Sehluko 56
Helamani utfumela incwadzi kuMoroni, ulandzisa ngesimo semphi nemaLamani—Antipusi naHelamani bazuza kuncoba lokukhulu kumaLamani—Emajaha latinkhulungwane letimbili langemadvodzana aHelamani alwa ngemandla lamangalisako, futsi kute namunye kuwo lobulawako. Livesi 1, cishe ngemnyaka wema-62 ngaphambi kwekutalwa kwaKhristu; emavesi 2–19, cishe ngemnyaka wema-66 ngaphambi kwekutalwa kwaKhristu; nemavesi 20–57, cishe ngemnyaka wema-65–64 ngaphambi kwekutalwa kwaKhristu.
1 Manje kwenteka ekucaleni kwemnyaka wemashumi lamatsatfu wekubusa kwebehluleli, ngelilanga lesibili enyangeni yekucala, Moroni watfola incwadzi levela kuHelamani, ichaza ngesimo sebantfu kuleyo ncenye yelive.
2 Futsi lawa ngemavi lawabhala, atsi: Mnaketfu, lotsandzekako kakhulu, Moroni, eNkhosini nasetinhluphekweni temphi yetfu; buka, mnaketfu lotsandzekako, nginalokutsite lengifuna kukutjela kona mayelana nemphi yetfu kulencenye yelive.
3 Buka, emadvodzana latinkhulungwane letimbili talabo bantfu Amoni lehla nabo wabakhipha eveni laNefi—manje bowati kutsi laba bebabesitukulwane saLamani, lobekayindvodzana lendzala yababe Lehi;
4 Manje kute sidzingo kutsi ngikulandzise mayelana nemasiko abo noma kungakholwa kwabo, ngoba uyati mayelana nato tonkhe leti tintfo—
5 Ngako-ke kuyangenetisa kutsi ngikutjele kutsi tinkhulungwane letimbili talawa majaha titsatse tikhali tato temphi, tafuna kutsi ngibe ngumholi wato; futsi siphumele ebaleni kutawuvikela live letfu
6 Futsi manje uyati mayelana nesivumelwano boyise labasenta, sekutsi angeke batitsatse tikhali tabo temphi kutsi balwe nabomnakabo kute bacitse ingati.
7 Kodvwa emnyakeni wemashumi lamabili nesitfupha, ngesikhatsi babona tinhlupheko tetfu kanye netinsizi tetfu ngabo, besebatosephula sivumelwano labebasentile bese batsatsa tikhali tabo temphi kuyawusivikela.
8 Kodvwa angibavumelanga kutsi basephule lesivumelwano lebebasentile ngekucabanga kutsi Nkulunkulu bekatawusicinisa, kangangekutsi besingeke sisahlupheka kakhulu ngenca yekugcwaliseka kwesifungo lebebasentile.
9 Kodvwa buka, nayi intfo yinye lesijabula ngayo kakhulu. Ngoba buka, ngemnyaka wemashumi lamabili nesitfupha, mine, Helamani, ngawahola lawa majaha latinkhulungwane letimbili saya edolobheni laseJudiya, kuyawusita Antipusi, lowambeka kutsi abe ngumholo webantfu bakuleyo ncenye yelive.
10 Futsi ngawahlanganisa emadvodzana ami latinkhulingwane letimbili, (ngoba afanelekile kutsi abitwe ngemadvodzana) nelibutfo la-Antipusi, lawo mandla Antipusi lawajabulela kakhulu; ngoba buka, libutfo lakhe laselincishiswe ngemaLamani ngoba emabutfo awo besekabulele sibalo lesikhulu semadvodza etfu, lokusizatfu kutsi sikhale.
11 Noko, singatidvudvuta ngeliciniso, lekutsi bafele endleleni yelive labo kanye neyaNkulunkulu wabo, yebo, futsi bajabulile.
12 Futsi emaLamani ngetulu kwaloko asagcine tiboshwa letinyenti, tonkhe lekutindvuna letinkhulu, kute namunye lomunye labamshiye aphila. Futsi sicabanga kutsi kungumanje ngalesi sikhatsi setiseveni laNefi; kunjalo uma tingabulawanga.
