1 Ndvodzana yami, lalela emavi ami; ngoba ngiyafunga kuwe, kutsi nangabe uyawuyigcina imiyaleto yaNkulunkulu uyawuphumelela eveni.

2 Ngifuna kutsi wente njengobe ngentile, ngekukhumbula kutfunjwa kwabokhokho betfu; ngoba bebasebugcilini, futsi bekute namunye lobekangabakhulula ngaphandle kwekutsi kube nguNkulunkulu wa-Abrahama, naNkulunkulu wa-Isaka, kanye naNkulunkulu waJakobe; futsi ngempela wabakhulula etinhluphekweni tabo.

3 Manje, O ndvodzana yami Helamani, buka, usesebusheni bakho, ngako-ke, ngiyakuncusa kutsi shangatsi ungaweva emavi ami futsi ufundze kimi; ngoba ngiyati kutsi noma bobani labayawubeka litsemba labo kuNkulunkulu bayawusekelwa etilingweni tabo, nasetinkhatsatweni tabo, kanye nasetinhluphekweni tabo, futsi bayawuphakanyiswa ngelilanga lekugcina.

4 Futsi angifuni kutsi ucabange kutsi ngiyatatela ngekwami—hhayi ngekwenyama kodvwa ngekwakamoya, hhayi ngekwebantfu labanaka kwenyama kodvwa ngaNkulunkulu.

5 Manje, buka, ngitsi kuwe, kube bengingatalwa nguNkulunkulu bengingeke ngitati letintfo; kodvwa Nkulunkulu, ngemlomo wengilosi yakhe lengcwele ungembulele, hhayi ngenca yekufaneleka kwami;

6 Ngoba ngahamba ngizulazula nemadvodzana aMosiya, sifuna kubhubhisa libandla laNkulunkulu, kodvwa buka, Nkulunkulu watfumela ingilosi yakhe lengcwele kutsi isimise endleleni.

7 Buka, yakhuluma kitsi, kwangatsi livi lekudvuma, umhlaba wonkhe watamatama ngaphansi kwetinyawo tetfu; sonkhe sawela phansi, ngoba kwesaba iNkhosi kwefika kitsi.

8 Kodvwa buka, livi latsi kimi: Phakama. Ngaphakama ngasukuma ngema, ngayibona ingilosi.

9 Yatsi kimi: Uma wena ufuna ngekwakho kubulawa, ungabe usaphindza ufune kubhubhisa libandla laNkulunkulu.

10 Futsi kwenteka kutsi ngawela phansi, kwaba sikhatsi lesingemalanga lamatsatfu kanye nebusuku lobutsatfu ngingakwati kuvula umlomo wami, noma ngisebentise emalunga ami.

11 Futsi ingilosi yakhuluma tintfo letinyenti kimi, letaviwa bomnaketfu, kodvwa mine angitivanga ngoba ngesikhatsi ngiva lamavi atsi—Uma wena ufuna ngekwakho kubulawa, ungabe usaphindza ufune kubhubhisa libandla laNkulunkulu—ngashaywa kwesaba lokukhulu kakhulu kanye nekumangala funa mhlawumbe ngibulawe, kangangekutsi ngawela phansi ngangabe ngiseva lutfo.

12 Kodvwa ngahlushwa kuhlupheka lokungapheli, ngoba umphefumulo wami wakhatsateka kakhulu waphindze wahlupheka ngetono tami tonkhe.

13 Yebo, ngatikhumbula tonkhe tono tami kanye nebubi bami lengahlushwa ngabo ngebuhlungu besihogo; yebo, ngabona kutsi ngangimhlamukile Nkulunkulu wami, nekutsi ngangingayigcinanga imiyaleto yakhe lengcwele.

14 Yebo, futsi ngangibulele labanyenti bebantfwana bakhe, noma-ke ngalenye indlela ngangibaholele ekubhujisweni; yebo kwephetsa nje babubukhulu bubi bami, kangangekutsi umcabango nje wekuta phambi kwaNkulunkulu wawuhlupha umphefumulo wami ngekwesaba lokungachazeki.

15 O, ngacabanga, kutsi ngingacoshwa futsi ngibe ngulongasekho ngekwemphefumulo kanye nangekwemtimba, kute ngingaletfwa kutsi ngime phambi kwaNkulunkulu wami, kutsi ngehlulelwe ngetento tami.

16 Futsi manje, emalanga lamatsatfu kanye nebusuku lobutsatfu ngahlushwa, nangebuhlungu bemphefumulo lojezisiwe.

17 Futsi kwenteka kutsi njengobe ngangihlushwa kuhlupheka, ngesikhatsi ngisakhatsatwa kukhumbula tono tami letinyenti, buka, ngakhumbula futsi kutsi ngamuva babe aphrofetha kubantfu mayelana nekuta kwaJesu Khristu lotsite, iNdvodzana yaNkulunkulu, kutawuhlawulela tono temhlaba.

