Sehluko 62
Moroni uyahamba uyawuniketa lusito kuPhahorani eveni laGideyoni—Bantfu benkhosi labangafuni kuvikela live labo bayabulawa—Phahorani kanye naMoroni baphindze bayayitsatsa iNefiha—EmaLamani lamanyenti ahlangana nebantfu ba-Amoni—Theyankhumi ubulala Amoroni futsi naye ngalokunjalo uyabulawa—EmaLamani ayakhishwa eveni, futsi kucinisekisa kuthula—Helamani ubuyela emsebentini uphindze wakha liBandla. Cishe ngemnyaka wema-62–57 ngaphambi kwekutalwa kwaKhristu.
1 Manje kwenteka kutsi ngesikhatsi Moroni sekayitfolile lencwadzi inhlitiyo yakhe yaba nesibindzi, futsi wagcwala injabulo lenkhulu kakhulu ngenca yekwetsembeka kwaPhahorani, kutsi bekangasiye naye umtsengisi kuyo inkhululeko kanye netimiso telive lakhe.
2 Kodvwa futsi wakhala kakhulu ngenca yebubi balabo labebasuse Phahorani esihlalweni sekwehlulela, yebo, kafishane nje ngenca yalabo labahlubuka eveni labo kanjalo nakuNkulunkulu wabo.
3 Futsi kwenteka kutsi Moroni watsatsa sibalo lesincane semadvodza, njengekwesifiso saPhahorani, waniketa Lehi kanye naTheyankhumi kuphatsa kulabo labebasele belibutfo lakhe, wabese uyahamba uya ngaseveni laGideyoni.
4 Futsi wasiphakamisa sibonakaliso senkhululeko kunoma nguyiphi indzawo labekangena kuyo, watsatsa noma ngabe nguliphi libutfo lebekangalitfola eluhambeni lwakhe lonkhe loluya ngaseveni laGideyoni.
5 Futsi kwenteka kutsi tinkhulungwane tabutsanela esibonakalisweni sakhe, tatitsatsa tinkemba tato kute tivikele inkhululeko yato, kute bangangeni ebugcilini.
6 Ngako-ke, ngesikhatsi Moroni sekawabutsele ndzawonye noma ngumaphi emadvodza labengawatfola ekuhambeni kwakhe konkhe, wefika eveni laGideyoni; ngesikhatsi ahlanganisa emabutfo akhe kanye nalawo aPhahorani baba nemandla kakhulu, ngisho nangetulu kwemadvodza aPhakhusi, lobekayinkhosi yalawo mahlubuka labekacoshe bantfu benkhululeko babakhipha eveni laseZarahemla futsi batsatsa live laba labo.
7 Futsi kwenteka kutsi Moroni kanye naPhahorani bahamba behlela entansi nemabutfo abo baya eveni laseZarahemla, bachubeka balihlasela lelidolobha, futsi bahlangabetana nebantfu baPhakhusi, kangangekutsi balwa.
8 Buka, Phakhusi wabulawa kwatsi bantfu bakhe batsatfwa baboshwa, Phahorani wabese ubuyiselwa esihlalweni sakhe sekwehlulela.
9 Bantfu baPhakhusi behlulelwa, ngekwemtsetfo, kanjalo nalabo bantfu benkhosi labebatsetfwe baphonswa ejele; babulawa ngekwemtsetfo; yebo, labo bantfu baPhakhusi kanye nalabo bantfu benkhosi, noma ngabe ngumuphi lobekangafuni kutsatsa tikhali kuvikela live labo, kodvwa balwa nalo, babulawa.
10 Ngaleyo ndlela kwadzingeka kutsi lomtsetfo ugcinwe ngekucophelela kwentelwe kuphepha kwelive labo; yebo, futsi loyo lobekatfolakala aphikisana nenkhululeko yabo wabulawa ngekushesha ngekwemtsetfo.
11 Waphela kanjalo-ke umnyaka wemashumi lamatsatfu wekubusa kwebehluleli kubantfu baNefi; Moroni kanye naPhahorani sebakubuyisele kuthula eveni laseZarahemla, emkhatsini webantfu babo, sebababulele bonkhe labo labebangakatsembeki etimisweni tenkhululeko.
