1 Futsi kwenteka kutsi Alma kanye na-Amuleki bayaletwa kutsi besuke kulelo dolobha; besuka, bahamba bate befika eveni laseSidomu; buka, lapho batfola bonkhe bantfu labebasukile eveni lase-Amoniha, labebacoshiwe futsi bagcotjwa nangematje ngoba bakholelwa emavini a-Alma.

2 Babacocela konkhe lobekwentekile kubafati babo kanye nakubantfwana babo, kanjalo nangalokuphatselene nabo lucobo, kanye nangemandla ekukhululwa kwabo.

3 Ngetulu kwaloko Zezromu bekalele agula eSidomu, anemkhuhlane loshisako, lowawudalwe kuhlupheka lokukhulu kwengcodvo yakhe ngenca yebubi bakhe, ngoba bekacabanga kutsi Alma na-Amuleki bebangasekho; futsi bekacabanga kutsi bebabulewe ngenca yebubi bakhe. Lesi sono lesikhulu, kanye naletinye tono takhe letinyenti, tayihlupha ingcondvo yakhe yate yaba buhlungu kakhulu, angenakukhululwa, ngako-ke wacala wahlushwa kushisa lokukhulu.

4 Manje ngesikhatsi eva kutsi Alma na-Amuleki bebaseveni laseSidomu, inhlitiyo yakhe yacala kuma sibindzi, watfumela umlayeto ngekushesha kubo, afisa kutsi bete kuye.

5 Futsi kwenteka kutsi bahamba ngekushesha, balalela umlayeto lobekawutfumele kubo; bahamba bangena endlini kuye Zezromu; bamtfola alele embhedzeni wakhe, agula, aphansi kakhulu ngenca yemkhuhlane loshisako; futsi nengcondvo yakhe nayo yayikhatsatekile kakhulu ngenca yebubi bakhe; ngesikhatsi ababona welula sandla sakhe, wabancenga kutsi bamelaphe.

6 Futsi kwenteka kutsi Alma watsi kuye, ambambe ngesandla: Uyakholelwa yini emandleni aKhristu ekusindzisa na?

7 Waphendvula watsi: Yebo, ngiyawakholwa onkhe emavi lowuwafundzisile.

8 Alma watsi: Uma ukholwa ekuhlengweni kwaKhristu ungaphiliswa.

9 Watsi: Yebo, ngiyakholwa ngekwemavi akho.

10 Emvakwaloko Alma wakhala eNkhosini, watsi: O Nkhosi Nkulunkulu wetfu, yiba nebubele kulendvodza, uyiphilise ngekwelukholo lwayo lolukuKhristu.

11 Futsi ngesikhatsi Alma sekawashito lamavi, Zezromu wagcuma wema ngetinyawo takhe, wacala kuhamba; loku kwenteka kwabamangalisa kakhulu bonkhe bantfu; futsi lwati lwaloku lwahamba lwefika eveni lonkhe laseSidomu.

12 Alma wabhabhatisa Zezromu eNkhosini; futsi wacala kusukela ngaleso sikhatsi kuya embili kutsi ashumayele kubantfu.

13 Alma wasungula libandla eveni laseSidomu, waphindze wabeka baphristi kanye nebafundzisi eveni, kutsi babhabhatise eNkhosini noma ngubani lobekanesifiso sekubhajatiswa.

14 Futsi kwenteka kutsi bebabanyenti; ngoba batseleka bavela kuto tonkhe tifundza letitungelete iSidomu, futsi babhajatiswa.

15 Kodvwa kulabantfu labebaseveni lase-Amoniha, bekusesele bantfu labanetinhlitiyo letilukhuni kanye nalabanenkhani; futsi abaphendvukanga etonweni tabo, batsi onkhe emandla a-Alma na-Amuleki adeveli; ngoba bebabenkholo yaNehori, futsi bangakholelwa ekuphendvukeni kwetono tabo.

16 Futsi kwenteka kutsi Alma na-Amuleki, Amuleki ngenca yekutsi bekasashiye lonkhe ligolide lakhe, nesiliva, kanye netintfo takhe letiligugu, letatiseveni lase-Amoniha, ngenca yelivi laNkulunkulu, ekubeni alahlwe ngulabo labake baba bangani bakhe futsi kanjalo nanguyise kanye netihlobo takhe;

17 Ngako-ke, emvakwekutsi Alma asasungule libandla eSidomu, abona kutilawula lokukhulu, yebo abona kutsi bantfu bayalawulwa ekutichenyeni kwabo, futsi bacala kutehlisa phambi kwaNkulunkulu, bacala kugcogcana ndzawonye etindzaweni tabo letingcwele kute badvumise Nkulunkulu phambi kwelilati, bacaphela baphindze bathandaza ngaso sonkhe sikhatsi kutsi bakhululwe kuSathane, nasekufeni, kanye nasekubhujisweni—

18 Manje njengobe ngishito, Alma asatibonile tonkhe leti tintfo, ngako-ke watsatsa Amuleki waya naye eveni laseZarahemla, wamtsatsa wamyisa endlini yakhe, wamsita ekuhluphekeni kwakhe, wamcinisa eNkhosini.

19 Waphela kanjalo-ke umnyaka welishumi wekubusa kwebehluleli ngetulu kwebantfu baNefi.