18 Manje, ngesikhatsi ingcondvo yami ibambelela kulomcabango, ngakhala ngekhatsi enhlitiyweni yami ngatsi: O Jesu, Ndvodzana yaNkulunkulu, bani nebubele kimi, mine lengiselusizini, futsi ngitungeletwe ndzawo tonkhe tinketane taphakadze tekufa.

19 Manje, buka, ngesikhatsi ngikucabanga loku, angitange ngisabuva buhlungu lenganginabo; yebo, angitange ngisakhatsatwa kukhumbula tono tami.

20 O, yeka bukhulu benjabulo, nekumangalisa kwekukhanya lengakubona; yebo, umphefumulo wami wagcwaliswa ngenjabulo leyabayinkhulu njengebuhlungu bami!

21 Yebo, ngitsi kuwe, ndvodzana yami, kute lokwakungaba kukhulu futsi kube buhlungu njengebuhlungu lenganginabo. Yebo, futsi ngiyaphindza ngitsi kuwe, ndvodzana yami, ngakulolunye luhlangotsi kute lokungaba kukhulu futsi kube mnandzi njengenjabulo lengaba nayo.

22 Yebo, ngacabanga kutsi ngabona, njengobe babe Lehi abona, Nkulunkulu ahleti esihlalweni sakhe sebukhosi, atungeletwe ticuku tetingilosi letingabaleki, tisesimeni sekuhlabela kanye nekudvumisa Nkulunkulu wato; yebo, futsi umphefumulo wami walangatelela kuba lapho.

23 Kodvwa buka, emalunga ami aphindze atfola emandla awo, ngema ngetinyawo tami, ngamemeta kubantfu kutsi ngasengitelwe nguNkulunkulu.

24 Yebo, kusukela ngaleso sikhatsi kute kube ngumanje, ngisebente ngangayekeli, kute ngiletse bantfu ekuphendvukeni; kute ngibaletse kutsi beve leyo njabulo lenkhulu nami lengayiva; kute nabo ngalokunjalo batalwe nguNkulunkulu, bagcwaliswe ngaMoya loNgcwele.

25 Yebo, manje buka, O ndvodzana yami, iNkhosi inginika injabulo lenkhulu ngalokwendlulele ngenca yetitselo tekusebenta kwami;

26 Ngoba ngenca yelivi lenginikete lona, buka, labanyenti batelwe nguNkulunkulu, futsi beve njengobe nami ngivile, futsi batibonela ngewabo emehlo njengobe nami ngibonile; ngako-ke bayati ngaletintfo lengikhulume ngato, njengobe nami ngati; futsi lwati lenginalo luvela kuNkulunkulu.

27 Futsi bengisekelwe ngisetilingweni kanye nasetinkhatsatweni letitinhlobonhlobo, yebo, nakuto tonkhe tinhlobo tetinhlupheko; yebo, Nkulunkulu ungikhululile ejele, nasekuboshweni, kanye nasekufeni; yebo, ngibeka litsemba lami kuye, futsi usetawungikhulula njalo.

28 Futsi ngiyati kutsi uyawungivusa ngelilanga lekugcina, kute ngihlale naye enkhatimulweni; yebo, ngitawumdvumisa ingunaphakadze, ngoba ubakhiphile bokhokho betfu eGibhithe, uwagwinyile emaGibhithe eLwandle loluBovu; wabahola ngemandla akhe wabayisa eveni lesetsembiso; yebo, futsi ubakhululile ebugcilini kanye nasekutfunjweni tikhatsi ngetikhatsi.

29 Yebo, ngetulu kwaloko ubakhiphile bokhokho betfu eveni laseJerusalema; futsi, ngemandla akhe langapheli, wabakhulula baphuma ebugcilini kanye nasekutfunjweni, tikhatsi ngetikhatsi kwehle kute kufike kulelilanga lalamuhla; futsi njalo nje ngihlala ngikhumbula kutfunjwa kwabo; yebo, nawe ngalokunjalo kumele uhlale ukukhumbula, njengobe nami ngentile, kutfunjwa kwabo.

30 Kodvwa buka, ndvodzana yami, akusiko loku kuphela; ngoba nawe kumele wati njengobe nami ngati, kutsi nangabe uyawuyigcina imiyaleto yaNkulunkulu uyawuphumelela eveni; kumele wati futsi, kutsi nangabe ungeke uyigcine imiyaleto yaNkulunkulu uyawususwa ebukhoneni bakhe. Manje loku kungekwelivi lakhe.