1 Futsi kwenteka kutsi ngesikhatsi sebalisungulise libandla kulelo live, inkhosi Lamoni yaba nesifiso sekutsi Amoni ahambe nayo aye eveni laNefi, kute imkhombise uyise.

2 Livi leNkhosi lafika ku-Amoni, litsi: Ungahambi ukhuphukele eveni laNefi, ngoba buka, inkhosi itawufuna imphilo yakho; kodvwa uyawuya eveni laseMidoni; ngoba buka, umnakenu Aroni, naMuloki kanye na-Ama basejele.

3 Manje kwenteka kutsi ngesikhatsi Amoni sekakuvile loku, watsi kuLamoni: Buka, umnaketfu kanye nabomnaketfu basejele eMidoni, futsi ngitawuhamba kute ngiyawubakhulula.

4 Manje Lamoni watsi ku-Amoni: Ngiyati, ngemandla eNkhosi ungakwati kwenta tonkhe tintfo. Kodvwa buka, ngitawuhamba nawe siye eveni laseMidoni; ngoba inkhosi yelive laseMidoni, libito layo lokungu-Antiyomno, ingumngani wami; ngako-ke ngitakuya eveni laseMidoni, kute ngiyincenge inkhosi yelive, futsi itawubakhipha bomnakenu ejele. Manje Lamoni watsi kuye: Ngubani lokutjele kutsi bomnakenu basejele na?

5 Amoni watsi kuye: Kute longitjelile, ngaphandle kwaNkulunkulu; futsi utsite kimi—Hamba uyokhulula bomnakenu, ngoba basejele eveni laseMidoni.

6 Manje ngesikhatsi Lamoni sekakuvile loku wenta kutsi tinceku takhe tilungise emahhashi kanye netincola takhe.

7 Watsi ku-Amoni: Wota, ngitawuhamba nawe sehlele eveni lase Midoni, lapho ngitawuyincenga inkhosi kutsi ibakhiphe bomnakenu ejele.

8 Futsi kwenteka kutsi ngesikhatsi Amoni kanye naLamoni basahamba baya lapho, bahlangana neyise waLamoni, lobekayinkhosi eveni lonkhe.

9 Buka, uyise waLamoni watsi kuye: Awutanga ngani edzilini ngalela langa lelikhulu ngesikhatsi ngentele emadvodzana ami, kanye nebantfu bami lidzili na?

10 Ngetulu kwaloko watsi: Uyaphi nalomNefi, longulomunye webantfwana bemkhohlisi na?

11 Futsi kwenteka kutsi Lamoni wamlandzisa kutsi bekayaphi, ngoba bekesaba kumkhuba.

12 Futsi waphindze wamtjela sizatfu sekutsi ahlale embusweni wakhe, nekutsi yini angayanga edzilini uyise lebekalilungisile.

13 Manje ngesikhatsi Lamoni sekamlandzisile tonkhe leti tintfo, buka, wamangala, uyise wamtfukutselela, watsi: Lamoni, uyawukhulula lamaNefi, langemadvodzana emkhohlisi. Buka, wagebenga bobabe betfu; manje bantfwana bakhe nabo ngalokunjalo beta emkhatsini wetfu kute, ngebucili babo kanye nangemanga abo, basikhohlise, kute baphindze basigebenge imphahla yetfu.

14 Manje uyise waLamoni wamyaleta kutsi abulale Amoni ngenkemba. Waphindze wamyaleta kutsi angayi eveni laseMidoni, kodvwa kutsi abuyele naye eveni la-Ishmayeli.

15 Kodvwa Lamoni watsi kuye: Ngeke ngimbulale Amoni, noma ngibuyele eveni la-Ishmayeli, kodvwa ngiya eveni laseMidoni kute ngikhulule bomnakabo-Amoni, ngoba ngiyati kutsi bangemadvodza lalungile futsi babaphrofethi labangcwele baNkulunkulu weliciniso.

16 Manje ngesikhatsi uyise sekawavile lamavi, wamtfukutselela, wahoshula inkemba yakhe kute amshaye amwisele phansi.

17 Kodvwa Amoni wema ngembili watsi kuye: Buka, ungayibulali indvodzana yakho; noko, bekuyawubancono kutsi kufe yona kunawe, ngoba buka, iphendvukile etonweni tayo; kodvwa uma wena ungafa ngalesi sikhatsi, usentfukutselweni yakho, umphefumulo wakho awunakusindziswa.

