1 Buka, manje kwenteka kutsi emvakwekutsi bantfu baka-Amoni sebahleti eveni laseJeshoni, yebo, ngetulu kwaloko emvakwekutsi emaLamani sekakhishiwe aphuma eveni, nalabafile bawo sebangcwatjwe bantfu baseveni—

2 Manje labafile bawo bebangakabalwa ngenca yebukhulu besibalo sabo; ngalokunjalo nalabo bemaNefi labebafile ababalwanga—kodvwa kwenteka emvakwekutsi sekabangcwabile labafile bawo, futsi ngalokunjalo nasemvakwemalanga ekuzila, newekulila, kanye newemthandazo, (futsi bekungumnyaka welishumi nesitfupha wekubusa kwebehluleli ngetulu kwebantfu baNefi) kwacala kwabakhona kuthula njalo kulo lonkhe live.

3 Yebo, futsi bantfu betama kugcina imiyaleto yeNkhosi; bacinile ekugcineni timiso taNkulunkulu, ngekwemtsetfo waMosi; ngoba bafundziswa kutsi bawugcine umtsetfo waMosi ute ugcwaliseke.

4 Ngaleyo ndlela bantfu abatange babe nekuphatamiseka umnyaka wonkhe welishumi nesitfupha wekubusa kwebehluleli ngetulu kwebantfu baNefi.

5 Futsi kwenteka kutsi ekucaleni kwemnyaka welishumi nesikhombisa wekubusa kwebehluleli, kwaba khona kuthula njalo.

6 Kodvwa kwenteka ekupheleni kwemnyaka welishumi nesikhombisa, kwefika indvodza eveni laseZarahemla, lebeyinguMphikaKhristu, ngoba yacala kushumayela kubantfu iphikisana netiphrofetho lebetikhulunywe baphrofethi, mayelana nekuta kwaKhristu.

7 Manje bekute umtsetfo lophikisana nenkholelo yemuntfu; ngoba bekuphambene ngalokuphelele nemiyalo yaNkulunkulu kutsi kube khona umtsetfo loyawukwenta bantfu bangalingani.

8 Ngoba naku lokushiwo ngumbhalo longcwele: Khetsani lamuhla, kutsi ngubani lenitawumkhonta.

9 Manje uma umuntfu bekafisa kutsi asebentele Nkulunkulu, bekulilungelo lakhe; noma ngalokungiko, uma akholwa kuNkulunkulu bekulilungelo lakhe kutsi amsebentele; kodvwa uma bekangakholwa kuye bekute umtsetfo wekumjezisa loyo.

10 Kodvwa uma abulele bekajeziswa ngekufa; uma agebengile ngalokunjalo bekajeziswa; uma ebile ngalokunjalo bekajeziswa; futsi uma aphingile ngalokunjalo bekajeziswa; yebo, ngabo bonkhe lobubi bebajeziswa.

11 Ngoba bekukhona umtsetfo wekutsi bantfu kumele behlulelwe ngekwemacala abo. Noko, bekute umtsetfo lophikisana nenkholelo yemuntfu; ngako-ke, umuntfu bekajeziswa kuphela ngemacala lawo labekawentile; ngako-ke bonkhe bantfu bebalingana.

12 Futsi loMphikaKhristu, libito lakhe bekunguKorihori, (nemtsetfo wawungenawukwati kutsi umbambe) wacala kushumayela kubantfu kutsi angeke kube khona Khristu. Washumayela ngalendlela watsi:

13 O nine leniboshelwe phansi ngaphansi kwelitsemba lelibulima futsi lelilite, kungani nitibophela ngaleti tintfo letibulima kangaka na? Kungani nigadze Khristu na? Ngoba kute umuntfu longati intfo lesatawukwenteka.

14 Bukani, leti tintfo lenitibita ngetiphrofetho, lenitsi tendluliselwa kulabanye ngebaphrofethi labangcwele, bukani, tingemasiko labulima abokhokho benu.

