1 Manje kwenteka kutsi ngesikhatsi lawo maLamani labekahambe ayawukulwa imphi nemaNefi asatfole, emvakwemizabalazo yawo leminyenti kutsi bababulale, kutsi bekulite kufuna kuwabulala, aphindze abuyela eveni laNefi.

2 Manje kwenteka kutsi ema-Amaleki, ngenca yekulahlekelwa kwawo, atfukutsela kakhulu. Futsi ngesikhatsi abona kutsi bekangeke akhone kutfola kutiphindziselela kumaNefi, acala kutsi aphehle bantfu ekutfukutseleni ngalokumelene nabomnakabo, bantfu bema-Anti Nefi Lehi; ngako-ke aphindze acala kubabulala.

3 Manje laba bantfu baphindze bala kutsatsa tikhali tabo, futsi batinikela kutsi babulawe ngekwetifiso tetitsa tabo.

4 Manje ngesikhatsi Amoni kanye nabomnakabo bawubona lomsebenti wekubhubha emkhatsini walabo labebabatsandza kangaka, kanye nasemkhatsini walabo nabo bebabatsandze kangaka—ngoba bebabaphatsisa kwetingilosi letatitfunyiwe tivela kuNkulunkulu kutawubasindzisa ekubhujisweni kwaphakadze—ngako-ke, ngesikhatsi Amoni nabomnakabo bawubona lomsebenti lomkhulu wekubhujiswa, bagcwala bubele, batsi enkhosini:

5 Asibagcogceleni ndzawonye laba bantfu beNkhosi, asihambe sehlele eveni laseZarahemla kubomnaketfu emaNefi, sibaleke siphume etandleni tetitsa tetfu, kute singabulawa.

6 Kodvwa inkhosi yatsi kubo: Bukani, emaNefi atawusibulala, ngenca yekubulala lokunyenti kanye netono lesitentile kuwo.

7 Amoni watsi: Ngitawuhamba ngiyawubuta eNkhosini, futsi uma itsi kitsi, asihambe sehlele entansi kubomnaketfu, ngabe nitawuhamba na?

8 Inkhosi yatsi kuye: Yebo, uma iNkhosi itsi kitsi asihambe, sitawuhamba sehlele entansi kubo bomnaketfu, futsi sitawuba tigcili tabo site silungise kubo kubulala lokunyenti kanye netono lesitentile kubo.

9 Kodvwa Amoni watsi kuyo: Kuphambene nemtsetfo wabomnaketfu, lowamiswa ngubabe, kutsi kube khona tigcili emkhatsini wabo; ngako-ke asihambe sehlele entansi futsi setsembele kuwo umusa wabomnaketfu.

10 Kodvwa inkhosi yatsi kuye: Buta eNkhosini, futsi uma itsi kitsi asihambe, sitawuhamba; ngaphandle kwaloko sitawufela kulelive.

11 Futsi kwenteka kutsi Amoni wahamba wayawubuta eNkhosini, iNkhosi yatsi kuye:

12 Bakhiphe laba bantfu kulelive, kute bangafi; ngoba Sathane ubambelele kakhulu etinhlitiyweni tema-Amaleki, laphehla emaLamani kutsi atfukutselele bomnakabo kutsi bababulale; ngako-ke phumani niphele kulelive; futsi babusisiwe laba bantfu kulesi situkulwane, ngoba ngitawubalondvolota.

13 Manje kwenteka kutsi Amoni wahamba wayotjela inkhosi onkhe lamavi iNkhosi lebeyiwakhulumile kuye.

14 Futsi bagcogcela ndzawonye bonkhe bantfu babo, yebo, bonkhe bantfu beNkhosi, bagcogca ndzawonye yonkhe imihlambi yetimvu kanye nemihlambi yetinkhomo yabo, besuka eveni, befika ehlane lelalehlukanisa live laNefi eveni laseZarahemla, beta edvute nemincele yelive.

15 Futsi kwenteka kutsi Amoni watsi kubo: Bukani, mine nabomnaketfu sitawuhamba embili siye eveni laseZarahemla, nitawusala lapha site sibuye; futsi sitawutizama tinhlitiyo tabomnaketfu, kutsi bayafuna yini nite eveni labo.

16 Futsi kwenteka kutsi ngesikhatsi Amoni ahamba aya eveni, yena kanye nabomnakabo bahlangana na-Alma, kuleyo ndzawo lesike sakhuluma ngayo, futsi bukani, lona kwaba ngumhlangano wenjabulo.

