1 Futsi kwenteka kutsi emaNefi labekangakabulawa ngetikhali temphi, emvakwekutsi sekangcwabe labo labebabulewe—manje sibalo salabo labebabulewe sasingakabalwa, ngenca yebukhulu besibalo sabo—emvakwekutsi sebacedzile kungcwaba labafile babo bonkhe babuyela emaveni abo, nasemitini yabo, nakubafati babo, kanye nakubantfwana babo.

2 Manje labanyenti besifazane kanye nebantfwana bebabulewe ngenkemba, futsi ngalokunjalo naleminyenti imihlambi yetimvu neyetinkhomo tabo; ngalokunjalo nalamanyenti emasimi alokuyinhlavu kwabo abhujiswa, ngoba anyatselwa ticuku tebantfu.

3 Manje bonkhe bemaLamani kanye nema-Amlisi labebabulewe ngaselusentseni lwemfula iSidoni baphonswa emantini aseSidoni; buka ematsambo abo asekujuleni kwelwandle, futsi manyenti.

4 Ema-Amlisi bekahlukaniswa kumaNefi, ngoba wona bekatibeke luphawu lolubovu esimongweni sawo ngendlela yemaLamani; noko wona bekangakatihhuli tinhloko tawo njengemaLamani.

5 Manje tinhloko temaLamani betihhuliwe; futsi bekangcunu, ngaphandle nje kwesikhumba lebekasibophe etinkhalo tawo, futsi ngalokunjalo netikhali tawo, lebekatibophile, kanye nebutjoki bawo, nemicibisholo yawo, nematje awo, kanye netilingi tawo, njalonjalo.

6 Tikhumba temaLamani tatinsundvu, ngekweluphawu lolo lolwalubekwe kubokhokho babo, lolwalusicalekiso etikwabo ngenca yetiphambeko tabo kanye nekuhlubuka kwabo ngekumelana nabomnakabo, labafaka ekhatsi Nefi, Jakobe, Josefa, kanye naSemu, labebangemadvodza lalungile futsi langcwele.

7 Bomnakabo bebafuna kubabulala, ngako-ke bacalekiswa; futsi iNkhosi Nkulunkulu yabeka luphawu kubo, yebo, kuLamani nakuLemuweli, kanjalo nakuwo emadvodzana a-Ishmayeli, kanye nakubesifazane baka-Ishmayeli.

8 Loku kwentiwa kute intalelwane yabo yehlukaniswe nentalelwane yabomnakabo, kute ngaloko iNkhosi Nkulunkulu ilondvolote bantfu bayo, kute bangahlangani baphindze bakholwe emasikweni langakalungi lebekatobangela konakala kwabo.

9 Futsi kwenteka kutsi loyo lobekahlanganisa intalelwane yakhe naleyo yemaLamani bekatiletsela sicalekiso lesifanako etikwentalelwane yakhe.

10 Ngako-ke, loyo lobekavumela kutsi edukiswe ngemaLamani bekabitwa ngaphansi kwalelo bito, futsi kwakuba khona luphawu lolwalubekwa kuye.

11 Futsi kwenteka kutsi loyo lobekangakholelwa esikweni lemaLamani, kodvwa akholelwa kuleyo mibhalo leyayikhishwe eveni laseJerusalema, nasesikweni labokhokho babo, lebelilungile, labo labebakholelwa kumiyaleto yaNkulunkulu futsi bayigcina, bebabitwa ngekutsi maNefi, noma bantfu baNefi, kusukela ngaleso sikhatsi kuya phambili—

12 Futsi ngibo labo labagcine imibhalo leliciniso yebantfu babo, neyebantfu bemaLamani.

13 Manje sitawuphindze futsi sibuyele kuma-Amlisi, ngoba nawo ngalokunjalo bekaneluphawu lolwalubekwe kuwo; yebo, atibeka wona luphawu, yebo, luphawu lolubovu etimongweni tawo.

14 Ngaleyo ndlela livi laNkulunkulu liyagcwaliseka, ngoba lawa ngemavi lawasho kuNefi: Buka emaLamani ngiwacalekisile, futsi ngitawubeka luphawu kuwo kute wona nentalelwane yawo yehlukaniswe kuwe kanye nentalelwane yakho, kusukela ngalesi sikhatsi kuya phambili ingunaphakadze ngaphandle kwekutsi aphendvuke ebubini bawo futsi aphendvukele kimi kute ngibe nebubele kuwo.

15 Ngetulu kwaloko: Ngitawubeka luphawu kuloyo lohlanganisa intalelwane yakhe neyabomnakenu, kute nayo icalekiswe.

16 Ngetulu kwaloko: Ngitawubeka luphawu kuloyo lolwa nawe kanye nentalelwane yakho.

17 Ngetulu kwaloko, ngitsi loyo losukako kuwe angeke abitwe nanini ngentalelwane yakho; futsi ngitawukubusisa, kanye naloyo loyawubitwa ngentalelwane yakho, kuya phambili ingunaphakadze; futsi leti bekutetsembiso teNkhosi kuNefi kanye nakuyo intalelwane yakhe.

18 Manje ema-Amlisi bekangati kutsi agcwalisa emavi aNkulunkulu ngesikhatsi acala kutibeka luphawu etimongweni tawo; noko abephumele ebaleni ahlamuka Nkulunkulu; ngako-ke kwakufanele kutsi sicalekiso siwele kuwo.

19 Manje ngifuna kutsi nibone kutsi atiletsela wona sicalekiso; ngaleyo ndlela wonkhe umuntfu localekisiwe utiletsela yena kulahlwa ngelicala.

20 Manje kwenteka kutsi emalangeni nje langamanyenti emvakwemphi leyayiliwe eveni laseZarahemla, ngemaLamani kanye nema-Amlisi kwaba khona lelinye libutfo lemaLamani leleta kubantfu baNefi, endzaweni lefanako naleyo lapho libutfo lekucala lalihlangene khona nema-Amlisi.

21 Futsi kwenteka kutsi kwaba khona libutfo lelatfunyelwa kutsi libachube libakhiphe eveni labo.

22 Manje Alma aphetfwe linceba akahambanga kuyawukulwa ngalesi sikhatsi nemaLamani;

23 Kodvwa watfumela libutfo lelikhulu kuyawukulwa nawo; bahamba bakhuphuka babulala labanyenti bemaLamani, babachuba labasele bawo babakhiphela ngephandle kwemincele yelive labo.

24 Emvakwaloko baphindze babuya futsi bacala kucinisekisa kuthula eveni, sebete kukhatsatwa titsa tabo kwesikhashana.

25 Manje tonkhe leti tintfo tenteka, yebo, tonkhe leti timphi kanye netincabano kwacala kwaphindze kwaphela ngemnyaka wesihlanu wekubusa kwebehluleli.

26 Futsi ngemnyaka munye kwaba khona tinkhulungwane kanye nemashumi etinkhulungwane temiphefumulo leyatfunyelwa eveni laphakadze, kute ivune imivuzo yayo ngekwemisebenti yayo, noma yayimihle noma yayimibi, kute ivune kujabula kwaphakadze noma lusizi lwaphakadze, ngekwemoya lowo labakhetsa kutsi bawulalele, noma ngabe ngumoya lomuhle noma ngulowo lomubi.

27 Ngoba wonkhe umuntfu utfola inkhokhelo kuloyo lakhetse kutsi amlalele, futsi loku kungekwemavi emoya wesiphrofetho; ngako-ke akube ngekweliciniso. Futsi waphela kanjalo-ke umnyaka wesihlanu wekubusa kwebehluleli.