1 Buka, manje kwenteka kutsi bantfu baNefi bebajabule kakhulu, ngoba iNkhosi yayiphindze yabakhipha futsi etandleni tetitsa tabo; ngako-ke bayibonga iNkhosi Nkulunkulu wabo; yebo, bazila kakhulu baphindze bathandaza kakhulu, bamkhonta Nkulunkulu ngenjabulo lenkhulu kakhulu.

2 Futsi kwenteka ngemnyaka welishumi nemfica wekubusa kwebehluleli ngetulu kwebantfu baNefi, kutsi Alma weta kundvodzana yakhe Helamani watsi kuyo: Uyawakholwa yini emavi lengawakhuluma kuwe mayelana naleyo mibhalo legciniwe na?

3 Helamani watsi kuye: Yebo, ngiyawakholwa.

4 Alma waphindze watsi: Uyakholwa yini kuJesu Khristu, lotawubuya na?

5 Watsi: Yebo, ngiyawakholwa onkhe emavi lowakhulumile.

6 Alma waphindze watsi kuye: Utawuyigcina yini imiyaleto yami na?

7 Watsi: Yebo, ngitawuyigcina imiyaleto yakho ngayo yonkhe inhlitiyo yami.

8 Emvakwaloko Alma watsi kuye: Ubusisiwe; futsi iNkhosi itawukuphumelelisa kulelive.

9 Kodvwa buka, nginalokutsite lengitawukuphrofetha kuwe; kodvwa loko lengitawukuphrofetha kuwe ungakuveti; yebo, loku lengikuphrofetha kuwe akuyuvetwa, site siphrofetho sigcwaliseke; ngako-ke bhala lamavi lengitawuwakhuluma.

10 Nawa lamavi: Buka, ngiyabona kutsi bona kanye laba bantfu, emaNefi, ngekwemoya wekwembulelwa lokimi, eminyakeni lengemakhulu lamane kusukela ngaleso sikhatsi Jesu Khristu ayawutiveta ngaso kubo, bayawuncishelwa lukholo.

11 Yebo, futsi ngaleso sikhatsi bayawubona timphi kanye nabomashayabhuce betifo, yebo, indlala kanye nekucitseka kwengati, bate bantfu baNefi baphele nya—

12 Yebo, futsi loku kungenca yekutsi bayawuncishelwa lukholo bawele emisebentini yebumnyama, kanye nasetinkhanukweni, kanye nakuto tonkhe tinhlobo tebubi; yebo, ngitsi kuwe, ngenca yekutsi bayawukona ngalokumelene nekukhanya lokukhulu kangaka kanye nelwati lolungaka, yebo, ngitsi kuwe, kusukela ngalelo langa, nesitukulwane sesine angeke sendlule sonkhe ngaphambi kwekutsi lobu bubi lobukhulu bufike.

13 Futsi ngesikhatsi lelo langa lelikhulu lifika, buka, sikhatsi siyeta masinyane kutsi labo manje, noma intalelwane yalabo manje lababalwa emkhatsini wentalelwane yebantfu baNefi, angeke babalwe emkhatsini webantfu baNefi.

14 Kodvwa loyo loyawusala, angabulawa ngalelo langa lelikhulu nalelesabekako, uyawubalwa emkhatsini wemaLamani, futsi uyawuba njengawo, bonkhe, ngaphandle nje kwalabambalwa labayawubitwa ngebafundzi beNkhosi; futsi emaLamani ayawubatingela bate baphele nya. Manje, ngenca yebubi, lesiphrofetho siyawugcwaliseka.

15 Manje kwenteka kutsi emvakwekutsi Alma asatishito leti tintfo kuHelamani, wambusisa, kanjalo nalamanye emadvodzana akhe; ngetulu kwaloko wawubusisa umhlaba ngenca yalabalungile.

16 Watsi: Naku lokushiwo yiNkhosi Nkulunkulu—Liyawucalekiswa lelive, yebo, leli live, kuto tonkhe tive, tihlobo, tilimi, kanye nebantfu, kuye ekubhujisweni, kwabo labenta bubi, uma sebavutfwe ngalokuphelele; futsi njengobe sengishito kuyawuba njalo; ngoba lesi sicalekiso kanye nesibusiso saNkulunkulu kulelive, ngoba iNkhosi ayinakusibuka sono isivumele ngisho nakancane.

17 Manje ngesikhatsi Alma sekawashito lamavi walibusisa libandla, yebo, bonkhe labo labebatawukuma bacine elukholweni kusukela ngaleso sikhatsi kuya phambili.

18 Futsi ngesikhatsi Alma sekakwentile loku wesuka waphuma eveni laseZarahemla, kwaba shangatsi uya eveni laseMeleki. Futsi kwenteka kutsi akuphindzanga kwevakala lutfo ngaye; mayelana nekufa kwakhe noma kungcwatjwa kwakhe asati lutfo ngako.

19 Buka, nguloku lesikwatiko, kutsi abeyindvodza lelungile; futsi emahemuhemu agcwala live lonkhe ebandleni kutsi watsatfwa nguMoya, noma wangcwatjwa ngesandla seNkhosi, njengaMosi. Kodvwa buka, imibhalo lengcwele itsi iNkhosi yamtsatsa Mosi yamletsa kuyo; futsi siyacabanga kutsi ngalokunjalo seyimemukele na-Alma emoyeni, yamletsa kuyo; ngako-ke, ngenca yalesi sizatfu asati lutfo mayelana nekufa kanye nekungcwatjwa kwakhe.

20 Manje kwenteka ekucaleni kwemnyaka welishumi nemfica wekubusa kwebehluleli ngetulu kwebantfu baNefi, kutsi Helamani wahamba emkhatsini webantfu kute amemetele livi kubo.

21 Ngoba buka, ngenca yetimphi tabo nemaLamani kanye nekuphikisana lokunyenti lokungasho lutfo kanye nekuphatamiseka lokwakusemkhatsini webantfu, kwabonakala kufanele kutsi livi laNkulunkulu limenyetelwe emkhatsini wabo, yebo, nekutsi kuhlelembiswe libandla lonkhe.

22 Ngako-ke Helamani kanye nabomnakabo bachubeka nekusungula libandla futsi eveni lonkhe, yebo, kuwo onkhe emadolobha eveni lonkhe lokwakulebantfu baNefi. Futsi kwenteka kutsi babeka baphristi kanye nebafundzisi kulo lonkhe live, ngetulu kwawo onkhe emabandla.

23 Manje kwenteka kutsi emvakwekutsi Helamani kanye nabomnakabo sebabeke baphristi kanye nebafundzisi ebandleni kwavuka kuphikisana emkhatsini wabo, futsi abafunanga kulalela emavi aHelamani kanye nabomnakabo;

24 Kodvwa bakhula ekutikhukhumeteni baphakeme etinhlitiyweni tabo, ngenca yemicebo yabo leminyenti kakhulu; ngako-ke bakhula banotsa emehlweni abo, futsi abafunanga kulalela emavi abo, kutsi bahambe ngebucotfo phambi kwaNkulunkulu.