13 Manje lawa ngemadolobha emaLamani labekawatsetse ngekucitsa ingati yalabanyenti bemadvodza etfu lanesibindzi:
14 Live laseManti, noma lidolobha laseManti, nelidolobha laZezromu, kanye nelidolobha laseKhumeni, kanye nelidolobha lase-Antipara.
15 Lawa ngemadolobha lawatfola kutsi abe ngewabo ngesikhatsi ngifika edolobheni laseJudiya; futsi ngatfola Antipusi kanye nemadvodza akhe basebenta kamatima ngemandla abo onkhe kutsi balicinise lelidolobha.
16 Yebo, bebakhatsele ngekwemtimba kanjalo nangekwemoya, ngoba bebalwe ngesibindzi emini baphindze basebenta kamatima ebusuku kute bawagcine emadolobha abo; futsi ngaleyo ndlela bebamelene netinhlupheko letinkhulu letitinhlobonhlobo.
17 Manje bebatimisele kuncoba kulendzawo noma bafe; ngako-ke ngaleso sizatfu ungacabanga kutsi lelibutfo lelincane lengafika nalo, yebo, lawo madvodzana ami, abanika ematsemba lamakhulu nenjabulo lenkhulu.
18 Manje kwenteka kutsi ngesikhatsi emaLamani asabona kutsi Antipusi besekatfole emandla lamakhudlwana ebutfweni lakhe, aphocelelwa yimiyalo ya-Amoroni kutsi angalihlaseli lidolobha laseJudiya, noma atawukulwa natsi.
19 Ngaleyo ndlela sabusiswa yiNkhosi; ngoba kube ake eta etikwetfu kulobu butsakatsaka betfu mhlawumbe abengalibulala libutfo letfu lelincane; kodvwa salondvolotwa.
20 Ayaletwa ngu-Amoroni kutsi awagcine lawo madolobha labesebawatsetse. Waphela kanjalo-ke umnyaka wemashumi lamabili nesitfupha. Ekucaleni kwemnyaka wemashumi lamabili nesikhombisa sasesililungiselele lidolobha letfu kanye natsi lucobo kutsi sitivikele.
21 Manje besifuna kutsi emaLamani atawusihlasela; ngoba besingafuni kutsi siwahlasele etincabeni tawo.
22 Futsi kwenteka kutsi sabeka tinhloli ndzawo tonkhe, kutsi tigadze iminyakato yemaLamani, kute angasendluli ebusuku noma emini ayohlasela lamanye emadolobha etfu labekangasenyakatfo.
23 Ngoba sasati kutsi kulawo madolobha bebangakacini ngalokwanele kutsi bahlangane nawo; ngako-ke besifuna, kutsi uma nje angendlula ngakitsi, siwahlasele ngemuva, ngaleyo ndlela silwe nawo ngemuva futsi ngaso leso sikhatsi ahlangabetwe ngembili. Sasicabanga kutsi singawancoba; kodvwa buka, sadvumala kulesifiso setfu.
24 Akatange alokotse endlule ngakitsi nelibutfo lawo lonkhe, noma nje endlule nencenye, funa angabi nemandla ngalokwanele bese ayehlulwa.
25 Noma akatange alokotse ahambe ehle ayawukulwa nelidolobha laseZarahemla; noma alokotse ancamule enhloko yeSidoni, kuya edolobheni laseNefiha.
26 Ngaleyo ndlela, ngemabutfo awo, abetimisele kutsi awagcine lawo madolobha labekawatsetse.
27 Manje kwenteka kutsi ngenyanga yesibili yalowo mnyaka, saletselwa imiphako leminyenti lebeyivela kuboyise balawo madvodzana ami latinkhulungwane letimbili.
28 Ngetulu kwaloko satfunyelelwa emadvodza latinkhulungwane letimbili avela eveni laseZarahemla. Ngaleyo ndlela satilungiselela ngemadvodza latinkhulungwane letilishumi, nemiphako yawo, kanjalo neyebafati bawo kanye neyebantfwana bawo.
