1 Manje ngesikhatsi Amoni kanye nabomnakabo sebatehlukanisile eminceleni yelive lemaLamani, buka Aroni watsatsa luhambo lwakhe loluya eveni lebelibitwa ngemaLamani ngekutsi yiJerusalema, balibita ngelive lekutalwa labokhokho babo; futsi belikhashane lihlanganisa imincele yaMormon.

2 Manje emaLamani nema-Amaleki kanye nebantfu baka-Amuloni bese bakhe lidolobha lelikhulu, lebelibitwa ngekutsi yiJerusalema.

3 Manje emaLamani ngekwawo nje abelukhuni ngalokwanele, kodvwa ema-Amaleki kanye nema-Amuloni abelukhuni ngalokwendlulele; ngako-ke bawabangela emaLamani kutsi ente lukhuni tinhlitiyo tawo, kutsi akhule acine ebubini kanye nasetinengisweni tawo.

4 Futsi kwenteka kutsi Aroni weta edolobheni laseJerusalema, wacala kushumayela kuma-Amaleki. Wacala kushumayela kuwo emasinagogeni awo, ngoba besekakhe emasinagoge ngekweluhlelo lwemaNehori; ngoba labanyenti bema-Amaleki kanye nema-Amuloni bebabeluhlelo lwemaNehori.

5 Ngako-ke, ngesikhatsi Aroni angena kulenye yemasinagoge abo kutsi ayewushumayela kubantfu, futsi ngesikhatsi akhuluma nabo, buka kwavuka um-Amaleki wacala kuphikisana naye, watsi: Yini lena lofakaza ngayo? Uke wayibona ingilosi na? Kungani tingilosi tingaveli kitsi? Buka ngabe labantfu abakalungi yini njengebantfu bakho na?

6 Futsi utsi, ngaphandle kwekutsi siphendvuke siyawubhubha. Uwati kanjani umcabango kanye nenhloso yetinhlitiyo tetfu na? Wati kanjani kutsi sinesidzingo sekutsi siphendvuke na? Wati kanjani kutsi asisibo bantfu labalungile na? Buka, sitakhile tindzawo letingcwele, futsi siyahlangana ndzawonye kute sidvumise Nkulunkulu. Siyakholwa kutsi Nkulunkulu utawubasindzisa bonkhe bantfu.

7 Manje Aroni watsi kuye: Uyakholwa yini kutsi iNdvodzana yaNkulunkulu iyawuta kutawuhlenga bantfu etonweni tabo na?

8 Lendvodza yatsi kuye: Tsine asikholelwa kutsi uyayati intfo lenjalo. Asikholelwa kulamasiko labulima. Asikholelwa kutsi uyati ngetintfo letisetawukwenteka, noma sikholelwe kutsi bokhokho bakho kanjalo nabokhokho betfu bebati mayelana netintfo labatikhuluma, letisetawukwenteka.

9 Manje Aroni wacala kubavulela imibhalo lengcwele mayelana nekuta kwaKhristu, kanjalo mayelana nekuvuswa kwalabafile, nekutsi angeke kube khona kuhlengwa kweluntfu ngaphandle kwekutsi kube kungekufa kanye nekuhlupheka kwaKhristu, kanye nenhlawulo yengati yakhe.

10 Futsi kwenteka kutsi ngesikhatsi acala kubachazela ngaleti tintfo bamtfukutselela, bacala kuhlekisa ngaye; futsi abafunanga kuwalalela emavi labekawakhuluma.

11 Ngako-ke, ngesikhatsi abona kutsi bebangafuni kuweva emavi akhe, wesuka esinagogeni labo, weta edolobheni lelincane lebelibitwa ngekutsi yi-Ani-Anti, futsi lapho watfola Muloki ashumayela livi kubo; ngalokunjalo na-Ama kanye nabomnakabo. Futsi bebaphikisana nalabanyenti ngelivi.

12 Futsi kwenteka kutsi babona kutsi bantfu bebatawutenta lukhuni tinhlitiyo tabo, ngako-ke besuka beta eveni laseMidoni. Balishumayela livi kulabanyenti, futsi bambalwa labakholelwa emavini labebawafundzisa.

13 Noko, Aroni kanye nesibalo lesitsite sabomnakabo batsatfwa baphonswa ejele, kwatsi labasalako babaleka baphuma eveni laseMidoni baya etifundzeni letitungeletile.

14 Futsi labo labaphonswa ejele beva buhlungu ngetintfo letinyenti, bate bakhululwa ngesandla saLamoni kanye na-Amoni, baphiwa kudla baphindze bembatsiswa.

15 Baphindze bahamba bayawumemetela livi, ngaleyo ndlela bakhululwa kwekucala baphuma ejele; ngaleyo ndlela bebeve buhlungu.

16 Bahamba bayanoma ngukuphi lapho bebaholwa khona nguMoya weNkhosi, bashumayela livi laNkulunkulu kuwo onkhe emasinagoge ema-Amaleki, noma kuyo yonkhe imibutsano yemaLamani lapho bebamukelwa khona.

17 Futsi kwenteka kutsi iNkhosi yacala kubabusisa, kangangekutsi baletsa labanyenti ekwatini liciniso; yebo, bakholwisa labanyenti ngetono tabo, kanye nangemasiko abokhokho babo, labengakalungi.

18 Futsi kwenteka kutsi Amoni kanye naLamoni babuya eveni laseMidoni baya eveni la-Ishmayeli, lokwakulive lelalilifa labo.

19 Futsi inkhosi Lamoni ayivumanga kutsi Amoni ayisebentele, noma abe yinceku yayo.

20 Kodvwa yenta kutsi kwakhiwe emasinagoge eveni la-Ishmayeli; yenta kutsi bantfu bayo, noma bantfu labebangaphansi kwembuso wayo, babutsane ndzawonye.

21 Yatfokota ngabo, yabafundzisa tintfo letinyenti. Yaphindze yamemetela kubo kutsi bebabantfu labebangaphansi kwayo, nekutsi bebabantfu labebakhululekile, kutsi bebakhululekile ekucindzetelweni yinkhosi, uyise; ngoba uyise bekasayivumele kutsi ingabusa ngetulu kwebantfu labebaseveni la-Ishmayeli, kanye nakulo lonkhe live lelalitungeletiwe.

22 Futsi yaphindze yamemetela kubo kutsi bebanayo inkhululeko yekudvumisa iNkhosi Nkulunkulu wabo ngekwetifiso tabo, kunoma nguyiphi indzawo labebakuyo, uma nje kuseveni lelalingaphansi kwembuso wenkhosi Lamoni.

23 Amoni washumayela kubantfu benkhosi Lamoni; futsi kwenteka kutsi wabafundzisa tonkhe tintfo mayelana netintfo letiphatselene nekulunga. Wabakhutsata emalanga onkhe, ngako konkhe kukhutsala; baligcina livi lakhe, futsi bebanenshisekelo yekugcina imiyaleto yaNkulunkulu.