12 Futsi kwenteka ekucaleni kwemnyaka wemashumi lamatsatfu nakunye wekubusa kwebehluleli kubantfu baNefi, Moroni masinyane wenta kutsi imiphako ihanjiswe, kanjalo nelibutfo lemadvodza latinkhulungwane letisitfupha litfunyelwe kuHelamani, kuyawumsita ekugcineni leyo ncenye yelive.
13 Ngetulu kwaloko wenta kutsi lelibutfo lemadvodza latinkhulungwane letisitfupha, nekudla lokwanele, kutfunyelwe emabutfweni aLehi anaTheyankhumi. Futsi kwenteka kutsi loku kwentiwa kute kuciniswe lelive ngekumelana nemaLamani.
14 Futsi kwenteka kutsi Moroni kanye naPhahorani, bashiya licembu lemadvodza lelikhulu eveni laseZarahemla, batsatsa luhambo lwabo nelicembu lelikhulu lemadvodza baya ngaseveni laseNefiha, baphokophele kuyawuketula emaLamani kulelo dolobha.
15 Futsi kwenteka kutsi ngesikhatsi basahamba baya ngakulelo live, babamba licembu lelikhulu lemadvodza emaLamani, babulala lamanyenti awo, baphindze batsatsa imiphako yawo kanye netikhali tawo.
16 Futsi kwenteka emvakwekutsi sebawatsetse, benta kutsi angene esivumelwaneni sekutsi angeke asatitsatsa tikhali tawo temphi alwe nemaNefi nanini.
17 Ngesikhatsi sekangene kulesi sivumelwano bawatfumela kutsi ayawuhlala nebantfu baka-Amoni, futsi bekasibalo cishe lesitinkhulungwane letine lawo labekangakabulawa.
18 Futsi kwenteka kutsi ngesikhatsi sebawatfumele bachubeka neluhambo lwabo loluya eveni laseNefiha. Futsi kwenteka kutsi ngesikhatsi sebafike edolobheni laseNefiha, bamisa emathende abo ematsafeni aseNefiha, labekasedvute nelidolobha laseNefiha.
19 Manje Moroni bekanesifiso sekutsi emaLamani aphume ayawukulwa nabo, ematsafeni; kodvwa emaLamani, ati ngesibindzi sabo lesikhulu kakhulu, aphindze abona sibalo sabo lesikhulu kakhulu, ngako-ke akalokotsanga nhlobo aphume kuyawukulwa nabo; ngako-ke abatange balwe ngalelo langa.
20 Ngesikhatsi busuku bufika, Moroni wahamba ebumnyameni kulobo busuku, wate wafinyelela esicongweni seludvonga kuhlola kutsi emaLamani bekangakuyiphi incenye yelidolobha lapho bekamise khona emathende kwesikhashana nelibutfo lawo.
21 Futsi kwenteka kutsi bekasemphumalanga, ngasekungeneni; futsi onkhe bekalele. Manje Moroni wabuyela ebutfweni lakhe, wenta kutsi lisheshise lilungise tintsambo leticinile kanye nemaladi, kutsi kwehliselwe phansi kusuka ngetulu eludvongeni kungeniswe ngekhatsi kweludvonga.
22 Futsi kwenteka kutsi Moroni wenta kutsi emadvodza akhe ahambe ete etikweludvonga, bese ehlela kuleyo ncenye yelidolobha, yebo, ngisho nasenshonalanga, lapho emaLamani bekangakemisi emathende awo kwesikhashana nemabutfo awo khona.
23 Futsi kwenteka kutsi bonkhe behliselwa edolobheni ebusuku, ngetintsambo tabo leticinile kanye nangemaladi abo; ngako-ke ngesikhatsi kufika kusa bonkhe bese bangekhatsi kwetindvonga telidolobha.
24 Manje, ngesikhatsi emaLamani avuka abona kutsi emabutfo aMoroni bekangekhatsi kwetindvonga, esaba kakhulu; kangangekutsi abaleka aphuma ngesikhala.
25 Manje ngesikhatsi Moroni abona kutsi bekambalekela, wenta kutsi emadvodza akhe ahambe awalandzele, abulale labanyenti, aphindze atungelete labanye labanyenti, bese ayawatsatsa abe tiboshwa; kwatsi labasalako bawo babalekela eveni laMoroni, lebelisemnceleni ngaselugwini lwelwandle.
