1 Manje kwenteka ngemnyaka wesitfupha wekubusa kwebehluleli ngetulu kwebantfu baNefi, akutange kube khona tincabano netimphi eveni laseZarahemla;

2 Kodvwa bantfu bebakhatsatekile, yebo, bakhatsateke kakhulu ngenca yekulahlekelwa bomnakabo, nangenca yekulahlekelwa yimihlambi yetimvu kanye nemihlambi yetinkhomo tabo, kanjalo neyekulahlekelwa ngemasimi alokuyinhlavu kwabo, labekanyatselwe ngetinyawo abhujiswa ngemaLamani

3 Futsi betitinkhulu kakhulu tinhlupheko tabo kangangekutsi yonkhe imiphefumulo yayinesizatfu sekukhala; futsi bebakholelwa kutsi bekutehlulelo taNkulunkulu lebetitfunyelwe kubo ngenca yebubi babo kanye netinengiso tabo; ngaloko-ke bavuselwa ekukhumbuleni umsebenti wabo.

4 Futsi bacala kusungula libandla ngalokugcwele; yebo, labanyenti babhajatiswa emantini aseSidoni baphindze bahlanganiswa nelibandla laNkulunkulu; yebo, babhajatiswa ngesandla sa-Alma, lobekabekwe kutsi abe ngumphristi lomkhulu kubantfu belibandla, ngesandla seyise Alma.

5 Futsi kwenteka kutsi ngemnyaka wesikhombisa wekubusa kwebehluleli kwabakhona cishe bantfu labatinkhulungwane letintsatfu nemakhulu lasihlanu labatihlanganisa nelibandla laNkulunkulu baphindze babhajatiswa. Waphela kanjalo-ke umnyaka wesikhombisa wekubusa kwebehluleli ngetulu kwebantfu baNefi; futsi kwabakhona kuthula njalo ngaso sonkhe leso sikhatsi.

6 Futsi kwenteka kutsi ngemnyaka wesiphohlongo wekubusa kwebehluleli, bantfu belibandla bacala baba nekutigcabha, ngenca yemcebo wabo lomnyenti, kanye nesilika yabo lecolisakele, nelineni yabo leyephotselwe ngalokucolisakele, futsi nangenca yemihlambi yabo yetimvu kanye nemihlambi yabo yetinkhomo leminyenti, neligolide labo, nesiliva yabo, kanye nato tonkhe tintfo letiligugu, lebebatitfole ngekusebenta kwabo; kuto tonkhe leti tintfo batiphakamisa ngekutikhukhumeta emehlweni abo, ngoba bacala kugcoka tingubo letibitako.

7 Manje loku kwaba sizatfu sekukhatsateka kwa-Alma, yebo, futsi nakulabanyenti bantfu Alma labekababeke kutsi babe bafundzisi, nebaphristi, kanye nebabonisi ebandleni; yebo, labanyenti babo bebadzabuke kakhulu ngenca yebubi labebabubona kutsi besebucale kuba khona emkhatsini webantfu.

8 Ngoba babona futsi babuka ngelusizi lolukhulu kutsi bantfu belibandla bacala kutsi batiphakamise ngekutikhukhumeta emehlweni abo, kanye nekutsi babeke tinhlitiyo tabo kumcebo kanye nasetintfweni letilite telive, nekutsi bacala baba nekwedzelela, lomunye kulomunye, bacala bahlupha labo labebangakholwa njengekwentsandvo nangekwesifiso sabo.

9 Futsi ngenca yaloko, kulowo mnyaka wesiphohlongo wekubusa kwebehluleli, kwacala kwabakhona tincabano letinkhulu emkhatsini webantfu belibandla; yebo, kwabakhona umona, nencabano, nenzondo, nekuhluphana, kanye nekutatisa, lokwendlula kutikhukhumeta kwalabo labekungibo belibandla laNkulunkulu.