15 Nilati kanjani liciniso lato na? Bukani, ngeke nitati tintfo leningatiboni; ngako-ke ngeke nati kutsi kuyawuba khona Khristu.

16 Nilindzile futsi nitsi nibona kutsetselelwa kwetono tenu. Kodvwa bukani, kungumphumela wekulutseka kwengcondvo; futsi loku kuphambana kwetingcondvo tenu kuta ngenca yemasiko aboyihlo, aniholela ekukholweni tintfo letingasilo liciniso.

17 Tinyenti tintfo letinje latikhuluma kubo, abatjela kutsi kute inhlawulo lengentelwa tono tebantfu, kodvwa wonkhe umuntfu uva lokuhle nalokubi kulemphilo ngekutiphatsa kwakhe; ngako-ke wonkhe umuntfu uphumelela ngekuhlakanipha kwakhe, nekutsi wonkhe umuntfu uncoba ngekwemandla akhe; futsi noma ngabe yini umuntfu layentako ayisilo licala.

18 Washumayela ngaleyo ndlela kubo, aholela khashane tinhlitiyo talabanyenti, abenta kutsi batichenye ngebubi babo, yebo, aholela khashane labanyenti besifazane, kanjalo nemadvodza, kutsi bente bugwadla—abatjela kutsi uma umuntfu sekafile, loko kukuphela kwakhe.

19 Manje lendvodza yaphindze yahamba yawela eveni laseJeshoni, kute iyawushumayela letintfo emkhatsini webantfu ba-Amoni, lebebake baba bantfu bemaLamani.

20 Kodvwa buka bona bebahlakaniphe kakhulu kunalabanyenti bemaNefi; ngoba bona bamtsatsa; bambopha, bamtfwala bamyisa ngaphambi kwa-Amoni, lobekangumphristi lomkhulu ngetulu kwalabo bantfu.

21 Futsi kwenteka kutsi wenta kutsi atfwalwe akhishelwe ngaphandle kwelive. Futsi wawelela eveni laGideyoni, wacala kushumayela kubo; lapha akatange abe nemphumelelo lenkhulu, ngoba watsatfwa waboshwa watfwalwa wayiswa ngaphambi kwemphristi lomkhulu, nakumehluleli lomkhulu eveni.

22 Futsi kwenteka kutsi umphristi lomkhulu watsi kuye: Kungani uhamba uzulazula ugucula tindlela teNkhosi na? Kungani ufundzisa labantfu kutsi angeke abe khona Khristu, kuphatamisa intfokoto yabo na? Kungani ukhuluma ngekuphikisana netiphrofetho tonkhe tebaphrofethi labangcwele na?

23 Manje libito lalomphristi lomkhulu bekunguGidona. Korihori watsi kuye: Ngoba angifundzisi bulima bemasiko abokhokho benu, futsi angifundzisi labantfu kutsi batibophele phansi ngaphansi kwetimiso kanye netento letibulima letamiswa baphristi basendvulo, kute batfole emandla ngalokungalungi kanye neligunya ngetulu kwabo, kute babagcine bete lwati, kute bangatichenyi, kodvwa behliselwe phansi ngekwemavi enu.

24 Nitsi labantfu babantfu labakhululekile. Bukani, ngitsi basebugcilini. Nitsi leto tiphrofetho tasemandvulo tiliciniso. Bukani, ngitsi anati kutsi tiliciniso.

25 Nitsi labantfu babantfu labanelicala futsi labawile, ngenca yesiphambeko semtali. Bukani, ngitsi umntfwana akanacala ngenca yebatali bakhe.

