INcwadzi yaJaromu

1 Manje buka, mine, Jaromu, ngibhala emavi lambalwa njengekwemiyaleto yababe, Enoshi, kute umlandvo wesitukulwane setfu ugcinwe.

2 Futsi njengobe laba bongcwengcwe babancane, nanjengobe leti tintfo tibhalwe ngenhloso yekutsi kuzuze bomnaketfu emaLamani, ngaloko-ke, kumele kutsi ngibhale kafisha; kodvwa angitutibhala tintfo tekuphrofetha kwami, noma tekwembulelwa kwami. Ngoba yini lengingayibhala ngetulu kwaloko bokhokho bami labakubhalile na? Ngoba abalivetanga yini lisu lensindziso na? Ngitsi kini, Yebo; futsi loku kuyangenelisa.

3 Buka, kufanele kube kunyenti lokumele kwentiwe emkhatsini walaba bantfu, ngenca yebulukhuni betinhlitiyo tabo, nekungeva kwetindlebe tabo, nekuphumphutseka kwetingcondvo tabo, kanye nekuba nenkhani kwabo; noko, Nkulunkulu unesihawu lesikhulu kubo, futsi usengakabasusi eveni lonkhe.

4 Futsi kukhona labanyenti emkhatsini wetfu labanetembulo letinyenti, ngoba akusibo bonkhe labanenkhani. Futsi njengobe labanyenti bete inkhani futsi banelukholo, banebudlelwane naMoya loNgcwele, lowembulela bantfwana bebantfu, ngekwelukholo lwabo.

5 Manje, buka, iminyaka lengemakhulu lamabili bese yendlulile, nebantfu baNefi bese bakhule bacina kulelive. Betama kugcina umtsetfo waMosi kanye nelilanga lelisabatha lingcwele eNkhosini. Futsi abalephulanga; noma balihlambalate. Imitsetfo yalelive yayicine kakhulu.

6 Futsi bebahlakateke kakhulu eveni lonkhe, ngalokunjalo nemaLamani. Wona bekamanyenti kakhulu kunalabo bemaNefi; futsi wona bekakutsandza kubulala aphindze anatsa ingati yetilwane.

7 Futsi kwenteka kutsi eta tikhatsi letinyenti kutawukulwa natsi, emaNefi. Kodvwa emakhosi etfu kanye nebaholi betfu bebangemadvodza lacinile elukholweni lweNkhosi; babafundzisa bantfu tindlela teNkhosi; ngaloko-ke, samelana nemaLamani futsi sawakhipha aphuma eveni letfu, futsi sacala kucinisa emadolobha etfu, noma ngabe nguyiphi indzawo leyayilifa letfu.

8 Futsi sandza kakhulu, sagcwala eveni lonkhe, sanotsa kakhulu ngeligolide, nangesiliva, nangetintfo letiligugu, kanye nasekwenteni umsebenti lomuhle wetingodvo, ngetakhiwo kanye nangemishini, ngalokunjalo nangensimbi lecinile nangekhopha, nangelitfusi kanye nensimbi, senta tonkhe tinhlobo temathulusi latinhlobonhlobo ekulima umhlabatsi, kanye netikhali temphi—yebo, imicibisholo lekhaliphile lecijile, nemigodla, netikhali, nemikhonto lejikwako, kanye nako konkhe kwekulungiselela imphi.

9 Ngako-ke njengobe sasitilungiselele kuhlangana nemaLamani, akaphumelelanga ekulweni natsi. Kodvwa livi leNkhosi lacinisekiswa, leyalikhuluma kubokhokho betfu, itsi: Nangabe nitawuyigcina imiyaleto yami niyawuphumelela kulelive.

10 Futsi kwenteka kutsi baphrofethi beNkhosi babesabisa bantfu baNefi, njengekwelivi laNkulunkulu, kutsi uma bangayigcini imiyaleto, kodvwa bawela esiphambekweni, batobhujiswa baphele eveni lonkhe.

11 Ngaloko-ke, baphrofethi, nebaphristi, kanye nebafundzisi, basebenta ngekukhutsala, bakhutsata bantfu ngako konkhe kumela bulukhuni kutsi bakhutsale; bafundzisa umtsetfo waMosi, kanye nenhloso yekunikwa kwawo; babenta kutsi babuke phambili kuMesiya, futsi bakholwe kuye lotako kube shangatsi besekakhona. Futsi babafundzisa ngalendlela.

12 Futsi kwenteka kutsi ngekwenta njalo babahlenga ekubhujisweni eveni lonkhe; ngoba batihlaba tinhlitiyo tabo ngelivi, babaphehlela njalonjalo ekuphendvukeni.

13 Futsi kwenteka kutsi emakhulu lamabili nemashumi lamatsatfu nesiphohlongo eminyaka beseyendlulile—seloku kunetimphi, netincabano, kanye nekuphikisana, sikhatsi lesidze kakhulu.

14 Futsi mine, Jaromu, angeke ngibhale lokunyenti, ngoba laba bongcwengcwe bancane. Kodvwa bukani, bomnaketfu, ningabuka kulabanye bongcwengcwe baNefi; ngoba bukani, kubo imibhalo yetimphi tetfu icoshiwe, njengekwemibhalo yemakhosi, noma leyo labenta kutsi ibhalwe.

15 Futsi nginiketa laba bongcwengcwe etandleni tendvodzana yami Omni, kute bagcinwe njengekwemiyaleto yabokhokho bami.