10 Waphela kanjalo-ke umnyaka wesiphohlongo wekubusa kwebehluleli; futsi bubi belibandla bebusikhubekiso lesikhulu kulabo labebangasibo balo libandla; ngaleyo ndlela libandla lacala kwehluleka kunchubekelaphambili yalo.

11 Futsi kwenteka kutsi ekucaleni kwemnyaka wemfica, Alma wabubona bubi belibandla, waphindze wabona kutsi sibonelo selibandla sacala kutsi siholele labo labebangakholwa kusuka ebubini lobutsite kuya kulobunye bubi, ngalendlela baletsa kubhujiswa kwebantfu.

12 Yebo, wabona kungalingani lokukhulu emkhatsini webantfu, labanye batiphakamisa ngekutatisa kwabo, babukela phansi labanye, bafulatsela labadzingako nalabangcunu nalabebalambile, nalabebomile, kanye nalabo labebagula futsi bahluphekile.

13 Manje loku bekusizatfu lesikhulu sekulila emkhatsini webantfu, labanye batehlisa, basita labo labebadzinga kusitwa ngibo, njengekunika loko labanako kulabamphofu nalabadzingako, bapha labalambile, futsi babeketelela tonkhe tinhlobo tetinhlupheko, ngenca yaKhristu, lekufanele ete njengekwemoya wesiphrofetho.

14 Babuke phambili kulelo langa, ngaleyo ndlela bagcina kutsetselelwa kwetono tabo; bagcwaliswa ngenjabulo lenkhulu ngenca yekuvuswa kwalabafile, ngekwentsandvo kanye nemandla kanye nekukhululwa kwaJesu Khristu ekuboshweni kwekufa.

15 Manje kwenteka kutsi Alma, sekatibonile tinhlupheko tebalandzeli baNkulunkulu labatfobekile, kanye nekuhlushwa lebekubekwe etikwabo ngulabasele bebantfu bakhe, futsi abona konkhe kungalingani kwabo, wacala kuba nelusizi lolukhulu; noko Moya weNkhosi awumshiyanga.

16 Wakhetsa indvodza lehlakaniphile lebeyisemkhatsini webabonisi belibandla, wayinika emandla njengekwelivi lebantfu, kutsi ibe nemandla ekutsi ishaye imitsetfo ngekwemitsetfo lebeyiniketiwe, nekutsi iyisebentise ngekwebubi kanye nemacala ebantfu.

17 Manje libito lalendvodza bekunguNefiha, futsi yakhetfwa kutsi ibe ngumehluleli lomkhulu; yahlala esihlalweni sekwehlulela kutsi ihlulele iphindze iphatse bantfu.

18 Manje Alma akayiniketanga sikhundla sekutsi ibe ngumphristi lomkhulu ngetulu kwelibandla, kodvwa wasigcina kuye lesi sikhundla sekuba ngumphristi lomkhulu; kodvwa sihlalo sekwehlulela wasiniketa Nefiha.

19 Loku wakwenta kute yena lucobo ahambe emkhatsini webantfu bakhe, noma emkhatsini webantfu baNefi, ashumayele livi laNkulunkulu kubo, kute abaphehle kutsi bakhumbule umsebenti wabo, nekutsi akudvonsele phansi, ngelivi laNkulunkulu, konkhe kutikhukhumeta nebucili kanye nato tonkhe tincabano lebetisemkhatsini webantfu bakhe, angayiboni lenye indlela yekutsi ababuyise ngaphandle kwekutsi abacindzetele ngekuniketa bufakazi lobumsulwa ngekumelana nabo.

20 Ngenca yaloko ekucaleni kwemnyaka wemfica wekubusa kwebehluleli ngetulu kwebantfu baNefi, Alma wanika sihlalo sekwehlulela kuNefiha, yena watinikela ngalokuphelele ebuphristini lobukhulu beluhlelo lolungcwele lwaNkulunkulu, ngebufakazi belivi, ngekwemoya wekwembulelwa kanye newekuphrofetha.