26 Futsi niphindze nitsi Khristu uyawubuya. Kodvwa bukani, ngitsi anati kutsi kuyawuba khona Khristu. Futsi niphindze nitsi uyawubulawa ngenca yetono temhlaba—

27 Ngaleyo ndlela nidukisa labantfu ngekulandzela bulima bemasiko abokhokho benu, futsi njengekwetifiso tenu lucobo; nibacindzetela phansi, njengobe kwakunjalo basebugcilini, kute nititike ngemisebenti yetandla tabo, kute bangalokotsi nakancane bajabulele lokulungile nalokungemalungelo abo.

28 Yebo, abakwati nakancane kusebentisa loko lokungekwabo funa bone baphristi babo, labebabagcilata ngekwetifiso tabo, lababenta kutsi bakholelwe, emasikweni abo nasemaphusheni abo nasemicabangweni yabo lelite nasemibonweni yabo kanye nasetimfihlakalweni tabo letingekho, kute, uma bangentanga ngekwemavi abo, bone umuntfu lotsite longatiwa, labatsi nguNkulunkulu—umuntfu longakate nanini abonwe noma atiwe, longakate abe khona futsi longayuze abe khona nanini.

29 Manje ngesikhatsi umphristi lomkhulu kanye nemehluleli lomkhulu babubona bulukhuni benhlitiyo yakhe, yebo, ngesikhatsi babona kutsi bekatawutfuka ngisho naNkulunkulu, abamphendvulanga emavini akhe; kodvwa benta kutsi aboshwe; bamnika labaphetse, baphindze bamtfumela eveni laseZarahemla, kute ayovela ngaphambi kwa-Alma, kanye nemehluleli lomkhulu nalobekangumbusi ngetulu kwelive lonkhe.

30 Futsi kwenteka kutsi ngesikhatsi sekaletfwe phambi kwa-Alma kanye nemehluleli lomkhulu, wachubeka ngaleyo ndlela lefanako njengobe enta eveni laGideyoni; yebo, wachubeka nekuhlambalata.

31 Wasukuma wakhuluma emagama ekutigabatisa phambi kwa-Alma, wabetfuka baphristi kanye nebafundzisi, wababeka licala lekudukisa bantfu ngekubenta balandzele emasiko lalibele abokhokho babo, ngenca nje yekufuna kutitika ngemisebenti yebantfu.

32 Manje Alma watsi kuye: Uyati kutsi asititiki ngemisebenti yalabantfu; ngoba buka ngisebente kusukela ekucaleni kwekubusa kwebehluleli kute kube ngunyalo, ngetandla tami lucobo kute ngitondle, nanoma kungenca yekuhamba kwami lokunyenti ngitungeleta eveni ngimemetela livi laNkulunkulu kubantfu bami.

33 Futsi nanoma kungekwemisebenti leminyenti lengiyenta ebandleni, angikate ngemukele ngisho nje isenine yinye ngekusebenta kwami; futsi ngisho namunye kubomnaketfu, ngaphandle kwekutsi kube sesihlalweni sekwehlulela; nakhona semukela kuphela ngekwemtsetfo ngesikhatsi setfu.

34 Manje, uma singemukeli lutfo ngekwemisebenti yetfu ebandleni, kusisita ngani kutsi sisebente ebandleni ngaphandle kwekutsi simemetela liciniso, kute sibe nekutfokota ngekujabula kwabomnaketfu na?

35 Uma kunjalo usholani kutsi sishumayele kulaba bantfu kute sitfole inzuzo, ube nawe, ngekwakho, wati kutsi asemukeli nzuzo? Manje, uyakholwa yini kutsi siyabakhohlisa labantfu, lokwenta injabulo lengaka etinhlitiyweni tabo?

36 Korihori wamphendvula watsi, Yebo.

37 Emvakwaloko Alma watsi kuye: Uyakholwa yini kutsi ukhona Nkulunkulu na?

38 Waphendvula watsi, Cha.

39 Manje Alma watsi kuye: Utawuphindze uphike kutsi ukhona Nkulunkulu, futsi utawuphindze umphike Khristu na? Ngoba buka, ngitsi kuwe, ngiyati ukhona Nkulunkulu, nekutsi Khristu utawubuya.

