1 Manje kwenteka kutsi ngenyanga yelishumi nakunye ngemnyaka welishumi nemfica, ngelilanga lelishumi enyangeni, emabutfo emaLamani abonakala ahamba aya ngaseveni lase-Amoniha.

2 Futsi bukani, lelidolobha beselakhiwe kabusha, futsi Moroni besekabeke libutfo ngaseminceleni yelidolobhha, base babeka umhlabatsi kutungeleta kubavikela emicibisholweni kanye nasematjeni emaLamani; ngoba bukani, bekalwa ngematje kanye nemicibisholo

3 Bukani ngitse lidolobha lase-Amoniha beselakhiwe kabusha. Ngitsi kini, yebo, incenye yalo beseyakhiwe kabusha; futsi ngenca yekutsi emaLamani bekake alibhubhisa kanye ngenca yebubi bebantfu, acabanga kutsi kutfolwa kwalo kwakutawubalula kuwo.

4 Kodvwa bukani, kwaba kukhulu kangakanani kudvumala kwawo; ngoba buka, emaNefi bekagubhe umngcengcema wemhlabatsi ubatungeletile, lowawuphakeme ngendlela yekutsi emaLamani bekangakhoni kujikijela ematje awo kanye nemicibisholo yawo kubo kute ibalimate, bekangakhoni nekuta kubo ngaphandle kwekutsi asebentise indzawo yekungena.

5 Manje ngalesi sikhatsi tindvuna letinkhulu temaLamani tamangala kakhulu, ngenca yekuhlakanipha kwemaNefi ekulungiseni tindzawo tawo tekutivikela.

6 Manje baholi bemaLamani bebacabanga kutsi, ngenca yebukhulu belinani labo, yebo, bebacabanga kutsi bebatoba nenhlanhla yekutsi bete kubo njengobe bebakadze bentile ekucaleni; yebo, ngetulu kwaloko bebatilungiselele ngetihlangu, kanye nangetivikelo tesifuba; ngetulu kwaloko bebatilungiselele ngetembatfo tetikhumba, yebo, tembatfo leticinsi kakhulu kute bambonye bungcunu babo.

7 Futsi ngalokutilungiselela kanje bebacabanga kutsi bebatobehlula kalula futsi babafake bomnakabo ngaphansi kwelijoko lebugcili, noma bababulale futsi bababulale ngesihluku ngekwentsandvo yawo.

8 Kodvwa bukani, ngekumangala kwabo lokukhulu, bebawalungele, ngendlela leyayingatange yatiwe emkhatsini webantfwana baLehi. Manje bebawalungele emaLamani, kutsi balwe ngendlela yemiyalo yaMoroni.

9 Futsi kwenteka kutsi emaLamani, noma ema-Amalikhiya, amangala kakhulu ngendlela yawo yekulungiselela imphi.

10 Manje, kube inkhosi Amalikhiya beyehlile yaphuma eveni laNefi, ihola libutfo layo, mhlawumbe yayiyokwenta emaLamani ahlasele emaNefi edolobheni lase-Amoniha; ngoba bukani, yayingayikhatsaleli nakancane ingati yebantfu bayo.

11 Kodvwa bukani, Amalikhiya akatange ehle kutawukulwa. Futsi buka, tindvuna takhe letinkhulu atitange tilokotse tiwahlasele emaNefi edolobheni lase-Amoniha, ngoba Moroni besekatishintjile tindlela emaNefi labekenta ngato tintfo, kangangekutsi emaLamani bekadvumele ngenca yetindzawo tawo tekuphepha futsi akakhonanga kuta etikwawo.

12 Ngako-ke abalekela ehlane, atsatsa libutfo lawo ahamba aya ngaseveni laNowa, acabanga kutsi kwakunguyona ndzawo lelandzelako lencono kutsi ahlasele emaNefi.

13 Ngoba bekangati kutsi Moroni besekacinisile, noma besekakhe tincaba tekutivikela, talo lonkhe lidolobha eveni lonkhe lelalitungeletiwe; ngako-ke, ahamba aya eveni laNowa anemphokophelo lecinile; yebo, tindvuna tawo letinkhulu teta phambili futsi tafunga kutsi tatitobabulala bantfu bakulelo dolobha.

14 Kodvwa bukani, ngekumangala kwabo, lidolobha laNowa, ngaphambilini lelaliyindzawo lebutsakatsaka, manje, ngenca yaMoroni, laselinemandla, yebo, kwendlula ngisho nemandla elidolobha lase-Amoniha.

15 Manje, bukani, loku bekukuhlakanipha kwaMoroni; ngoba bekacabange kutsi bebatoba nekulesaba lidolobha lase-Amoniha; futsi njengobe lidolobha laNowa kwakunguyona ncenye yelive ngaleso sikhatsi leyayibutsakatsaka kakhulu, ngako-ke bebatohamba baye lapho kuyawuhlasela; futsi loku kwenteka ngekwetifiso takhe.

16 Futsi bukani, Moroni bekabeke Lehi kutsi abe yindvuna lenkhulu ngetulu kwemadvodza alelo dolobha; futsi kwakunguye kanye loyo Lehi lowalwa nemaLamani esigodzini emphumalanga yemfula iSidoni.