18 Futsi ngetulu kwaloko, kudzingekile kutsi ukuyekele loku; ngoba uma ungayibulala indvodzana yakho, ibe yona iyindvodza lengenacala, ingati yayo iyawukhala isuka phansi iye eNkhosini Nkulunkulu wayo, kute imphindziselo ite etikwakho; futsi mhlawumbe ungalahlekelwa nangumphefumulo wakho.

19 Manje ngesikhatsi Amoni sekawashito lamavi kuye, wamphendvula, watsi: Ngiyati kutsi uma ngingabulala indvodzana yami, ngiyawube ngicitsa ingati lengenacala; ngoba nguwe lona lofune kuyibulala.

20 Futsi yelula sandla sayo kute ibulale Amoni. Kodvwa Amoni wamelana nekushaywa ngiyo, waphindze washaya umkhono wayo kute ingabe isakhona kuwusebentisa.

21 Manje ngesikhatsi inkhosi ibona kutsi Amoni angayibulala, yacala kuncenga ku-Amoni kutsi aphephise imphilo yayo.

22 Kodvwa Amoni waphakamisa inkemba yakhe, watsi kuyo: Buka, ngitawukubulala ngaphandle kwekutsi uvume kutsi bomnaketfu bakhishwe ejele.

23 Manje inkhosi, inekwesaba kutsi ingase ilahlekelwe yimphilo yayo, yatsi: Uma nje ungangisindzisa ngitawukunika noma ngabe yini lotawuyicela, noma ngabe yincenye yembuso.

24 Manje ngesikhatsi Amoni abona kutsi besekayitfolile inkhosi lendzala njengekwesifiso sakhe, watsi kuyo: Uma nje ungavumela bomnaketfu kutsi baphume ejele, nekutsi Lamoni agcine umbuso wakhe, nekutsi ungabi nekungamtsandzi, kodvwa umvumele kutsi ente njengekwetifiso takhe kunoma nguyiphi intfo layicabangako, uma kunjalo ngitawukuphephisa; kungesinjalo ngitawukushaya ngikulahle phansi.

25 Manje ngesikhatsi Amoni sekawashito lamavi, inkhosi yacala kutfokota ngenca yemphilo yayo.

26 Futsi ngesikhatsi ibona kutsi Amoni bekete inhloso yekuyibulala, ngesikhatsi ibona lutsandvo lolukhulu lebekanalo ngendvodzana yayo Lamoni, yamangala kakhulu, yatsi: Ngenca yekutsi nguloku kuphela lokufisako, kutsi ngikhulule bomnakenu, futsi ngivume kutsi indvodzana yami Lamoni igcine umbuso wayo, buka, ngitawuvuma kutsi indvodzana yami iwugcine umbuso wayo kusukela kulesi sikhatsi naphakadze; angeke ngiphindze ngiyibuse nanini.

27 Ngetulu kwaloko ngitawuvuma kutsi bomnakenu bakhishwe ejele, futsi wena kanye nabomnakenu ningeta kimi, embusweni wami; ngoba ngiyafisa kakhulu kutsi ngikubone. Ngoba inkhosi beyimangele kakhulu ngemavi labekawakhulumile, futsi ngalokunjalo nangemavi labekakhulunywe yindvodzana yayo Lamoni, ngako-ke yaba nesifiso sekuwafundza.

28 Futsi kwenteka kutsi Amoni kanye naLamoni bachubeka neluhambo lwabo lwekuya ngaseveni laseMidoni. Lamoni watfola kutsandvwa emehlweni enkhosi yelive; ngako-ke bomnakabo-Amoni bakhishwa ejele.

29 Ngesikhatsi Amoni ahlangana nabo wadzabuka kakhulu, ngoba buka bebangcunu, futsi tikhumba tabo betigatukile kakhulu ngenca yekuboshwa ngetintsambo leticinile. Ngetulu kwaloko bese bafile yindlala, koma, kanye nato tonkhe tinhlobo tetinhlupheko; noko bebakubeketelele konkhe kuhlupheka kwabo.

30 Futsi njengobe kwenteka, loku bekusabelo sabo kutsi bawele etandleni tebantfu labebalukhuni kanye nalabebanenkhani; ngako-ke bebangafuni ngisho nekuwalalela emavi abo, babacosha, babakhiphela ngaphandle, babashaya, futsi babachuba besuka indlu ngendlu, indzawo ngendzawo, bate babafikisa eveni laseMidoni; Futsi lapho batsatfwa baphonswa ejele, baboshwa ngetintsambo leticinile, bagcinwa ejele emalanga lamanyenti, bate bakhishwa nguLamoni kanye na-Amoni.