40 Manje ngubuphi bufakazi lonabo bekutsi kute Nkulunkulu, noma kutsi Khristu akayubuya na? Ngitsi kuwe awunabo nalobubodvwa, ngaphandle kwelivi lakho kuphela.

41 Kodvwa, buka, nginato tonkhe tintfo njengebufakazi bekutsi letintfo tiliciniso; nawe ngalokunjalo unato tonkhe tintfo njengebufakazi kuwe kutsi tiliciniso; ngabe utawutiphika na? Uyakholwa yini kutsi letintfo tiliciniso na?

42 Buka, ngiyati kutsi uyakholwa, kodvwa ungenwe ngumoya wenkhohliso, futsi umkhiphile Moya waNkulunkulu kute angabi nendzawo kuwe; kodvwa develi unemandla ngetulu kwakho, futsi uyakuzulazulisa, wenta emacebo kute one bantfwana baNkulunkulu.

43 Manje Korihori watsi ku-Alma: Uma ungangikhombisa sibonakaliso, kute ngikholwiseke kutsi Nkulunkulu ukhona, yebo, ngikhombise kutsi unemandla, uma kunjalo ngitawukholwiseka ngeliciniso lemavi akho.

44 Kodvwa Alma watsi kuye: Sewube netibonakaliso letenele; utawumlinga yini Nkulunkulu wakho na? Ngabe utawutsi, Ngikhombise sibonakaliso, ube unebufakazi babo bonkhe labomnakenu, futsi ngalokunjalo nabo bonkhe baphrofethi labangcwele na? Imibhalo lengcwele ibekiwe ngaphambi kwakho, yebo, tonkhe tintfo tikhomba kutsi Nkulunkulu ukhona; yebo, ngisho umhlaba, kanye nato tonkhe tintfo letikuwo, yebo, kanye nekuhamba kwawo, yebo, kanjalo nawo onkhe emaplanethi latungeletako lasesimeni sawo lesijwayelekile ayafakaza kutsi kukhona uMdali loNgetulu Kwako konkhe.

45 Futsi usaphindza uhamba wehla wenyuka, udukisa tinhlitiyo talaba bantfu, ufakaza kubo kutsi kute Nkulunkulu na? Namanje ngabe usetawubaphika yini bonkhe labofakazi na? Watsi: Yebo, ngitawuphika, ngaphandle kwekutsi ungikhombise sibonakaliso.

46 Manje kwenteka kutsi Alma watsi kuye: Buka, nginekudzabuka ngenca yebulukhuni benhlitiyo yakho, yebo, kutsi utawuvimbela namanje umoya weliciniso, kute umphefumulo wakho ubhujiswe.

47 Kodvwa buka, kuncono kutsi umphefumulo wakho ulahleke kunekutsi ube sikhali sekuholela imiphefumulo leminyenti phansi ekubhujisweni, ngemanga akho kanye nangemavi akho lalutsako; ngako-ke uma utawuphika futsi, buka Nkulunkulu utawukushaya, kute ungakhoni kukhuluma, kute ungaphindzi uwuvule umlomo wakho nanini, kute ungabe usabakhohlisa laba bantfu nanini.

48 Manje Korihori watsi kuye: Angibuphiki bukhona baNkulunkulu; kodvwa angikholwa kutsi ukhona Nkulunkulu; futsi ngiyaphindza ngitsi, awati kutsi ukhona Nkulunkulu; ngaphandle kwekutsi ungikhombise sibonakaliso, ngeke ngikholwe.

49 Manje Alma watsi kuye: Loku ngitawukunika kona kube sibonakaliso, kutsi utawushaywa ngekutsi ungakhoni kukhuluma, ngekwemavi ami; futsi ngitsi, egameni laNkulunkulu, utawushaywa ngekutsi ungakhoni kukhuluma, kute ungaphindzi nanini ukhulume.

