1 Futsi kwenteka kutsi emvakwekutsi sekacedzile kukhuluma kubantfu labanyenti babo bakholelwa emavini akhe, bacala kuphendvuka, kanye nekuphenya imibhalo lengcwele.

2 Kodvwa incenye lenyenti yabo beyinesifiso sekubabulala bo-Alma na-Amuleki; ngoba bebamtfukutselele Alma, ngenca yekucaca kwemavi akhe lawakhuluma kuZezromu; futsi batsi Amuleki ucale emanga kubo, wadzelela nemtsetfo wabo netatimtsetfo tabo kanye nebehluleli babo.

3 Ngetulu kwaloko bebamtfukutselele Alma na-Amuleki; ngenca yekutsi bebafakaze ngalokusobala kakhulu macondzana nebubi babo, bafuna kubabulala ngasense.

4 Kodvwa kwenteka kutsi abakwentanga loko; kodvwa babatsatsa bababopha nge leticinile, babatsatsa babayisa embikwemehluleli lomkhulu welive.

5 Nebantfu beta ngembili bafakaza ngalokumelene nabo—bafakaza kutsi badzelele bamelana nemtsetfo, netatimtsetfo tabo kanye nebehluleli belive, nabo bonkhe bantfu labebaseveni; ngetulu kwaloko bafakaza ngekutsi kukhona Nkulunkulu munye kuphela, nekutsi uyawutfumela iNdvodzana yakhe emkhatsini webantfu, kodvwa yena akayukubasindzisa; futsi tinyenti tintfo letifana naleti bantfu labafakaza ngato nga-Alma kanye nanga-Amuleki. Manje loku kwentiwa ngaphambi kwemehluleli lomkhulu welive.

6 Futsi kwenteka kutsi Zezromu wamangala ngalamavi labekakhulunyiwe; ngetulu kwaloko bekati mayelana nekuphumphutsekiswa kwetingcondvo, labekakwentile emkhatsini webantfu ngemavi akhe enkhohliso; futsi umphefumulo wakhe wacala kuhlushwa sazela sekuba nelicala kwakhe; yebo, wacala kutungeletwa buhlungu besihogo.

7 Futsi kwenteka kutsi wacala wamemeta kubantfu, watsi: Bukani, nginelicala, futsi lamadvodza ete sici phambi kwaNkulunkulu. Wacala kubancengela kusukela ngaleso sikhatsi kuya phambili; kodvwa bamtfuka, batsi: Ngabe nawe sewubanjwe ngudeveli na? Bamkhafulela ngematse, bamcosha waphuma emkhatsini wabo, kanjalo nabo bonkhe labo labebakholelwa emavini labekakhulunywe ngu-Alma kanye na-Amuleki; nabo bacoshwa bakhishelwa ngaphandle, batfumela bantfu kutsi babagandze ngematje.

8 Baletsa bafati babo kanye nebantfwana babo ndzawonye, kanye nabo bonkhe labebakholelwa noma labebafundziswe kutsi bakholelwe evini laNkulunkulu benta kutsi bafakwe emlilweni; ngetulu kwaloko baletsa imibhalo yabo lebeyicuketse imibhalo lengcwele, nayo bayiphonsa emlilweni futsi, kute nayo ishiswe futsi ishabalaliswe ngemlilo.

9 Futsi kwenteka kutsi batsatsa Alma kanye na-Amuleki, babatfwala babayisa endzaweni yekubulala labafela lukholo, kute batibonele kubhujiswa kwalabo labebashiswa ngemlilo.

10 Futsi ngesikhatsi Amuleki abona buhlungu bebesifazane kanye nebebantfwana labebasha emlilweni, naye ngalokunjalo waba nebuhlungu; watsi ku-Alma: singasibukela kanjani lesi sento lesibuhlungu kangaka na? Ngako-ke aselule tandla tetfu, sisebentise emandla aNkulunkulu lakitsi, sibasindzise emalangabini.

11 Kodvwa Alma watsi kuye: Moya uyangiphocelela kutsi ngingaseluli sandla sami; ngoba buka iNkhosi iyabemukela kuyo, enkhatimulweni, futsi ibavumele kutsi bayente lentfo, noma kutsi bantfu bayente lentfo kubo, njengebulukhuni betinhlitiyo tabo, kute kutsi kwehlulela leyawukwenta etikwabo entfukutselweni yayo kube ngulokulungile; futsi ingati yalabamsulwa iyawuma njengebufakazi ngalokumelene nabo, yebo, futsi ikhale kakhulu ngalokumelene nabo ngelilanga lekugcina.

12 Manje Amuleki watsi ku-Alma: Buka, mhlawumbe batawusishisa natsi futsi.

13 Alma watsi: Akube njengentsandvo yeNkhosi. Kodvwa, buka, umsebenti wetfu awukapheli; ngako-ke ngeke basishise.

14 Manje kwenteka kutsi ngesikhatsi imitimba yalabo labebaphonswe emlilweni seyishile, ngalokunjalo nemibhalo lebeyiphonswe kanye nabo, umehluleli lomkhulu welive weta wema embikwa-Alma kanye na-Amuleki, ngesikhatsi basaboshiwe; wabashaya ngemphama etihlatsini tabo, watsi kubo: emvakwaloku lesenikubonile, nisetawuphindze futsi nishumayele kulaba bantfu, kutsi bayawuphoswa echibini lemlilo kanye nesibabule na?

