1 Futsi kwenteka kutsi umnyaka wemashumi lamatsatfu nakune wendlula, kanjalo newemashumi lamatsatfu nesihlanu, buka labafundzi baJesu babese bakha libandla laKhristu kuwo onkhe emave etindzaweni tonkhe. Bonkhe labo labeta kubo, baphendvuka ngeliciniso etonweni tabo, babhajatiswa egameni laJesu; ngetulu kwaloko bamtfola Moya loNgcwele.

2 Futsi kwenteka kutsi ngemnyaka wemashumi lamatsatfu nesitfupha, bonkhe bantfu bese baphendvukele eNkhosini, kulo lonkhe live, kumaNefi kanye nemaLamani, futsi bekungasekho netincabano kanye netimphikiswano emkhatsini wabo, wonkhe umuntfu bekenta kulunga lomunye kulomunye.

3 Bebanetintfo tonkhe ngalokufanako emkhatsini wabo; ngako-ke bekute labebacebile nalabebamphofu, labebaboshiwe nalabebakhululekile, kodvwa bonkhe bebakhululekile, futsi bahlanganyela esiphiweni sasezulwini.

4 Futsi kwenteka kutsi umnyaka wemashumi lamatsatfu nesikhombisa wendlula nawo, kwachubeka kwaba khona kuthula eveni.

5 Kwaba khona imisebenti lemikhulu nalemangalisako leyentiwa bafundzi baJesu, kangangekutsi babelapha labagulako, bavusa labafile, benta labangakhoni kuhamba bahamba, labangaboni batfola kubona kwabo, kanye nalabangeva beva, futsi benta tonkhe tinhlobo tetimangaliso emkhatsini webantfwana bebantfu; kute timangaliso labatenta ngaphandle kwekutsi kube segameni laJesu.

6 Umnyaka wemashumi lamatsatfu nesiphohlongo wendlula kanjalo, kanjalo newemashumi lamatsatfu nemfica, newemashumi lamane nakunye, kanye newemashumi lamane nakubili, yebo, kwate kwendlula ngisho iminyaka lengemashumi lamane nemfica, kanjalo newemashumi lasihlanu nakunye, kanye newemashumi lasihlanu nakubili; yebo, kwate kwendlula ngisho iminyaka lengemashumi lasihlanu nemfica.

7 INkhosi yabaphumelelisa kakhulu eveni; yebo, kangangekutsi baphindze bakha emadolobha lapho bekukhona emadolobha lashisiwe khona.

8 Yebo, ngisho nalelo lidolobha lelikhulu iZarahemla benta kutsi liphindze lakhiwe.

9 Kodvwa bekamanyenti emadolobha labekacwilile, futsi kwavela emanti esikhundleni sawo; ngako-ke lamadolobha bekangeke akhiwe kabusha.

10 Manje, buka, kwenteka kutsi bantfu baNefi bakhula bacina, bandza ngekushesha lokukhulu, baba bantfu labahle futsi labatsandzekako.

11 Bebashada, baphindze bendziswa, babusiswa njengekwetetsembiso letinyenti iNkhosi lebeyitente kubo.

12 Abatange basahamba nanini ngekwetento kanye nangekwetimiso temtsetfo waMosi; kodvwa bahamba ngekwemiyaleto labebayitfole eNkhosini yabo kanye naNkulunkulu wabo, bachubeka nekuzila kanye nekuthandaza, kanye nasekuhlanganyeleni ndzawonye njalo nje kute bathandaze baphindze balalele livi leNkhosi.

13 Futsi kwenteka kutsi bekute incabano emkhatsini wabo bonkhe bantfu, kulo lonkhe live; kodvwa bekukhona timangaliso letinkhulu lebetenteka emkhatsini webafundzi baJesu.

14 Futsi kwenteka kutsi umnyaka wemashumi lasikhombisa nakunye wendlula, kanjalo nemnyaka wemashumi lasikhombisa nakubili, yebo, kwephetsa, kwate kwendlula ngisho umnyaka wemashumi lasikhombisa nemfica; yebo, kwate kwendlula iminyaka lelikhulu, futsi bafundzi baJesu, labo labekabakhetsile, babese bonkhe bayahamba baya epharadisi laNkulunkulu, ngaphandle kwalabatsatfu labebatawusala; kwaba khona labanye bafundzi lababekwa etikhundleni tabo; ngalokunjalo nalabanyenti baleso situkulwane bese bendlulile.

15 Futsi kwenteka kutsi bekute incabano eveni, ngenca yelutsandvo lwaNkulunkulu lobelukhona etinhlitiyweni tebantfu.

16 Bekute umona, tincabano, tiphitsiphitsi, bugwadla, emanga, kubulala nanoma nguluphi luhlobo lwenkhanuko; futsi nakanjani akuyuze kube khona bantfu labebatfokote kangaka emkhatsini wabo bonkhe bantfu labadalwa sandla saNkulunkulu.