29 EmaLamani, nakabona emabutfo etfu akhula malanga onkhe, nemiphako ifika kutawusisekela, acala kwesaba, abese acala kuphuma, kube bekungenteka kuyosivimbela kutfola imiphako kanye nemandla.
30 Manje ngesikhatsi sibona kutsi emaLamani abesacala kungakhululeki ngaloku, saba nesifiso sekwenta licebo lebelitawusebenta kuwo; ngako-ke Antipusi wayala kutsi ngihambe phambili nemadvodzana ami lamancane siye edolobheni lelingumakhelwane, kube shangatsi sihambisa imiphako edolobheni lelingumakhelwane.
31 Bekufanele sendlule edvute nelidolobha i-Antipara, kube shangatsi siya edolobheni lelingaphambili, eminceleni ngaselugwini lwelwandle.
32 Futsi kwenteka kutsi sahamba, shangatsi setfwele imiphako yetfu, siya kulelo dolobha.
33 Futsi kwenteka kutsi Antipusi wahamba nencenye yelibutfo lakhe, washiya labasalako kutsi bagcine lidolobha. Kodvwa akahambanga ngate ngahamba ngaphambili nelibutfo lami lelincane, sate sefika dvutane nelidolobha i-Antipara.
34 Manje, edolobheni i-Antipara bekubekwe libutfo lelicine kakhulu lemaLamani; yebo, lelinyenti kakhulu.
35 Futsi kwenteka kutsi ngesikhatsi asatjelwe tinhloli tawo, eta nelibutfo lawo ahamba acondza kitsi.
36 Futsi kwenteka kutsi sawabalekela, saya ngasenyakatfo. Ngaleyo ndlela saliholela khashane libutfo lelinemandla lamakhulu lemaLamani.
37 Yebo, kwate kwaba libanga lelidze, kangangekutsi ngesikhatsi abona libutfo la-Antipusi liwalandzela, ngemandla alo onkhe, akatange ajikele ngesekudla noma ngesencele, kodvwa achubeka neluhambo lwawo ngendlela lecondzile emvakwetfu; futsi, njengobe sasicabanga, kwakuyinhloso yawo kutsi asibulale ngaphambi kwekutsi Antipusi awakhandze, kute angatungeletwa bantfu betfu.
38 Manje Antipusi, abubona bungoti betfu, walusheshisa luhambo lwelibutfo lakhe. Kodvwa buka, besekusebusuku; ngako-ke akasikhandzanga, na-Antipusi akawakhandzanga; ngako-ke samisa emathende sahlala kwesikhashana ngalobo busuku.
39 Futsi kwenteka kutsi ngaphambi kwentsatsakusa, buka, emaLamani abesasilandzela. Manje sasingakacini ngalokwanele kutsi silwe nawo; yebo, ngangingeke ngivume kutsi emadvodzana ami lamancane awele etandleni tawo; ngako-ke sachubeka neluhambo lwetfu saya ehlane.
40 Manje akalokotsanga ajikela ngesekudla noma ngesencele funa atungeletwe; nami ngalokunjalo angilokotsanga ngajikela ngesekudla noma ngesencele funa angikhandze, bese asisakhoni kumelana nawo, kodvwa sibulawe bese ayaphunyula; ngako-ke sabaleka lilanga lonkhe saya ehlane, kwate kwaba mnyama.
41 Futsi kwenteka kutsi, ngesikhatsi kukhanya kwasekuseni kufika sawabona emaLamani asetikwetfu, sawabalekela.
42 Kodvwa kwenteka kutsi akasicoshanga kakhulu ngaphambi kwekutsi eme; futsi bekusekuseni ngelilanga lesitsatfu enyangeni yesikhombisa.
43 Manje, noma akhandvwa ngu-Antipusi asatanga, kodvwa ngatsi kumadvodzana ami: Bukani, asati kodvwa sicabanga kutsi beme ngenhloso yekutsi sibahlasele, kute asibambe elugibeni lwawo;
44 Ngako-ke nitsini, madvodzana ami, nitawuhamba yini niyawuwahlasela na?
45 Manje ngitsi kuwe, mnaketfu lotsandzekako Moroni, angitange nanini ngisibone sibindzi lesikhulu kangaka, cha, hhayi emkhatsini wawo onkhe emaNefi.
