1 Manje kwenteka kutsi emvakwekutsi Alma sekente siphetfo senkhulumo ebantfwini belibandla, lelalisungulwe edolobheni laseZarahemla, wababeka baphristi kanye nebabonisi, ngekubabeka tandla takhe ngekweluhlelo lwaNkulunkulu, kutsi bengamele futsi babuke libandla.

2 Futsi kwenteka kutsi loyo lobekangasiye welibandla kulabo labebaphendvuka etonweni tabo babhajatiselwa ekuphendvukeni, bemukelwa ebandleni.

3 Ngetulu kwaloko kwenteka kutsi loyo lobekawasebandleni kulabo labebangakaphendvuki ebubini babo futsi batitfobe ngaphambi kwaNkulunkulu—ngisho labo labebatiphakamise ngekutikhukhumeta etinhlitiyweni tabo—bona kanye bebalahlwa, futsi nemabito abo bekesulwa, kute emabito abo angabalwa, emkhatsini walabo labebalungile.

4 Ngaleyo ndlela bacala kusungula luhlelo lwelibandla edolobheni laseZarahemla.

5 Manje ngifuna kutsi nicondze kutsi livi laNkulunkulu belitfolakala kubo bonkhe, kangangekutsi bekute labebangakatjelwa ngelilungelo lekuhlangana ndzawonye kutsi beve livi laNkulunkulu.

6 Noko bantfwana baNkulunkulu bayaletwa kutsi babutsane ndzawonye njalo, bahlanganyele ekuzileni kanye nasekuthandazeni lokukhulu kute kuzuze imiphefumulo yalabo labebangamati Nkulunkulu.

7 Manje kwenteka kutsi ngesikhatsi Alma sekente lemitsetfo wesuka kubo, yebo, wesuka ebandleni lebelisedolobheni laseZarahemla, wahamba wawelela ngasemphumalanga yemfula iSidoni, esigodzini saGideyoni, lapho bekwakhiwe lidolobha khona, lebelibitwa ngelidolobha laGideyoni, lebelisesigodzini lebesibitwa ngekutsi yiGideyoni, lesabitwa ngendvodza leyabulawa ngesandla saNehori ngenkemba.

8 Futsi Alma wahamba wacala kumemetela livi laNkulunkulu ebandleni lelalisungulwe esigodzini saGideyoni, njengekwembulwa kweliciniso lelivi lebelikhulunywe nguyise, futsi nanjengekwemoya wesiphrofetho lobewukuye, ngebufakazi baJesu Khristu, indvodzana yaNkulunkulu, loyawubuya kutawuhlenga bantfu bakhe etonweni tabo, kanye nangeluhlelo lolungcwele lobekabitwe ngalo. Futsi kubhalwe kanjalo. Amen.