26 Ngaleyo ndlela Moroni kanye naPhahorani balitfola lidolobha laseNefiha laba labo ngaphandle kwekulahlekelwa nangumphefumulo munye; futsi baba banyenti bemaLamani lababulawa.
27 Manje kwenteka kutsi labanyenti bemaLamani labebatiboshwa baba nesifiso sekuhlangana nebantfu ba-Amoni bese baba bantfu labakhululekile.
28 Futsi kwenteka kutsi bonkhe labo labebanaleso sifiso, banikwa njengekwetifiso tabo.
29 Ngako-ke, tonkhe tiboshwa temaLamani tahlangana nebantfu ba-Amoni, bacala kusebenta kakhulu, balima umhlabatsi, bakhulisa tonkhe tinhlobo talokuyinhlavu, kanye nemihlambi yetimvu nemihlambi yetinkhomo letitinhlobonhlobo; futsi ngaleyo ndlela emaNefi aphumula emtfwalweni lomkhulu; yebo, kangangekutsi aphunyutwa kuto tonkhe tiboshwa temaLamani.
30 Manje kwenteka kutsi Moroni, emvakwekutsi sekatfole lidolobha laseNefiha laba lakhe, sekatsetse tiboshwa letinyenti, loko lokwasehlisa kakhulu sibalo semabutfo emaLamani, futsi sekatfole labanyenti bemaNefi labebaboshiwe, loko lokwalicinisa kakhulu libutfo laMoroni; ngako-ke Moroni wahamba esuka eveni laseNefiha waya eveni laLehi.
31 Futsi kwenteka kutsi ngesikhatsi emaLamani abona kutsi Moroni beketa atawukulwa nawo, aphindze esaba futsi alibalekela libutfo laMoroni.
32 Futsi kwenteka kutsi Moroni kanye nelibutfo lakhe bawacosha lidolobha ngelidolobha, bate bahlangana naLehi banaTheyankhumi; futsi emaLamani abalekela Lehi anaTheyankhumi, ehlela eminceleni ngaselugwini lwelwandle, ate afika eveni laMoroni.
33 Emabutfo emaLamani abutsana onkhe ndzawonye, kangangoba onkhe aba licembu linye eveni laMoroni. Manje Amoroni, inkhosi yemaLamani, nayo ngalokunjalo beyinawo.
34 Futsi kwenteka kutsi Moroni naLehi kanye naTheyankhumi bakanekisa nemabutfo abo batungeleta eminceleni yelive laMoroni, kangangoba emaLamani atungeletwa eminceleni yelihlane ngaseningizimu, kanye naseminceleni yelihlane lelisemphumalanga.
35 Futsi ngaleyo ndlela bamisa emathende kwesikhashana busuku bonkhe. Ngoba buka, emaNefi kanye nemaLamani ngalokunjalo besebakhatsele ngenca yebudze beluhambo; ngako-ke abentanga licebo ebusuku, ngaphandle kwaTheyankhumi; ngoba yena bekamtfukutselele kakhulu Amoroni, kangangekutsi bekabona kutsi ngu-Amoroni, kanye na-Amalikhiya umnakabo, labebayimbangela yalemphi lenkhulu nalengapheli emkhatsini wabo kanye nemaLamani, lebeyiyimbangela yekulwa kanye nekucitseka kwengati lokukhulu kangaka, yebo, kanye nendlala lengaka.
36 Futsi kwenteka kutsi Theyankhumi entfukutselweni yakhe wahamba waya enkanjini yemaLamani, wehla ngeludvonga lwelidolobha. Wahamba ngentsambo, indzawo ngendzawo, kangangoba wate wayitfola inkhosi; wayijikijela ngentjumentju, leyayibhobosa edvute nenhlitiyo. Kodvwa buka, inkhosi yativusa tinceku tayo ngaphambi kwekutsi ife, kangangekutsi tamcosha Theyankhumi, futsi tambulala.
37 Manje kwenteka kutsi ngesikhatsi Lehi kanye naMoroni batfola kutsi Theyankhumi besekafile badzabuka kakhulu; ngoba buka, bekayindvodza lebeyililwele ngebuchawe live layo, yebo, umngani weliciniso lenkhululeko; futsi bekeve tinhlupheko letinyenti kakhulu. Kodvwa buka, besekafile, futsi sekahambe indlela yemhlaba wonkhe.
