1 Ndvodzana yami, lalela emavi ami, ngoba ngitsi kuwe, njengobe ngasho kuHelamani, kutsi nangabe uyawuyigcina imiyaleto yaNkulunkulu uyawuphumelela eveni; futsi nangabe ungeke uyigcine imiyaleto yaNkulunkulu uyawuhlukaniswa naye.

2 Manje, ndvodzana yami, ngiyetsemba kutsi ngitawuba nentfokoto lenkhulu ngawe, ngenca yekucina kwakho kanye nekwetsembeka kwakho kuNkulunkulu; njengobe ucale usesebusheni bakho kutsi ubuke eNkhosini Nkulunkulu wakho, nakanjalo ngiyetsemba kutsi utawuchubeka nekugcina imiyaleto yayo; ngoba ubusisiwe loyo lobeketela kute kube sekugcineni.

3 Ngitsi kuwe, ndvodzana yami, sengivele nginako kutfokota lokukhulu ngawe, ngenca yekwetsembeka kwakho nekukhutsala kwakho, nekubeketela kwakho kanye nekumela bulukhuni kwakho emkhatsini walaba bantfu bemaZoramu.

4 Ngoba ngiyati kutsi wawuboshiwe; yebo, futsi ngetulu kwaloko ngiyati kutsi wagcotjwa ngematje ngenca yelivi; watetfwala tonkhe letintfo ngekubeketela ngenca yekutsi iNkhosi yayinawe; futsi manje sewuyati kutsi iNkhosi yakukhulula.

5 Manje ndvodzana yami, Shibloni, ngifuna kutsi ukhumbule, kutsi njengobe uyawubeka litsemba lakho kuNkulunkulu nakanjalo uyawukhululwa uphume etilingweni takho, nasetinkhatsatweni takho, kanye nasetinhluphekweni takho, uyawuphakanyiswa ngelilanga lekugcina.

6 Manje, ndvodzana yami, angifuni kutsi ucabange kutsi ngiyatatela ngekwami leti tintfo, kodvwa nguMoya waNkulunkulu lokimi lowembula leti tintfo kimi; ngoba kube bengingatalwa nguNkulunkulu bengingeke ngitati letintfo.

7 Kodvwa buka, iNkhosi ngebubele bayo lobukhulu yatfumela ingilosi yayo kutsi imemetele kimi kutsi kufanele ngiwuyekele umsebenti wekubhubhisa emkhatsini webantfu bayo; yebo, futsi ngibone ingilosi buso nebuso, yakhuluma nami, livi layo belinjengekudvuma, latamatamisa umhlaba wonkhe.

8 Futsi kwenteka kutsi emalanga lamatsatfu kanye nebusuku lobutsatfu ngangisebuhlungwini lobukhulu kakhulu kanye naselusizini lolukhulu lwemphefumulo; futsi angitange nanini, ngatfola kutsetselelwa kwetono tami, ngate ngakhalela bubele eNkhosini Jesu Khristu. Kodvwa buka, ngakhala kuye ngakutfola kuthula emphefumulweni wami.

9 Manje, ndvodzana yami, ngikutjele loku kute ufundze kuhlakanipha, kute ufundze kimi kutsi kute lenye indlela noma lisu umuntfu langasindziswa ngalo, kuphela nje kuye kanye nangaye Khristu. Buka, ukuphila kanye nekukhanya kwemhlaba. Buka, ulivi leliciniso kanye nekulunga.

10 Manje, njengobe sewucalile kulifundzisa livi kanjalo nami ngifuna kutsi uchubeke nekulifundzisa, futsi ngifuna kutsi ukhutsale uphindze utitsibe kuto tonkhe tintfo.

11 Caphela kutsi awutiphakamisi ngekutikhukhumeta; yebo, caphela kutsi awutichayisi ngekuhlakanipha kwakho noma ngemandla akho lamakhulu.

12 Sebentisa buchawe, kodvwa hhayi kuphocelela; ngalokunjalo caphela kutsi ufaka ematomu kuyo yonkhe imizwa yakho, kute ugcwaliswe ngelutsandvo; caphela kutsi uyehlukana nebuvila.

13 Ungathandazi njengobe emaZoramu enta, ngoba ubonile kutsi athandazela kutsi kuve bantfu, nekutsi advunyiswe ngekuhlakanipha kwawo.

14 Ungasho kutsi: O Nkulunkulu, ngiyabonga kutsi tsine sincono kunabomnaketfu; kodvwa esikhundleni saloko tsani: O Nkhosi, tsetselela kungafaneleki kwami, futsi ukhumbule bomnaketfu ngebubele—yebo, vuma kungafaneleki kwakho phambi kwaNkulunkulu ngetikhatsi tonkhe.

15 Futsi shangatsi iNkhosi ingawubusisa umphefumulo wakho, ikwemukele ngelilanga lekugcina embusweni wayo, kutsi uhlale phansi ngekuthula. Manje hamba, ndvodzana yami, ufundzise livi kulabantfu. Uzitse. Ndvodzana yami, hamba kahle.