EmaVi aMormon

1 Manje mine, Mormon, sengitawuniketa umbhalo lobekadze ngiwenta etandleni tendvodzana yami Moroni, buka ngikubonile cishe konkhe kubhujiswa kwebantfu bami, emaNefi.

2 Futsi seyiminyaka lengemakhulu lamanyenti emvakwekufika kwaKhristu lapho nginiketa lemibhalo etandleni tendvodzana yami; futsi ngicabanga kutsi yona itawubona konkhe kubhujiswa kwebantfu bami. Kodvwa shangatsi Nkulunkulu abengayipha kutsi isindze kuko, kute ibhale lokutsite mayelana nabo, kanye nalokutsite mayelana naKhristu, kute mhlawumbe ngalelinye lilanga kubasite.

3 Manje, sengikhuluma ngaloko lokuphatselene naloko lengikubhalile; ngoba emvakwekutsi sengente lokufinyetiwe kubongcwengcwe baNefi, kwehla kuye ekubuseni kwalena nkhosi Bhenjamini, Amaleki lakhulume ngayo, ngacwaninga emkhatsini walemibhalo leyayiletfwe etandleni tami, ngatfola laba bongcwengcwe, labebalandzisa kancane ngebaphrofethi, kusukela kuJakobe kwehla kuya ekubuseni kwalenkhosi Bhenjamini, futsi kanjalo nalamanyenti emavi aNefi.

4 Futsi tintfo letikulaba bongcwengcwe tiyangitfokotisa, ngenca yetiphrofetho tekuta kwaKhristu; futsi bokhokho bami bati kutsi labanyenti babo bese bagcwalisekile; yebo, nami ngiyati kutsi letinyenti tintfo lebetiphrofethiwe mayelana natsi kwehle kute kube ngulelilanga setigcwalisekile, futsi letinyenti tato kundlulela ngale kwalelilanga kufanele nakanjani tenteke—

5 Ngaloko-ke, ngikhetse leti tintfo, kucedzela umbhalo wami kuto, umbhalo wami losele lengitawutsatsa kubongcwengcwe baNefi; futsi angeke ngikwati kubhala incenye yalokulikhulu yetintfo tebantfu bami.

6 Kodvwa buka, ngitawubatsatsa laba bongcwengcwe, labacuketse leti tiphrofetho kanye netembulo, ngibafake kanye nalokusele kwembhalo wami, ngoba bangulabakhetsekile kimi; futsi ngiyati bayawuba ngulabakhetsekile kubomnaketfu.

7 Futsi ngenta loku ngenhloso yekuhlakanipha; ngoba kuyahletjelwa kimi, ngekusebenta kwaMoya weNkhosi lokimi. Manje, angitati tonkhe tintfo; kodvwa iNkhosi itati tonkhe tintfo letitawukwenteka; ngaloko-ke, yona isebenta kimi kutsi ngente ngekwentsandvo yayo.

8 Futsi umthandazo wami kuNkulunkulu umayelana nabomnaketfu, kutsi baphindze bete ekumatini Nkulunkulu, yebo, kuhlengwa nguKhristu; kute baphindze futsi babe bantfu labatsandzekako.

9 Manje mine, Mormon, ngiyachubeka nekucedzela umbhalo wami, lengiwutsatsa kubongcwengcwe baNefi; futsi ngiwenta njengekwati kanye nekucondza Nkulunkulu langinike kona.

10 Ngaloko-ke, kwenteka kutsi emvakwekutsi Amaleki sekanikete labongcwengcwe etandleni tenkhosi Bhenjamini, wabatsatsa wababeka kanye nalalabanye bongcwengcwe, lebebacuketse imibhalo lebeyindluliswe ngemakhosi kwehla, titukulwane ngetitukulwane kute kube ngemalanga enkhosi Bhenjamini.

11 Futsi yendluliswa yehla kusukela enkhosini Bhenjamini, titukulwane ngetitukulwane yate yawela etandleni tami. Mine, Mormon, ngiyathandaza kuNkulunkulu kutsi ilondvoloteke kusukela ngalesi sikhatsi kuya phambili. Futsi ngiyati kutsi itawulondvolotwa; ngoba kukhona tintfo letinkhulu letibhalwe kuyo, lekuyotsi bantfu bami kanye nabomnakabo bahlulelwe ngato ngelilanga lelikhulu nelekugcina, njengekwelivi laNkulunkulu lelibhaliwe.

12 Manje, mayelana naleNkhosi Bhenjamini—yaba netincabano letitsite emkhatsini webantfu bayo lucobo.

13 Ngetulu kwaloko kwenteka kutsi emabutfo emaLamani eta ehla aphuma eveni laNefi, kutawukulwa nebantfu bakhe. Kodvwa buka, inkhosi Bhenjamini yabutsela ndzawonye emabutfo ayo, yemelana nawo; yalwa ngemandla emkhono wayo lucobo, ngenkemba yaLabani.

14 Futsi ngemandla eNkhosi balwa netitsa tabo, bate babulala letinyenti tinkhulungwane temaLamani. Futsi kwenteka kutsi balwa nemaLamani bate bawacosha bawakhipha emaveni onkhe langemafa abo.

15 Futsi kwenteka kutsi emvakwekubakhona kwaboKhristumbumbulu, imilomo yabo seyivaliwe, futsi sebajeziswe ngekwemacala abo;

16 Emvakwekubakhona kwebaphrofethi bemanga, nebashumayeli kanye nebafundzisi bemanga emkhatsini webantfu, futsi bonkhe laba sebajezisiwe ngekwemacala abo; emvakwekubakhona kwencabano lenkhulu kanye nalokunyenti kuhlubukela kumaLamani, buka, kwenteka kutsi inkhosi Bhenjamini, ngekusitwa baphrofethi labangcwele labebasemkhatsini webantfu bakhe—

17 Ngoba buka, inkhosi Bhenjamini bekuyindvodza lengcwele; wabusa ngetulu kwebantfu bakhe ngekulunga; futsi bekukhona labanyenti bantfu labangcwele eveni, balikhuluma livi laNkulunkulu ngemandla kanye nangeligunya; basebentisa kucina kwelivi lokukhulu ngenca yekuba nenkhani kwebantfu—

18 Ngaloko-ke, ngelusito lwalaba, iNkhosi Bhenjamini, ngekusebenta ngawo onkhe emandla emtimba wakhe kanye nemandla emphefumulo wakhe wonkhe, futsi ngalokunjalo nebaphrofethi, baphindze bacinisekisa kuthula eveni.