17 Bekute tigebengu, babulali, noma emaLamani, noma nhloboni yebantfu labebahlukaniswe ngekwebuve; kodvwa bonkhe bebamunye, bantfwana baKhristu, kanye netindlalifa tembuso waNkulunkulu.

18 Bebabusisiwe! Ngoba iNkhosi yababusisa kuko konkhe kwenta kwabo; yebo, babusiswa baphindze baphumeleliswa kwate kwendlula ngisho likhulu nelishumi leminyaka; nesitukulwane sekucala kusukela kuKhristu bese sendlulile, bekute incabano kulo lonkhe live.

19 Futsi kwenteka kutsi Nefi, loyo lobekagcine lombhalo wekugcina, (awugcine kubongcwengcwe baNefi) wafa, indvodzana yakhe Amose yawugcina esikhundleni sakhe; naye wawugcina kubo bongcwengcwe baNefi.

20 Wabagcina iminyaka lengemashumi lasiphohlongo nakune, futsi bekunguloku kukhona kuthula eveni, ngaphandle nje kwencenye lencane yebantfu labebahlukene ebandleni baphindze batibita ngemaLamani; ngako-ke kwaphindze kwacala kutsi kube khona emaLamani eveni.

21 Futsi kwenteka kutsi Amose naye wafa, (bese kuyiminyaka lelikhulu nemashumi layimfica nakune kusukela ekufikeni kwaKhristu) indvodzana yakhe Amose yawugcina umbhalo esikhundleni sakhe; nayo ngalokunjalo yawugcina kubo bongcwengcwe baNefi; ngetulu kwaloko bewubhalwe encwadzini yaNefi, lokungulena ncwadzi.

22 Futsi kwenteka kutsi bese kwendlule iminyaka lengemakhulu lamabili; netitukulwane tesibili bese tendlulile tonkhe ngaphandle kwalabambalwa.

23 Manje mine, Mormon, ngifuna kutsi nati kutsi bantfu bese bandzile, kangangekutsi bese basabalele eveni lonkhe, nekutsi bese bacebe kakhulu, ngenca yekuphumelela kwabo kuKhristu.

24 Manje, kulomnyaka wemakhulu lamabili nakunye kwacala emkhatsini wabo kutsi kube khona labo labaphakama ekutichenyeni, njengekugcoka tingubo letibitako, nato tonkhe tinhlobo temagugu lamahle kakhulu, kanye netintfo letinhle kakhulu temhlaba.

25 Kusukela ngaleso sikhatsi kuya phambili abatange basaba netimphahla kanye netintfo emkhatsini wabo ngalokufanako nanini.

26 Bacala kutsi behlukane ngetigaba; bacala kutsi batakhele emabandla kute batfole inzuzo, bacala kuliphika libandla leliciniso laKhristu.

27 Futsi kwenteka kutsi ngesikhatsi sekwendlule iminyaka lengemakhulu lamabili neminyaka lelishumi bese kukhona emabandla lamanyenti eveni; yebo, bekukhona lamanyenti emabandla labekafakaza kutsi ayamati Khristu, kodvwa atiphika tincenye letinyenti telivangeli lakhe, kangangekutsi bekavumela yonkhe inhlobo yebubi, futsi anika loko lokungcwele kuloyo lobekangakavunyelwa ngenca yekungafaneleki.

28 Futsi lelibandla landza kakhulu ngenca yebubi, nangenca yemandla aSathane lowatfola kubambelela etinhlitiyweni tabo.

29 Ngetulu kwaloko, kwabakhona lelinye libandla lebelimphika Khristu; futsi bebahlupha libandla leliciniso laKhristu, ngenca yekutfobeka kwabo kanye nekukholwa kwabo kuKhristu; bebabadzelela ngenca yetimangaliso letinyenti lebetenteka emkhatsini wabo.

30 Ngako-ke basebentisa emandla kanye neligunya kubafundzi baJesu labebasele nabo, babaphonsa ejele; kodvwa ngemandla elivi laNkulunkulu, labekakubo, emajele adzabuka kabili, bahamba benta timangaliso letinkhulu emkhatsini wabo.

31 Noko, nanoma kwakungenca yato tonkhe letimangaliso, bantfu baticinisa tinhlitiyo tabo, futsi bafuna kubabulala, njengemaJuda eJerusalema labekafuna kubulala Jesu, njengekwelivi lakhe.

32 Futsi babaphonsa etitsandvweni temlilo, baphuma bangakalimali.

33 Ngetulu kwaloko babaphonsa emigodzini yetilwane tesiganga, kodvwa badlala netilwane tesiganga njengemntfwana neliwundlu; baphuma emkhatsini wato, bangakalimali.