17 Manje bukani kwenteka, kutsi ngesikhatsi emaLamani asatfole kutsi Lehi bekalawula lelidolobha aphindze advumala, ngoba abemesaba kakhulu Lehi; noko tindvuna tawo letinkhulu tatifungile ngesifungo kulihlasela lelidolobha; ngako-ke, tawaletsa emabutfo ato.

18 Manje bukani, emaLamani akakhonanga kungena etincabeni tawo tekutivikela nganoma nguyiphi lenye indlela ngaphandle kwekutsi kube sekungeneni, ngenca yekuphakama kwendvundvuma lebeyakhiwe yaya etulu, kanye nekujula kwemsele lobewumbiwe watungeleta, ngaphandle kwekutsi kube sekungeneni.

19 Ngaleyo ndlela emaNefi bekatilungiselele kutsi abulale bonkhe labebatowetama kutsi bagibele etulu kute bangene encabeni nganoma nguyiphi lenye indlela, ngekutsi babajikijele ngematje nangemicibisholo.

20 Ngaleyo ndlela bekatilungiselele, yebo, licembu lemadvodza awo lanemandla lamakhulu, ngetinkemba tawo kanye netilingi tawo, kutsi alahle phansi bonkhe labebayowetama kutsi bete endzaweni yabo yekutivikela ngendzawo yekungena; futsi ngaleyo ndlela atilungiselela kutsi ativikele kumaLamani.

21 Futsi kwenteka kutsi tindvuna temaLamani tawaletsa emabutfo ato phambi kwendzawo yekungena, acala alwa nemaNefi, kute bangene endzaweni yawo yekutivikela; kodvwa bukani, achutjwa abuyiselwa emuva tikhatsi ngetikhatsi, kangangoba abulawa kakhulu.

22 Manje ngesikhatsi abona kutsi bekangakhoni kutfola emandla ngetulu kwemaNefi ngendlela yekungena, acala kutidzilita tindvundvuma temhlabatsi kute atfole indlela yekungena kuya emabutfweni awo, kute abe nelitfuba lelilinganako lekulwa; kodvwa bukani, kulemetamo besuswa ngematje kanye nemicibisholo leyayijikijelwa kubo; futsi esikhundleni sekugcwalisa imisele yawo ngekutsi badvonse tindvundvuma temhlabatsi, yagcwala yaba sezingeni lelitsite ngalabafile bawo kanye nemitimba lelimele.

23 Ngaleyo ndlela emaNefi aba nemandla onkhe ngetulu kwetitsa tawo; futsi ngalokunjalo emaLamani etama kutsi abulale emaNefi tate tonkhe tindvuna tawo letinkhulu tabulawa; yebo, futsi kwabulawa emaLamani langetulu kwenkhulungwane; lokwatsi, ngakulolunye luhlangotsi, kwababete namunye umphefumulo wemaNefi lowabulawa.

24 Bekukhona cishe labangemashumi lasihlanu labalimala, labebasebaleni emicibisholweni yemaLamani ekungeneni, kodvwa bebavikelwe tihlangu tabo, netivikelo tesifuba tabo, kanye nangetivikelo tenhloko tabo, kangangoba emanceba abo abesemilenteni, lamanyenti awo abematima kakhulu.

25 Futsi kwenteka, kutsi ngesikhatsi emaLamani abona kutsi tindvuna tawo letinkhulu tonkhe tasetibulewe abalekela ehlane. Futsi kwenteka kutsi abuyela eveni laNefi, kutsi ayobikela inkhosi yawo Amalikhiya, lobekangumNefi ngekutalwa, mayelana nekulahlekelwa kwabo lokukhulu.

26 Futsi kwenteka kutsi wabatfukutselela kakhulu bantfu bakhe, ngenca yekutsi bekangakasizuzi sifiso sakhe kumaNefi, abengatange akhone kubayisa ngaphansi kwelijoko lebugcili.

27 Yebo, watfukutsela kakhulu, futsi wamcalekisa Nkulunkulu, kanjalo naMoroni, afunga ngesifungo kutsi uyawuyinatsa ingati yakhe; loku ngenca yekutsi Moroni bekagcine imiyaleto yaNkulunkulu ekulungiseleleni kuphepha kwebantfu bakhe.

28 Futsi kwenteka, kutsi ngakulolunye luhlangotsi, bantfu baNefi bayibonga iNkhosi Nkulunkulu wabo, ngenca yemandla ayo langenakulinganiswa ekubakhululeni etandleni tetitsa tabo.

29 Yaphela kanjalo-ke iminyaka lelishumi nemfica yekubusa kwebehluleli ngetulu kwebantfu baNefi.

30 Yebo, futsi kwaba khona kuthula njalo emkhatsini wabo, kanye nemphumelelo lenkhulu kakhulu ebandleni ngenca yekulalela kwabo kanye nekukhutsala lababa nako evini laNkulunkulu lelalishunyayelwe kubo nguHelamani, naShibloni, naKhoriyantoni na-Amoni kanye nabomnakabo, yebo, kanye nabo bonkhe labo labebabekwe ngekweluhlelo lolungcwele lwaNkulunkulu, babhajatiselwe ekuphendvukeni, futsi batfunyelwa kutsi bayoshumayela emkhatsini webantfu.