38 Manje kwenteka kutsi Moroni wahamba ngakusasa, wate wefika kumaLamani, kangangekutsi bawabulala kakhulu; baphindze bawachuba bawakhipha eveni; abaleka, kangangekutsi abatange basabuya ngaleso sikhatsi kutawukulwa nemaNefi.
39 Futsi waphela kanjalo-ke umnyaka wemashumi lamatsatfu nakunye wekubusa kwebehluleli kubantfu baNefi; ngaleyo ndlela bese bake baba netimphi, nekucitseka kwengati, nendlala, kanye netinhlupheko, sikhatsi lesiyiminyaka leminyenti.
40 Futsi bekukhona kubulalana, netincabano, nekuhlubuka, kanye nato tonkhe tinhlobo tebubi emkhatsini webantfu baNefi; noko ngenca yalabalungile, yebo, ngenca yemithandazo yalabalungile, basindziswa.
41 Kodvwa buka, ngenca yekudvonsa lokukhulu kakhulu kwalemphi emkhatsini wemaNefi kanye nemaLamani labanyenti bese balukhuni, ngenca yekudvonsa lokukhulu kakhulu kwemphi; futsi labanyenti batsamba ngenca yetinhlupheko tabo, kangangekutsi batitfoba phambi kwaNkulunkulu, ngisho nasekujuleni kwekutfobeka.
42 Futsi kwenteka kutsi emvakwekutsi Moroni sekaticinisile leto tincenye telive lebetisengotini kakhulu kumaLamani, taze tacina ngalokwanele, wabuyela edolobheni laseZarahemla; kanjalo naHelamani wabuyela endzaweni lelifa lakhe; kwaba khona kuthula lokwacinisekiswa emkhatsini webantfu baNefi.
43 Moroni wanikela kuphatfwa kwemabutfo akhe etandleni tendvodzana yakhe, libito layo bekunguMoroniha; futsi yena watsatsa umhlalaphansi ekhaya lakhe kute acitse emalanga akhe labekasasele ngekuthula.
44 Futsi Phahorani wabuyela esihlalweni sakhe sekwehlulela; naHelamani watsatsa umsebenti wekushumayela kubantfu livi laNkulunkulu; ngoba ngenca yetimphi letinyenti kangaka kanye netincabano kwadzingeka kutsi lihlelwe futsi libandla.
45 Ngako-ke, Helamani kanye nabomnakabo bahamba, balimemetela livi laNkulunkulu ngemandla lamakhulu, kangangoba bakholwisa bantfu labanyenti ngebubi babo, lokwabenta kutsi baphendvuke etonweni tabo baphindze babhajatiswe eNkhosini Nkulunkulu wabo.
46 Futsi kwenteka kutsi baphindze balisungula libandla laNkulunkulu, kulo lonkhe live.
47 Yebo, imigomo yentiwa mayelana nemtsetfo. Behluleli babo, kanye nebehluleli babo labakhulu bakhetfwa.
48 Futsi bantfu baNefi baphindze bacala baphumelela eveni, bacala bandza bacina kakhulu eveni. Bacala futsi bakhula banotsa kakhulu.
49 Kodvwa nanoma kungenca yemcebo wabo, nemandla abo, kanye nemphumelelo yabo, abatange batikhukhumete ngenca yekutibona kwabo; noma baphute kukhumbula iNkhosi Nkulunkulu wabo; kodvwa batitfoba kakhulu phambi kwayo.
50 Yebo, bakhumbula kutsi betitinkhulu kangakanani tintfo iNkhosi lebeyibentele tona, kutsi beyibakhululile ekufeni, nasekuboshweni, nasemajele, kanye nakuto tonkhe tinhlobo tetinhlupheko, futsi beyibakhululile baphuma etandleni tetitsa tabo.
51 Futsi bathandaza eNkhosini Nkulunkulu wabo njalonjalo, kangangekutsi iNkhosi yababusisa, njengekwelivi layo, kangangoba bakhula bacina baphindze baphumelela eveni.
52 Futsi kwenteka kutsi tonkhe leti tintfo tenteka. NaHelamani wafa, ngemnyaka wemashumi lamatsatfu nesihlanu wekubusa kwebehluleli kubantfu baNefi.