46 Ngoba njengobe ngangihlale ngibabita ngemadvodzana ami (ngoba bonkhe bebabancane kakhulu) nabo batsi kimi: Babe, buka Nkulunkulu wetfu unatsi, futsi angeke avume kutsi sibulawe; ngako sivumele sihambe; angeke sibabulale bomnaketfu uma nabo bangasiyekela; ngako-ke asambeni, funa balehlule libutfo la-Antipusi
47 Manje, bebangatange sebalwe, kodvwa bebangakwesabi kufa; futsi bebacabanga kakhulu ngenkhululeko yaboyise kunekucabanga ngetimphilo tabo; yebo, bebafundziswe bonina, kutsi uma bangangabati, Nkulunkulu bekatawubakhulula.
48 Futsi bangilandzisa emavi abonina, batsi: Asingabati kutsi bomake betfu bebakwati loko.
49 Futsi kwenteka kutsi ngabuyela emuva netinkhulungwane letimbili tami ngayawukulwa nemaLamani labekasicoshile. Manje buka, emabutfo a-Antipusi besekawakhandzile, yabe imphi leyesabekako seyicalile.
50 Libutfo la-Antipusi selikhatsele, ngenca yeluhambo lwabo ngesikhatsi lesifishane kangaka, beselitowela etandleni temaLamani; futsi kube angibuyanga netinkhulungwane tami letimbili bekatawuyifeza inhloso yawo.
51 Ngoba Antipusi besekafile ngenkemba, kanye nalabanyenti bebaholi bakhe, ngenca yekukhatsala kwabo, lokwakubangwa luhambo lwabo lolwalushesha—ngako-ke emadvodza a-Antipusi adidekile ngenca yekufa kwebaholi babo, acala kuhlehlela emuva ngaphambi kwemaLamani.
52 Futsi kwenteka kutsi emaLamani ema sibindzi, acala kubacosha; futsi emaLamani bekabacosha ngemfutfo lomkhulu ngesikhatsi Helamani atseleka etikwawo netinkhulungwane letimbili takhe, wacala kuwabulala kakhulu, kangangekutsi libutfo lonkhe lemaLamani lema laphindze lagucukela kuHelamani.
53 Manje ngesikhatsi bantfu ba-Antipusi babona kutsi emaLamani abesagucukile, bagcogcela ndzawonye emadvodza abo baphindze beta emvakwemaLamani.
54 Manje kwenteka kutsi tsine, bantfu baNefi, bantfu ba-Antipusi, nami netinkhulungwane tami letimbili, sawatungeleta emaLamani, sawabulala; yebo, kangangekutsi aphoceleleka kutsi anikele ngetikhali tawo temphi kanjalo atinikele nanawo njengetiboshwa temphi.
55 Manje kwenteka kutsi ngesikhatsi asatinikele kitsi, buka, ngawabala lawo majaha labekalwe kanye nami, nginekwesaba funa bekamanyenti labekabulewe.
56 Kodvwa buka, ngekujabula kwami lokukhulu, bekute nalinye kuwo lebelibulewe; yebo, futsi bekalwe shangatsi anemandla aNkulunkulu; yebo, kute emadvodza latiwako lake alwa ngemandla lamangalisa kangaka; futsi nangemandla lamakhulu atseleka etikwemaLamani, kangangekutsi awesabisa; ngalesi sizatfu emaLamani atinikela njengetiboshwa temphi.
57 Njengobe sasite indzawo yetiboshwa tetfu, kutsi sitigadze kute tingahlangani nemabutfo emaLamani, ngako-ke satitfumela eveni laseZarahemla, kanye nencenye yalawo madvodza labekangakabulawa a-Antipusi, kanye nawo; kwatsi labasalako ngabatsatsa ngabahlanganisa nemajaha ami ema-Amoni, sase sitsatsa luhambo lwetfu sabuyela emuva edolobheni laseJudiya.