34 Noko, bantfu baticinisa tinhlitiyo tabo, ngoba bebaholwa baphristi labanyenti kanye nebaphrofethi bemanga kutsi bakhe emabandla lamanyenti, kanye nekutsi bente tonkhe tinhlobo tebubi. Babashaya bantfu baJesu; kodvwa bantfu baJesu abatange batiphindzisele. Ngaleyo ndlela bancishelwa lukholo bandza ngebubi, umnyaka ngemnyaka, kwate kwendlula iminyaka lengemakhulu lamabili nemashumi lamatsatfu.

35 Manje kwenteka ngalomnyaka, yebo, emnyakeni wemakhulu lamabili nemashumi lamatsatfu nakunye, kwaba khona kwehlukana lokukhulu emkhatsini webantfu.

36 Futsi kwenteka kutsi ngalomnyaka kwacubuka bantfu labebabitwa ngekutsi ngemaNefi, bebangemakholwa eliciniso kuKhristu; emkhatsini wabo kwaba khona labo labebabitwa ngekutsi ngemaLamani—ngemaJakobe, emaJosefa, kanye nemaZoramu.

37 Ngako-ke labebangemakholwa eliciniso kuKhristu, kanye nalabebatikhonti teliciniso Khristu, (emkhatsini wabo bekukhona nalabafundzi labatsatfu baJesu labebayawusala) bebabitwa ngekutsi ngemaNefi, emaJakobe, emaJosefa, kanye nemaZoramu.

38 Futsi kwenteka kutsi labo labebalahla livangeli babitwa ngekutsi ngemaLamani, emaLemuweli, kanye nema-Ishmayeli; abatange bancishelwe lukholo, kodvwa balivukela ngemabomu livangeli laKhristu; futsi bafundzisa bantfwana babo kutsi bangakholwa, njengabokhokho babo, kusukela ekucaleni, bancipha.

39 Bekungenca yebubi kanye nesinengiso sabokhokho babo, njengobe bekunjalo ekucaleni. Futsi bafundziswa kubatondza bantfwana baNkulunkulu, njengobe emaLamani afundziswa kutsi atondze bantfwana baNefi kusukela ekucaleni.

40 Futsi kwenteka kutsi iminyaka lengemakhulu lamabili nemashumi lamane nakune bese yendlulile, betime kanjalo-ke tindzaba talabantfu. Incenye lenebubi kakhulu yebantfu yakhula yacina, futsi baba banyenti kakhulu kunebantfu baNkulunkulu.

41 Bachubeka nekutakhela emabandla abo, bawahlobisa ngato tonkhe tinhlobo tetintfo letiligugu. Yendlula kanjalo-ke iminyaka lengemakhulu lamabili nemashumi lasihlanu, kanjalo neminyaka lengemakhulu lamabili nemashumi lasitfupha.

42 Futsi kwenteka kutsi incenye lenebubi yebantfu yacala kutsi yente tifungo letiyimfihlo kanye nemacembu aGadiyantoni.

43 Ngetulu kwaloko nebantfu labebabitwa ngekutsi bantfu baNefi bacala kutikhukhumeta etinhlitiyweni tabo, ngenca yemcebo wabo lomnyenti, baphindze baba nekutikhukhumeta njengabomnakabo, emaLamani.

44 Kusukela ngalesi sikhatsi bafundzi bacala kudzabuka ngetono temhlaba.

45 Futsi kwenteka kutsi ngesikhatsi sekwendlule iminyaka lengemakhulu lamatsatfu, bantfu baNefi kanye nemaLamani bese banebubi lobukhulu ngalokufanako.

46 Futsi kwenteka kutsi tigebengu taGadiyantoni tasabalala eveni lonkhe; futsi bekute namunye lobekalungile ngaphandle kwebafundzi baJesu. Ligolide kanye nesiliva baligcina ngebunyenti, futsi batsenga ngayo yonkhe indlela yekutsenga.

47 Futsi kwenteka kutsi emvakwekutsi sekwendlule iminyaka lengemakhulu lamatsatfu, (bantfu bebasolo bahleli ebubini) Amose wafa; kwatsi umnakabo, Amaroni, wawugcina umbhalo esikhundleni sakhe.

48 Futsi kwenteka kutsi ngesikhatsi sekwendlule iminyaka lengemakhulu lamatsatfu nemashumi lamabili, Amaroni, ngekuphocelelwa nguMoya loNgcwele, wayifihla imibhalo lengcwele—yebo, yonkhe imibhalo lengcwele leyayendlulisiwe titukulwane ngetitukulwane, leyayingcwele—kwate kwaba yiminyaka lengemakhulu lamatsatfu nemashumi lamabili kusukela ekufikeni kwaKhristu.

49 Wayifihla eNkhosini, kute iphindze ite kuyo insali yendlu yakaJakobe, njengekwetiphrofetho kanye netetsembiso teNkhosi. Uphela kanjalo-ke umbhalo wa-Amaroni.