuna kuvimbela kucina kanye nemandla emaLamani bawasuse aphele emaveni langewabo, kute bangabi nemandla etikwemave abo.

13 Futsi kwenteka kutsi emaNefi acala sisekelo selidolobha, alibita lelidolobha ngeligama lelitsi yiMoroni; belingaselwandle lolungasemphumalanga; futsi laliseningizimu ngasemnceleni waloko lokukwemaLamani.

14 Ngetulu kwaloko bacala sisekelo selidolobha emkhatsini welidolobha laMoroni kanye nelidolobha la-Aroni, bahlanganisa imincele ya-Aroni kanye neyaMoroni; futsi balibita lelo dolobha, noma lelo live, ngeligama lelitsi, yiNefiha.

15 Ngetulu kwaloko bacala ngawo kanye lowo mnyaka kwakha emadolobha lamanyenti enyakatfo, lelinye balakha ngendlela letsite balibita ngekutsi yiLehi, lebelisenyakatfo ngaseminceleni yelugu lwelwandle.

16 Futsi waphela kanjalo-ke umnyaka wemashumi lamabili.

17 Futsi bebakulesi simo sekuphumelela bantfu baNefi ekucaleni kwemnyaka wemashumi lamabili nakunye wekubusa kwebehluleli kubantfu baNefi.

18 Baphumelela kakhulu, banotsa kakhulu; yebo, futsi bandza bate bakhula bacina eveni.

19 Ngaleyo ndlela siyabona kutsi tinemusa futsi tilunge kangakanani tento teNkhosi, ekugcwaliseni onkhe emavi ayo kubantfwana bebantfu; yebo, singabona kutsi emavi ayo ayacinisekiswa, ngisho nangalesi sikhatsi, lakhuluma ngaso kuLehi, atsi:

20 Ubusisiwe kanye nebantfwana bakho; futsi bayawubusiswa, nangabe bayawuyigcina imiyaleto yami bayawuphumelela kulelive. Kodvwa khumbula, nangabe bangeke bayigcine imiyaleto yami bayawususwa ebukhoneni beNkhosi.

21 Futsi siyabona kutsi leti tetsembiso ticinisekiswe ebantfwini baNefi; ngoba bekukuphikisana kanye netincabano tabo, yebo, kubulalana kwabo, kuphanga kwabo, kukhonta kwabo tithico, bugwadla babo, kanye netinengiso tabo, lokwabakhona emkhatsini wabo, lokwaletsa kubo timphi kanye nekubulawa kwabo.

22 Futsi labo labebatsembekile ekugcineni imiyaleto yeNkhosi bakhululwa ngetikhatsi tonkhe, kwatsi tinkhulungwane tabomnakabo lababi batfunyelwe ebugcilini, noma babulewe ngenkemba, noma bancishelwe lukholo, futsi bahlangana nemaLamani.

23 Kodvwa buka akutange nanini kube khona sikhatsi lesimnandzi kanje emkhatsini webantfu baNefi, kusukela emalangeni aNefi, njengasemalangeni aMoroni, yebo, ngisho nangalesi sikhatsi, emnyakeni wemashumi lamabili nakunye wekubusa kwebehluleli.

24 Futsi kwenteka kutsi ngemnyaka wemashumi lamabili nakubili wekubusa kwebehluleli nawo ngalokunjalo waphela ngekuthula; yebo, futsi ngalokunjalo nemnyaka wemashumi lamabili nakutsatfu.

25 Futsi kwenteka kutsi ekucaleni kwemnyaka wemashumi lamabili nakune wekubusa kwebehluleli, kwakuyawuba khona kuthula emkhatsini webantfu baNefi kube bekungasiko ngenca yencabano leyabakhona emkhatsini wabo mayelana nelive laLehi, kanye nelive laMoriyantoni, labekahlangana eminceleni yaLehi; omabili bekaseminceleni ngaselugwini lwelwandle.

26 Ngoba buka, bantfu labekubanikati belive laMoriyantoni bafuna incenye yelive laLehi; ngako-ke kwacala kwaba khona incabano leshisako emkhatsini wabo, kangangekutsi bantfu baMoriyantoni batsatsa tikhali ngalokumelene nabomnakabo, futsi bebaphokophele kutsi bababulale ngenkemba.

27 Kodvwa buka, bantfu labebabanikati belive laLehi babalekela enkanjini yaMoroni, bayocela kuye lusito; ngoba buka bebangakoni lutfo.