17 Manje injabulo ya-Amoni beyiyinkhulu kangangekutsi wagcwala; yebo, wenganywa yinjabulo yaNkulunkulu wakhe, wate waphelelwa ngemandla akhe; waphindze wawela phansi.

18 Manje ngabe loku kwakungasiyo yini injabulo leyendlulele na? Bukani, lena yinjabulo lengeke itfolwe ngumuntfu ngaphandle kwekutsi kube nguloyo lophendvuka ngekweliciniso kanye naloyifuna ngekutitfoba injabulo.

19 Manje injabulo ya-Alma ekuhlanganeni kwakhe nabomnakabo yaba yinkhulu ngempela, futsi kanjalo nenjabulo ya-Aroni, na-Omneri, kanye naHimni; kodvwa buka injabulo yabo ayendlulanga emandla abo.

20 Manje kwenteka kutsi Alma wabahola bomnakabo babuyela emuva eveni laseZarahemla; bate bayongena nasendlini yakhe lucobo. Futsi bahamba bayotjela umehluleli lomkhulu tonkhe tintfo lebetentekile kubo eveni laNefi, emkhatsini wabomnakabo, emaLamani.

21 Futsi kwenteka kutsi umehluleli lomkhulu watfumela simemetelo kulo lonkhe live, anesifiso sekuva livi lebantfu mayelana nekwemukela bomnakabo, labebabantfu bema-Anti Nefi Lehi.

22 Futsi kwenteka kutsi livi lebantfu labuya, litsi: Bukani, sitawunikela ngelive laseJeshoni, lelisemphumalanga ngaselwandle, lelihlanganisa live iNala; leliseningizimu yelive iNala; futsi lelive iJeshoni live lesitawuliniketa bomnaketfu kutsi libe lifa.

23 Futsi buka, sitawubeka emabutfo etfu emkhatsini welive iJeshoni kanye nelive iNefi, kute sivikele bomnaketfu eveni iJeshoni; futsi loku sitawukwentela bomnaketfu, ngenca yekwesaba kwabo kuphakamisa tikhali ngalokumelene nabomnakabo funa bente sono; futsi loku kwesaba kwabo lokukhulu kute ngenca yekuphendvuka kwabo lokulusizi labebanako, ngenca yekubulala kwabo lokunyenti kanye nebubi babo lobukhulu.

24 Manje buka, loku sitawukwentela bomnaketfu, kute batfole live iJeshoni; futsi sitawubavikela etitseni tabo ngemabutfo etfu, uma nje batawusinika incenye yaloko labanako kusisita kutsi sondle emabutfo etfu.

25 Manje kwenteka kutsi ngesikhatsi Amoni asakuvile loku, wabuyela kubantfu bema-Anti Nefi Lehi, kanjalo na-Alma akanye naye, baya ehlane, lapho bebamise emathende abo khona, babatjela tonkhe leti tintfo. Futsi Alma naye wabacocela ngekuphendvuka kwakhe, bakanye na-Amoni naAroni, kanye nabomnakabo.

26 Futsi kwenteka kutsi loku kwabanga injabulo lenkhulu emkhatsini wabo. Bahamba behlela eveni laseJeshoni, balitsatsa live laseJeshoni; futsi babitwa ngemaNefi ngekutsi bantfu ba-Amoni; ngako-ke behlukaniswa ngalelo gama emvakwaloko.

27 Futsi bebasemkhatsini webantfu baNefi, ngetulu kwaloko babalwa emkhatsini webantfu labebabelibandla laNkulunkulu. Ngetulu kwaloko behlukaniswa ngenca yenshisekelo yabo kuNkulunkulu, kanjalo nakubantfu; ngoba bebatsembeke ngalokuphelele futsi bacotfo kuto tonkhe tintfo; bacinile elukholweni lwaKhristu, kwate kwaba sekugcineni.

28 Bakubuka kucitseka kwengati yabomnakabo ngekwenyanya lokukhulu; bebangeke baphocelelwe kutsi batsatse tikhali ngalokumelene nabomnakabo; futsi abatange babuke kufa ngekwesaba, ngenca yelitsemba kanye nemibono yabo ngaKhristu kanye nekuvuka; ngako-ke, kufa kubo kwenganywa kwaphela ngekuncotjwa kwako nguKhristu.

29 Ngako-ke, bebatimisele kufa ngendlela leyayibuhlungu kakhulu futsi lenelusizi lolukhulu leyayingasetjentiswa bomnakabo kubo, ngaphambi kwekutsi batsatse inkemba noma celemba kutsi babashaye.

30 Ngaleyo ndlela bebabantfu labanenshisekelo futsi labatsandzekako, bantfu beNkhosi labebatsandvwa kakhulu.