50 Manje ngesikhatsi Alma sekawashito lamavi, Korihori washaywa ngekutsi angakhoni kukhuluma, kangangekutsi akatange asakwati kukhuluma, njengekwemavi a-Alma.

51 Manje ngesikhatsi umehluleli lomkhulu akubona loku, welula sandla sakhe wabhalela Korihori, watsi: Ngabe sewukholwisekile yini ngemandla aNkulunkulu na? Kukubani lapho bowufuna kutsi Alma akhombise sibonakaliso sakhe? Bewufisa kutsi ahluphe labanye yini, kute akukhombise sibonakaliso? Buka, sewukukhombisile sibonakaliso; manje ngabe usetawuphika futsi?

52 Korihori welula sandla sakhe wabhala, watsi: Ngiyati kutsi angisakhoni kukhuluma, ngoba angisakhulumi; futsi ngiyati kutsi kute lutfo ngaphandle kwekutsi kungemandla aNkulunkulu longaletsa loku etikwami; yebo, futsi bengisolo ngati kutsi ukhona Nkulunkulu.

53 Kodvwa buka, develi ungikhohlisile; ngoba wavela kimi asesimeni sengilosi, watsi kimi: Hamba uyobuyisa labantfu, ngoba bonkhe badukile balandzela Nkulunkulu longatiwa. Watsi kimi: Kute Nkulunkulu; yebo, wangifundzisa loko lobekumele ngikusho. Futsi ngifundzise emavi akhe; ngiwafundzise ngoba bekatfokotisa kubantfu labanaka kwenyama; futsi ngiwafundzise, ngate ngaba nemphumelelo lenkhulu, kangangekutsi ngakholwa kutsi bekaliciniso; ngalesi sizatfu ngimelene neliciniso, ngate ngatiletsela lesi sicalekiso lesikhulu etikwami.

54 Manje ngesikhatsi sekakushito loku, wancenga Alma kutsi athandaze kuNkulunkulu kutsi sicalekiso sisuswe kuye.

55 Kodvwa Alma watsi kuye: Uma lesicalekiso singase sisuswe kuwe uyawuphindze uholele khashane tinhlitiyo talabantfu; ngako-ke, kuyawuba nje kuwe njengobe iNkhosi itsandza.

56 Futsi kwenteka kutsi sicalekiso asisuswanga kuKorihori; kodvwa wacoshwa wakhishelwa ngaphandle, wahamba azulazula umuti ngemuti acela kudla.

57 Manje lwati ngaloko lokwakwentekile kuKorihori lwasakatwa khona masinyane kulo lonkhe live; yebo, simemetelo satfunyelwa ngumehluleli lomkhulu kubo bonkhe bantfu labaseveni, amemetela kulabo labebakholelwa emavini aKorihori kutsi kufanele baphendvuke ngekushesha, funa tehlulelo letifanako tehlele kubo.

58 Futsi kwenteka kutsi bonkhe bakholwiseka ngebubi baKorihori; ngako-ke bonkhe baphindze baphendvukela eNkhosini; loku kwabucedza bubi baKorihori. NaKorihori wahamba azulazula umuti ngemuti, acela kudla kute atondle.

59 Futsi kwenteka kutsi ngesikhatsi ahamba aya emkhatsini webantfu, yebo, emkhatsini walabo bantfu labebatehlukanisile nemaNefi futsi batibita ngekutsi bangemaZoramu, baholwa yindvodza libito layo lokwakunguZoramu—ngesikhatsi ahamba aya emkhatsini wabo, buka, wanyatselwa waphindze wagcotjwa, wate wafa.

60 Ngaleyo ndlela siyasibona siphetfo saloyo loguculela tindlela teNkhosi, futsi ngaleyo ndlela siyabona kutsi develi angeke abasekele bantfwana bakhe ngelilanga lekugcina, kodvwa ubadvonsela ngekushesha phansi esihogweni.