28 Futsi kwenteka kutsi ngesikhatsi bantfu baMoriyantoni, labebaholwa yindvodza libito layo lobekunguMoriyantoni, batfola kutsi bantfu baLehi bese babalekele enkanjini yaMoroni, baba nekwesaba lokukhulu funa libutfo laMoroni lite kubo libabulale.

29 Ngako-ke, Moriyantoni wakufaka etinhlitiyweni tabo kutsi babaleke baye eveni lebelingasenyakatfo, lebelimbonywe ngemachibi lamakhulu emanti, futsi balitsatse libe labo lelo live lebelingasenyakatfo.

30 Buka, bebangalifeza lelisu labo, (lebeliyawuba sizatfu sekulila) kodvwa buka, Moriyantoni ayindvodza lenelulaka lolukhulu, ngako-ke atfukutselele lomunye wetincekukati takhe kakhulu, wamhlasela wamshaya kakhulu.

31 Futsi kwenteka kutsi wabaleka, weta enkanjini yaMoroni, watjela Moroni tonkhe tintfo letiphatselene naloludzaba, kanjalo mayelana netinhloso tabo tekubalekela eveni lelingasenyakatfo.

32 Manje buka, bantfu labebaseveni iNala, noma Moroni, wesaba kutsi bebayawulalela emavi aMoriyantoni bese bahlangana nebantfu bakhe, ngaleyo ndlela bekatotfola tincenye telive tibe ngetakhe, loko lokwakuyawuba nemiphumela leyingoti lebeyitoba khona emkhatsini webantfu baNefi, yebo, leyomiphumela leyayiyawuholela ekupheleni kwenkhululeko yabo.

33 Ngako-ke Moroni watfumela libutfo, kanye nenkambu yalo, kutsi bayojikisa bantfu baMoriyantoni, kutsi bangabalekeli eveni lelingasenyakatfo.

34 Futsi kwenteka kutsi abatange babajikise bate bafika eminceleni yelive iNcitsakalo; lapho babajikisa, ngendlela lencane lebeyiholela ngaselwandle iya eveni lelingasenyakatfo, yebo, ngaselwandle, enshonalanga kanye nasemphumalanga.

35 Futsi kwenteka kutsi libutfo lebelitfunywe nguMoroni, lebeliholwa yindvodza libito layo lobekunguTheyankhumi, lahlangana nebantfu baMoriyantoni; futsi bebanenkhani kakhulu bantfu baMoriyantoni, (bagcugcutelwa bubi bakhe kanye nemavi akhe layengako) kangangekutsi imphi yacala emkhatsini wabo, lapho Theyankhumi wabulala Moriyantoni waphindze walehlula libutfo lakhe, wabatsatsa wabenta tiboshwa, wabuyela enkanjini yakaMoroni. Yaphela kanjalo-ke iminyaka lengemashumi lamabili nakune yekubusa kwebehluleli kubantfu baNefi.

36 Futsi babuyiselwa ngaleyo ndlela emuva bantfu baMoriyantoni. Emvakwesivumelwano sabo sekugcina kuthula babuyiselwa eveni laMoriyantoni, lubumbano lwenteka emkhatsini wabo kanye nebantfu baLehi; baphindze babuyiselwa emaveni abo.

37 Futsi kwenteka kutsi ngawo lowo mnyaka lokwabuyiselwa ngawo kuthula kubantfu baNefi, Nefiha, umehluleli lomkhulu wesibili, wafa, aphetse sihlalo sekwehlulela ngebucotfo lobukhulu ngaphambi kwaNkulunkulu.

38 Noko, bekalile ku-Alma kutsi atsatse imibhalo kanye naleto tintfo lebetatiswa ngu-Alma kanye naboyise kutsi tinguletingcwele kakhulu; ngako-ke Alma watiniketa indvodzana yakhe, Helamani.

39 Buka, kwenteka kutsi indvodzana yaNefiha yabekwa kutsi itsatse sihlalo sekwehlulela, esikhundleni seyise; yebo, yabekwa kutsi ibe ngumehluleli lomkhulu kanye nembusi webantfu, ngesifungo kanye nangesimiso lesingcwele sekwehlulela ngekulunga, kanye nekugcina kuthula kanye nenkhululeko yebantfu, kanye nekubaniketa emalungelo abo langcwele ekukhonta iNkhosi Nkulunkulu wabo, yebo, nekutsi isekele futsi igcine indlela yaNkulunkulu emalanga onkhe ayo, futsi iletse lababi kutsi behlulelwe ngekwemacala abo.

40 Manje buka, libito layo bekunguPhahorani. Phahorani wasitsatsa sihlalo seyise, wacala kubusa kwakhe ekupheleni kwemnyaka wemashumi lamabili nakune, kubantfu baNefi.