15 Bukani, niyabona kutsi anikabi nemandla ekubasindzisa labo labebaphonswe emlilweni; ngisho naNkulunkulu akabasindzisi ngenca yekutsi bebabelukholo lwenu. Futsi umehluleli waphindze wabashaya etihlatsini tabo, wabuta watsi: Nitsini?

16 Manje lomehluleli bekaweluhlelo kanye nenkholo yaNehori, lowabulala Gideyoni.

17 Futsi kwenteka kutsi Alma na-Amuleki abatange baphendvule; waphindze wabashaya, wase ubanika tindvuna kutsi baphonswe ejele.

18 Ngesikhatsi sebaphonswe ejele emalanga lamatsatfu, kwefika letinyenti tatimtsetfo, nebehluleli, nebaphristi, kanye nebafundzisi, labebabenkholo yaNehori; beta bangena ejele kutobabona, bababuta ngemavi lamanyenti; kodvwa abatange babaphendvule.

19 Futsi kwenteka kutsi umehluleli wema ngaphambi kwabo, watsi: kungani ningawaphendvuli emavi alabantfu na? Anati yini kutsi nginemandla ekutsi ngininikele emalangabini? Futsi wabayaleta kutsi bakhulume; kodvwa abaphendvulanga lutfo.

20 Futsi kwenteka kutsi besuka bahamba ngetindlela tabo, kodvwa baphindze babuya ngakusasa; umehluleli waphindze wabashaya futsi etihlatsini. Labanyenti beta ngembili, babashaya, batsi: Nisengaphindza futsi nime nehlulele laba bantfu, niphindze nisole umtsetfo wetfu na? Uma ninemandla lamakhulu kangaka pho kuya ngani ningatikhululi na?

21 Futsi tinyenti tintfo letinjengaleti labatisho kubo, bagedletelisa ematinyo abo kubo, babakhafulela nangematse, batsi: Siyawubukeka kanjani uma sesilahliwe na?

22 Tinyenti tintfo letinjena labatisho, yebo, tonkhe tinhlobo tetintfo letinjalo batikhuluma kubo; futsi ngaleyo ndlela bahlekisa ngabo emalanga lamanyenti. Babancisha kudla kute balambe, nemanti kute bome; babakhumula netingubo tabo kute babe ngcunu; ngaleyo ndlela baboshwa ngetintsambo leticinile, bavalelwa ejele.

23 Futsi kwenteka emvakwekutsi sebahlushwe ngalendlela emalanga lamanyenti, (futsi bekulilanga lelishumi nakubili, enyangeni yelishumi, emnyakeni welishumi wekubusa kwebehluleli ngetulu kwebantfu baNefi) kutsi umehluleli lomkhulu eveni la-Amoniha kanye nalabanyenti bebafundzisi babo kanye netatimtsetfo tabo bahamba bayongena ejele lapho Alma na-Amuleki bebaboshwe khona ngetintsambo.

24 Umehluleli lomkhulu wema embikwabo, waphindze wabashaya, watsi kubo: Uma ninemandla aNkulunkulu tikhululeni kuleti tibopho, sitawukholwa kutsi iNkhosi itawubabulala labantfu ngekwemavi enu.

25 Futsi kwenteka kutsi bonkhe bahamba bayawubashaya, basho emavi lafanako, kwate kwefika kuwekugcina; ngesikhatsi lowekugcina sekakhulumile kubo emandla aNkulunkulu aba setikwa-Alma na-Amuleki, baphakama bema ngetinyawo tabo.

26 Alma wamemeta watsi: Kuyawute kube nini sihlushwa nguleti tinhlupheko letinkhulu kangaka, O Nkhosi? O Nkhosi, siphe emandla ngekwelukholo lwetfu lolukuKhristu, nangalokwanele kutsi sikhululwe. Batidzabula tintsambo labebaboshwe ngato; ngesikhatsi bantfu bakubona loku, bacala babaleka, ngoba besaba, ngoba kubhujiswa bese kufike etikwabo.

27 Futsi kwenteka kutsi kwaba kukhulu kakhulu kwesaba kwabo kangangekutsi bawela phansi, futsi abawutfolanga umnyango loya ngaphandle kwelijele; kwatamatama kakhulu phansi, tindvonga telijele tachekeka kabili, kangangekutsi tawela phansi; umehluleli lomkhulu, netatimtsetfo, nebaphristi, kanye nebafundzisi, labebashaya Alma na-Amuleki, babulawa kuwa kwato.

28 Alma kanye na-Amuleki baphuma ejele, futsi bebangakalimali; ngoba iNkhosi beyibanike emandla, ngekwelukholo lwabo lebelukuKhristu. Futsi ngaleso sikhatsi baphuma ejele; bakhululwa etibopheni tabo, lijele bese liwele phansi, kanye nabo bonkhe bantfu labebangekhatsi kwetindvonga talo babulawa, ngaphandle kwa-Alma na-Amuleki; futsi ngaleso sikhatsi baphuma baya edolobheni.

29 Manje bantfu sebeve umsindvo lomkhulu beta bagijima babutsana ndzawonye ngeticuku bafuna kwati sizatfu sawo; ngesikhatsi babona Alma na-Amuleki beta baphuma ejele, netindvonga talo setiwele phansi, bafikelwa kwesaba lokukhulu, babaleka phambi kwa-Alma ana-Amuleki njengembuti ibaleka nelizinyane layo emabhubesini lamabili; babaleka kanjalo-ke phambi kwa-Alma na-Amuleki.