1 Futsi buka, manje kwenteka kutsi lawo maLamani atfukutsela kakhulu ngoba bebabulele bomnakabo; ngako-ke afungela kutiphindzisela kumaNefi; futsi akatange asenta imetamo yekutsi ababulale bantfu bema-Anti Nefi Lehi ngaleso sikhatsi.

2 Kodvwa atsatsa emabutfo awo ahamba awelela eminceleni yelive laseZarahemla, ahlasela bantfu labebaseveni lase-Amoniha futsi bababulala.

3 Emvakwaloko, aba netimphi letinyenti nemaNefi, kuto achutjwa aphindze abulawa.

4 Futsi emkhatsini wemaLamani labekabulewe bekukhona cishe yonkhe intalelwane ya-Amuloni kanye nabomnakabo, labebabaphristi baNowa, futsi babulawa ngetandla temaNefi;

5 Futsi labasala, sebabalekele ehlane lelisemphumalanga, sebatitsatsele emandla kanye neligunya ngetulu kwemaLamani, benta kutsi emaLamani lamanyenti afe ngemlilo ngenca yenkholelo yawo—

6 Ngoba labanyenti bawo, emvakwekutsi asabe nekulahlekelwa lokukhulu kanye netinhlupheko letinyenti kakhulu, acala kuphehlelwa ekukhumbuleni emavi Aroni nabomnakabo labebawashumayele kubo eveni labo; ngako-ke acala kungawakholwa emasiko abokhokho babo, akholwa eNkhosini, nekutsi yaniketa emandla lamakhulu kumaNefi; futsi ngaleyo ndlela kwaba khona labanyenti bawo labaphendvuka ehlane.

7 Futsi kwenteka kutsi labo babusi labebayinsali yebantfwana ba-Amuloni benta kutsi babulawe, yebo, bonkhe labo labebakholelwa kuleti tintfo.

8 Manje loku kufela lukholo kwenta kutsi labanyenti babomnakabo baphehlelwe entfukutselweni; futsi kwacala kwaba khona incabano ehlane; emaLamani acala kutingela intalelwane ya-Amuloni kanye nabomnakabo aphindze acala kuyibulala; futsi babalekela ehlane lelisemphumalanga.

9 Buka basatingelwa nangaleli lilanga ngemaLamani. Ngaleyo ndlela emavi a-Abinadi agcwaliseka, lawasho mayelana nentalelwane yebaphristi labenta kutsi eve tinhlungu tekufa ngemlilo.

10 Ngoba watsi kubo: Loko leniyawukwenta kimi kuyawuba luhlobo lwetintfo letitawukwenteka.

11 Manje Abinadi waba wekucala loweva tinhlungu tekufa ngemlilo ngenca yenkholelo yakhe kuNkulunkulu; manje nguloku labekucondzile, kutsi labanyenti bayawuva tinhlungu tekufa ngemlilo, njengobe naye ativa.

12 Washo kubaphristi baNowa kutsi intalelwane yabo iyawukwenta labanyenti kutsi babulawe, ngendlela lefanako njengobe kwentiwa nakuye, nekutsi bayohlakatwa ngaphandle baphindze babulawe, njengetimvu letingenamelusi ticoshwa tiphindze tibulawa tilwane tesiganga; manje bukani, lamavi acinisekiswa, ngoba bacoshwa ngemaLamani, batingelwa, baphindze bashaywa.

13 Futsi kwenteka kutsi ngesikhatsi emaLamani abona kutsi bekangeke akhone kuncoba emaNefi aphindze abuyela eveni lawo; lamanyenti awo eta atohlala eveni la-Ishmayeli kanye naseveni laNefi, atihlanganisa nebantfu baNkulunkulu, labebabantfu ba-Anti Nefi Lehi.

14 Futsi nawo ngalokunjalo atingcwaba tikhali tawo temphi, njengobe nabomnakabo bebentile, acala kutsi abe bantfu labalungile; ahamba etindleleni teNkhosi, futsi betama kugcina imiyaleto kanye nemitsetfo yayo.

15 Yebo, bawugcina umtsetfo waMosi, ngoba bekudzingekile kutsi bawugcine umtsetfo waMosi kwangaleso sikhatsi, ngoba bekungakagcwaliseki konkhe. Kodvwa nanoma wawukhona umtsetfo waMosi, babuka embili ekuteni kwaKhristu, babona kutsi umtsetfo waMosi bewuluphawu lwekuta kwakhe, futsi bakholelwa kutsi kufanele bagcine leto tento letibonakalako kute kube sikhatsi ayokwembulwa ngaso kubo.

16 Manje bebangacabangi kutsi kusindziswa kwakuta ngemtsetfo waMosi; kodvwa umtsetfo waMosi wenta kutsi lukholo lwabo kuKhristu lucine; futsi ngaleyo ndlela baligcina litsemba ngelukholo, lelaliholela ekusindzisweni kwaphakadze, batsembele kumoya wekuphrofetha, lowakhuluma ngaleto tintfo letatitawukwenteka.

17 Manje bukani, Amoni, na-Aroni, na-Omneri, naHimni, kanye nabomnakabo bajabula kakhulu, ngemphumelelo lababenayo emkhatsini wemaLamani, babona kutsi iNkhosi yayibaniketile ngekwemithandazo yabo, nekutsi ngetulu kwaloko yalicinisekisa livi layo kubo ngayo yonkhe indlela.